横沙乡

横沙乡勒拉上海个位置

横沙乡，是上海市崇明区下头一個乡级行政单位，勒拉崇明区东南面吴淞口外长江南支水道个横沙岛上，故咾叫横沙乡。横沙乡个管理范围是横沙东滩大规模填海前个原横沙岛个范围，东面是人工填海填出来个横沙新洲农业园，西面跟长兴镇隔开一段长江，全境呈三角形，面积51.74平方公里。户籍人口约3.3万人。

地理

横沙乡管理范围就是填海前个整座横沙岛。伊1858年再露出水面，勒拉自然因素下头，原隻頭岛朝西朝北移动，经过人工开垦搭仔造海塘岸线再变成现在箇副样子。按吴淞高程看，原隻頭岛地面高2.4到3.1米，平均高程2.8米。

经济

横沙岛浪主要是农业经济，种种经济作物，养养淡水鱼咾啥个。素小菜么种些橘子、蔬菜，再种些藏红花、无花果咾啥个，有养草鱼、花鲢、鳊鱼、鲫鱼、蟹咾，捉捉刀鱼咾啥个。横沙乡有发展旅游业个想法，必过要趁船再好来，交通弗便当，游客弗多。横沙东滩伊面围出来个横沙新洲现在全境划畀上海现代农业产业园，但弗属于横沙乡管辖。岛浪向曾经有零碎个工业，生态岛政策落地以后侪停产废弃脱嫩。横沙乡政府有多只岛外经济项目，包括乡办个十几家建筑公司，是横沙乡主要收入来源。

行政区划

横沙岛搭仔横沙东滩围垦区域个卫星影像（2023年12月份）。按照崇明区政府个讲法，只有原来横沙岛个地方范围（图内向红颜色线左面）是横沙乡个管理区域。

横沙乡下头有箇些社区搭仔行政村：新民社区、兴胜村、增产村、公平村、红旗村、东浜村、新北村、兴隆村、丰乐村、新春村、东兴村、新联村、惠丰村、新永村、民建村、民生村、永发村、富民村、永胜村、东海村、民星村、江海村、民永村、民东村搭仔海鸿村。按照崇明区政府个讲法，横沙东滩围垦区域弗属于横沙乡个管理范围。

对外交通

现在么，横沙乡只好走水路进出，进出岛个公交线路也是走摆渡个。

长横车客渡、吴淞至横沙高速船

1966年造个横沙富民客运轮渡码头是全岛唯一一座对外开放个客运码头，现在常态开个有长兴岛-横沙岛车客渡、吴淞-横沙高速船航线（只允许行人），侪是上海市客运轮船有限公司承运个。长横轮渡碰着休息日脚客流高峰，三天两头堵牢，必过吴淞到横沙航线勒垃长江隧道开通仔么客流量减脱交关，赛过运板凳。生怕横沙岛箇面也堵牢么，现在长横轮渡只勒垃长兴岛伊面检票收费，相当于一次性收来回个船票钿。帮其他摆渡按照气象局畀个长江口大致风力情况确定啊跑船弗一样，长横轮渡自家有得单独个风速仪，只要长兴岛、横沙岛间实测风力小于七级就会得开，弗受外港风速、预警信号限制。

2022年12月15号，用超级电容个“新生态”轮投入长横轮渡运营，成为“世界首艘超级电容动力车客渡”。2023年8月份，出于安全考虑，禁止电池上船，导致全岛交通瘫痪脱；当年9月份开始改开专门个船定点运电瓶车摩托车电池，箇辰光弗送其他乘客车子。

水陆联运公交车

2015年2月1号，水陆联运公交横长线开通，终点站分别是横沙岛客运站帮长兴岛客运站，走长横轮渡，每日天跑8班。2017年7月18号开始么，班次增加到每日天16班。

2017年12月18号，申崇七线开通，好直接从横沙岛客运站到长江南路枢纽站，采用水陆联运，主要走长横轮渡搭仔长江隧道，一人一座，单一票价12块，每日天16班。2018年2月11号么，市区终点站改到吴淞客运站，票价13块。箇线路配车4部，每部车子浪向侪有得安全带搭仔上下船箇辰光用个辅助轮。

公共事业

给排水

横沙乡1982年开始供自来水，造仔横沙水厂，用个是地面浪个水。1988年、1990年，先后打仔两口260米深个井，从地底下头抽水，後来拢总打仔6口深井。2017年4月20号，横沙岛集约化供水工程正式动工，2018年1月15号搞定，全乡吃个是长兴岛青草沙水库个自来水，深井停脱。横沙岛是上海市阿末一隻接进全市集中供水管网、停用深井水个地区。

横沙乡生活污水每日天弗超过125L，按上海市有关标准弗适合设置集中污水处理设施，故咾基本勿处理直接排勒河浜里向。近年来，也有拿含氮含磷污水处理仔么用来浇田个。

体育

誉民村个篮球队（横沙誉民队）勒垃三人篮球丄邪气结棍，获得中国男子三人篮球超级联赛（“超三联赛”）2022年头一届个冠军、2023赛季亚军。2023年，永丰村旁个三人篮球比赛场地承办国际篮联大师赛（上海崇明站）比赛，吸引交关岛内外游客。2012年开始，横沙岛丄每年举办一届脚踏车骑游大会，兼顾业余脚踏车搭仔旅游观光。

医疗

横沙乡只有一座社区卫生中心，是1958年造个横沙卫生院，1995年成为一级甲等医院，2003年12月改成现在箇名字。医疗服务水平推板，诊室配置弗全面。岛丄病人要抢救么要乘摆渡去上海，至少要1個钟头，有居民就箇能介死勒路浪向。岛浪向只有一部救护车。2023年，横沙社区卫生中心陆续增配彩超仪、抢救室等设备，第二部救护车也到哉，2024年初启用，另外增设直升机救援服务。2024年开始，社区卫生中心帮上海市第七人民医院达成合作，横沙岛丄通过网络就好七院进行远程医疗，七院医生也会得每隻号头上岛问诊。

通信

全乡只有得一爿中国移动营业厅，每個礼拜营业两天，只有服务员一家头。除开通信服务，营业员也指导老年人哪能用智能手机。

人口

截至2020年底，横沙乡户籍人口33,655人，外来人口1,549人。实际常住人口约2.2万人，人口组成高度老龄化，60岁以上个有1.1万人，80岁以上个也有两千多人。近年来，但实际常住人口逐年降低，多数劳动力出去打工，人口收缩。