上海人民广播电台戏剧曲艺广播

上海人民广播电台戏剧曲艺广播，貤叫上海戏剧曲艺广播，简称上海戏曲广播，是上海广播电视台一家专业电台，2002年7月15号从原上海文广新闻传媒集团个文艺频率里向拆开来正式宣告成立，是全国第一家专业戏曲广播，前身是上海人民广播电台文艺频率。

历史

1978年以后，上海电台文艺戏曲节目播出规模越来越大。1985年9月份，主要放文艺节目个调频101.7兆赫（后来划畀动感101）立体声节目开播。1987年，上海电台文艺戏曲节目主要来勒中波1197千赫播出，对外呼号“上海人民广播电台文艺台”。1997年4月20号，频率呼号变成“上海人民广播电台文艺频率”。

2002年7月15号，原上海文广新闻传媒集团个文艺频率节目内容一拆为两，组建文艺频率搭仔戏剧频率，新个戏剧频率用个是中波1197千赫、调频94.7兆赫（后来畀经典947用）播出，主要放戏曲节目，是滬上獨有个主要用吳語（上海話）播音个廣播頻率，著名节目包括《老搭子茶館店》、《談天說地阿富根》、《滑稽王小毛》（停播）、《吳曲鄉音》、《說說唱唱》、《楊戲迷和馬大嫂》、《星期戏曲广播会》咾啥个，放滬劇、滑稽戲、越剧、评书咾啥个戏曲曲艺节目。

2005年12月份，戏剧频率归畀新组建个SMG综艺部，播出频率调整成调频97.2兆赫。2007年12月23号，戏剧频率改名叫戏剧曲艺广播，2008年1月20号重启《星期戏曲广播会》现场直播演出。2009年，戏剧曲艺广播划畀东方广播公司（东方广播中心）管理。

2014年7月3号，上海广播电视台宣布，旗下艺术人文频道、七彩戏剧频道、经典947频率、戏剧曲艺频率组建“公益媒体群”，转型成弗看广告营收、弗考核收视率个公益频道。