七月王朝

来自维基百科
跳到导航 跳到搜索
Conference hall of the chamber of deputies at the Palais Bourbon.

七月王朝(法文:Royaume français)是19世纪前半段法国存在过个一个君主制辰光。具体是从1830年到1848年,从开始到完结,只有一个君主路易飞利浦一世,伊是出身奥尔良公爵系统个。

成立搭灭亡[编辑]

立在法兰西第一帝国百日王朝相继畀灭脱之后,法国个统治集团重新变回法国波旁王朝路易十六个阿弟路易十八继位,执行妥协策略,让法国个自由派也对伊个复辟容忍。弗过,辰光弗长,到伊死脱,阿弟查理十世继位,情况发生变化,查理十世老早收到过法国大革命交关苦难,对自由派邪气反感,上位之后,就拿老早路易十八弗敢复辟个事体,侪重新做起来,个能,就引发自由派个恐惧搭阴谋。到1830年,借口外交经济毛病,法国自由派爆发七月革命,拿复辟个波旁家族赶跑,并且重新拿拿破仑辰光个交关策略恢复。个就包括主权在民,自由平等之类个空话。弗过,个辰光伊拉还是弗敢直接搞共和制度个(会引发《维也纳条约》过后欧洲列强个反感),所以,决定选择一个折衷个人物担当自家个国王,个就让路易飞利浦看到机会。

路易飞利浦是出生波旁家族旁系个奥尔良公爵系统,伊拉屋里一直欢喜鼓吹法国大革命个思想,畀自由派认为是搞弗出传统花头个人物。所以,1830年七月革命之后,自由派就寻到伊,讲好让伊当国王。路易飞利浦就答应,之后,弗去教堂,却是去市政厅宣布自家当国王哉。迭个做法,也反映出法国传统君主制度个完结。之后,飞利浦讨好自由派,执行蛮多符合伊拉利益个事体,立在1830年代开始辰光,恢复法国大革命个三色旗,并且出兵开始殖民北非。弗过,法国个辰光立在国际高头个地位还是弗如然,连路易十六辰光个水平还恢复弗到。国内又搞节育,经济发展也畸形。

1835年开始,七月王朝拿权力慢慢放松,自由派欢喜个议会整治开始走红。自由派为投桃报李,也默许路易飞利浦镇压掉更加激进个共和派活动。1840年代开始辰光,七月王朝得到蛮多爱戴,嘸多少人想到要拿伊拉推翻。1840年,为表达自家对法国大革命个欣赏搭对拿破仑个景仰,路易飞利浦命令拿拿破仑个棺材从圣海伦娜岛运回巴黎,并摆到法兰西荣军院当中让老百姓瞻仰。交关波旁复辟辰光弗如意个人,立在七月王朝辰光也回到法国,重新获得社会地位。

弗过,从1840年代开始,路易飞利浦个独裁倾向就加强。老早鼓吹个各种自由派调调,也朆再提,1840年,伊开始长期任命自家信任个大臣组阁,加上迭个辰光法国工业化开始提速,交关农民来到大城市,成为所谓个“无产阶级”。让法国城市增长弗稳定因素。所以,对七月王朝个反感越来越弗好控制。1843年,后世共产主义个发明人马克思从莱茵河流域跑到巴黎,并搭自家个朋友恩格斯一道,立在法国搞各种运动,还出版各种宣传物事。形式就更加弗稳定。

1846年,法国农业歉收,食品短缺。迭戈也是个辰光整个欧洲侪经历个事体。之后,各地生活质量个下降带来交关麻烦,自由派靠煽动民粹,开始重新抬头。1847年,交关失业工人搭农民开始骚动,并引发知识分子个重视,开始拿伊拉搭共和派个支持势力串联。1848年年初,法国各地侪开始大规模骚乱,路易飞利浦弹压弗力,到1848年2月,伊发现军队也弗支持伊哉。就只好自动退位,流亡到英国去。法国自由派重新得势,建法兰西第二共和国