五棱郭

勒拉五稜郭塔上拍个五稜郭

五棱郭（日文：五稜郭／ごりょうかく ^Goryōkaku），是日本江户时代末期江户幕府勒拉虾夷地个箱馆（今北海道函馆市）郊外造个一座星形要塞。同一辰光造好个，勒拉长野县佐久市个龙冈城也叫“五棱郭”，必过现在提到五棱郭基本侪指箇座勒拉函馆个城迹。

造个辰光，伊曾叫龟田役所土垒或者龟田御役所土垒，必过计划造迭座城个辰光已经开始用“五棱郭”箇个名字哉。城造个地方原来是湿地，有交交关关细柱柳，故咾也好叫柳野城。

箱馆开港个辰光，本来勒拉函馆山山脚个箱馆奉行所搬到五棱郭。必过，庆应2年（1866年），城造好刚过去两年，江户幕府随咾江户开城灭亡哉，五棱郭由箱馆府接管，勒拉箱馆战争里向畀旧幕府军占领过。明治时代，城里向除脱一栋建筑物，其它个全部拆脱，改造成大日本帝国陆军练兵场。1914年，改造成五棱郭公园，对外开放，成为函馆市民个休憩地同代表景点之一。

五棱郭畀日本政府指定为特别史迹，作为“五棱郭搭仔箱馆战争个遗迹”个一部分排拉北海道遗产里向。五棱郭也是文化厅管理个国有资产，授权畀拉函馆市，由函馆市住宅都市施设公社负责管理。