跳转到内容

华亭海塘奉贤段

编辑链接
出自维基百科，自由个百科全书
华亭海塘奉贤段
全国重点文物保护单位
中华人民共和国国务院公布
所在 上海市奉贤区
分类 其他
时代 清
编号 8-0751
登录 2019年

华亭海塘奉贤段，貤叫奉贤华亭海塘、华亭东石塘[1]、华亭古海塘[2]，是上海市奉贤区柘林镇境内个一处古代海塘遗址，拉雍正年间（1725年至1728年）造个[3]，垃拉原华亭县南部个古代杭州湾北侧岸线、今朝沪杭公路搭奉柘公路南侧路基沿线，发掘区段长4.5千米，被誉为“上海小长城”。[4]

建筑特征

[编辑]

奉贤华亭海塘是历史丄华亭县捍海石塘个东段，西到龙珠庵（现在个柘林镇漴缺村附近），东岛柘林镇华家角（堰墩湾）连浪内海塘，全长约8.6公里，地下基础深1米，地面部分高4米，宽约1.5米，底宽约3米多；贴土包裹以後形成外土内石个结构，塘面宽约15米，底宽约30米，高还是4米[1]。来勒发掘处个段落里向发现三十多处铭刻，有建设人个名字、监督人个姓名、“长庆安澜”“屹若金汤”咾啥个祝福语[2]。

历史

[编辑]

雍正四年（1726年），吏部尚书朱轼主持筑华亭县捍海石塘，雍正十三年（1735年）竣工。为咾保证堤防，箇段海塘规定采用特殊个“鱼鳞条块”法，还对石块个长宽高、堆叠层数、堆叠方法、粘合方法啥个做仔要求。因为弗按照标准来造，浙江巡抚李馥畀罢官哉。雍正五年，朝廷派太仆寺丞俞兆岳监督松江府塘工。伊造仔示范石塘（“样塘”），让华亭石塘按照伊个方法加固，增强石塘个整体稳定性。[5][6]

部分塘段依然没有被发掘，包裹于土中

雍正六年、雍正十二年、乾隆十二年，华亭海塘先後进行多趟个加固工程，拿石塘三個面包勒土层下头，形成包石土塘[7]。

道光年个辰光，因为台风咾啥个原因，戚家墩个海塘畀海水冲没脱，漴阙附近箇段留下来哉。林则徐拿杨公庙为界，畀海塘划分成东、西两塘，西面隻因为风高浪急常常加固，东面隻主要是日常养护。[8]

同治十三年（1873年），华亭海塘置驻塘委员，负责修缮维护海塘，还设置华亭县塘工岁修公所来负责箇桩事体[9]。

贴土包裹工艺，加之来勒海塘上造仔沪杭公路、奉柘公路[7]，拿石塘囥勒地底下头。1996年3月份开始，海塘上造个奉柘公路柘林段实施降坡拓宽工程，纔发现部分石塘[10]。因为露出个堤坝有一定高度，影响交通，故咾经过了论证“备案”以後，海塘遗址畀政府掘开十几隻缺口[4]。

现实威胁

[编辑]
因南海公路建设而断开个海塘，冒出杂草，畀贴广告

奉柘公路沿咾古海塘建个，是奉贤区去金山石化顶短个县级公路，也是金山帮奉贤之间物流个一条主要通道，有交关集装箱卡车跑个。2017年4月29号14点多，一部集卡来勒奉柘公路海湾路路口西面80米个地方撞上海塘，导致部分石条移位碎脱，还引发集卡投保个保险公司帮政府之间个纠纷。此外，高头冒出来个杂草会减少石块间个粘合力，海塘上贴个广告会得腐蚀石块，清除伊个辰光也会得对石块造成损伤。此外，根据《中华人民共和国文物保护法》，海塘两侧个建设控制地带弗允许有任何建筑，但是没人睬伊，照样造房子。[2]

保护开发

[编辑]

1996年8月14号，箇段海塘以华亭东石塘个名义收录进奉贤县文物保护单位名录。2002年4月27号，伊以奉贤华亭海塘个名字收录进上海市文物保护单位名录[3]。海塘正南面个上海应用技术大学也展开过一系列相关个学术研究[2][11]。2012年，应用技术大学曾建议相关部门拿海塘划进伊拉学堂奉贤校区里向进行整体保护，或者是造隻公园进行保护，必过因为土地管理相关个问题，呒没结果[12]。

