八埭头

八埭头，勒拉上海市杨浦区西南面，平凉路、通北路伊头^[1]。清光绪廿三年（1897年），箇面造韬朋路（今通北路），光绪三十四年勒拉韬朋路造八墚砖木结构个里弄房屋，箇咾有八埭头箇个名。

箇面是杨树浦工业带顶顶早个工业园区，也是中国近代工业顶早、顶集中个地方，有天章记录纸厂、杨树浦水厂、上海船厂总部码头、恒丰纱厂、正广和汽水厂、花旗烟厂等等，大多数是1880——1884年造个。工业带动商业个繁盛，勒拉箇面，平凉路浪形成一条商业街，一度叫“杨浦南京路”^[2]。

弗过，现在八埭头箇面老房子侪拆唻差弗多哉，变成功杨浦外滩，也就是东外滩个一部分，造仔些高层建筑。规划里写拉变成功杨浦滨江门户区，变成功高端科技业、金融银行业、高端服务业个聚集区，规划几幢超高层5A级写字楼、酒店、高端商业体搭游艇码头，朆想荒废脱哉，只挺几栋高层住宅楼。