海塘曾因阻碍交通畀拆开，石料集中堆放以备后续个修复[2]。政府曾对海塘上被打开个部分缺口根据文物保护标准进行修复，来勒沿线建设生态园林区，铺设草皮咾啥个[13]。此外，奉贤区文旅局、乡镇、村民、居民委员会层层签订安全责任书，设置文物专管员定期汇报文物安全动态；奉贤区博物馆每年对海塘进行四次以上个全面检查，社区事务中心每個号头安排巡查，而村民、居民委员会组织个信息员要每個礼拜对文物进行巡查[14]。

2018年8月份，奉贤区人民政府表示想造一座“华夏钱滩遗址公园”来介绍古代冈身、古代海塘个历史，还表示2017年个辰光，奉贤区人民政府委托个专业团队来勒海塘上新发现十几块碑刻，已经拓印过研究整理好哉。奉贤区人民政府还明确表示，畀拆脱个海塘石块已经编号保存，来勒条件允许个情况下头会得整体修复相关段落。[15]

2019年，奉贤区启动华亭海塘文物保护规划项目，想造海塘遗址公园、海塘专题馆，进一步保护研究隻海塘[14]。2019年10月16号，国务院正式公布第八批全国重点文物保护单位名单，奉贤华亭海塘用华亭海塘奉贤段个名字申报成功[16]。

参考资料

[编辑]
  1. ↑ 1.0 1.1 （1987）“历代海塘”，奉贤县志．上海：上海人民出版社．ISBN 7-208-00027-1．於2018-09-21参阅．  档案，存勒互联网档案馆当中。（2016年3月27号）
  2. ↑ 2.0 2.1 2.2 2.3 2.4 "“海上长城”华亭古海塘伤痕累累 与奉柘公路并肩蜿蜒，被车辆碰撞时有发生". 新闻晨报 (新闻报社): p. A05. 2018-02-23. Retrieved 2018-09-21. 
  3. ↑ 3.0 3.1 上海市市级文物保护单位一览表. 原始文档勒2014-07-14存档. 访问日脚2018-09-21.
  4. ↑ 4.0 4.1 裘雯涵; 李宝花 (2017-02-20). "奉贤柘林这座人称“上海小长城”的华亭石海塘，能否冲击国家重点文物保护单位？". 上观新闻 (解放日报社). Retrieved 2018-09-21. 
  5. ↑ （1987）“海塘构筑方法”，奉贤县志．上海：上海人民出版社．ISBN 7-208-00027-1．於2018-09-21参阅．  档案，存勒互联网档案馆当中。（2016年3月27号）
  6. ↑ （1997）“大事记”，上海水利志．上海：上海社会科学院出版社．ISBN 7-80618-380-9．  档案，存勒互联网档案馆当中。（2018年1月18号）
  7. ↑ 7.0 7.1 （1997）“陆域现有海塘”，上海水利志．上海：上海社会科学院出版社．ISBN 7-80618-380-9． 
  8. ↑ （1997）“陆域古塘演变”，上海水利志．上海：上海社会科学院出版社．ISBN 7-80618-380-9． 
  9. ↑ （1987）“固塘措施”，奉贤县志．上海：上海人民出版社．ISBN 7-208-00027-1．於2018-09-21参阅．  档案，存勒互联网档案馆当中。（2016年3月27号）
  10. ↑ （2003）“大事记”，柘林志．北京：方志出版社．ISBN 978-7-5144-0185-1．  档案，存勒互联网档案馆当中。（2018年9月23号）
  11. ↑ "学校召开“华亭古海塘申报全国重点文物保护单位”专家讨论会". 上海市应用技术大学. Archived from the original on 2017-05-11. Retrieved 2018-09-21. 
  12. ↑ 吴嘉川 (2012-12-25). "为建公路 市级文物被“腰斩” 附近居民大多不知其身世". 青年报 (青年报社): pp. A04-A05. Archived from the original on 2018-09-21. Retrieved 2018-09-21. 
  13. ↑ 王笈 (2017-05-24). "上海“小长城”的“守”与“变”". 中新网. Retrieved 2020-01-12. 
  14. ↑ 14.0 14.1 叶松丽 (2019-11-02). "上海“小长城”好事连连，入选全国文保还要建海塘遗址公园". 周到上海 (新闻报社). Retrieved 2020-01-12. 
  15. ↑ 奉贤区政府对市十五届人大一次会议第0614号代表建议的答复 (zh-Hans) (2018-08-28). 访问日脚2018-09-21.
  16. ↑ 国务院关于核定并公布第八批全国重点文物保护单位的通知 (2019-10-16).
取自“https://wuu.wikipedia.org/w/index.php?title=华亭海塘奉贤段&oldid=327052”