上海

来自 吴语维基百科
蹦到: 导航搜寻


上海上海言话[zãhe]),简称沪,别称申,是中华人民共和国直辖市之一。勒了中国东部长江冲积三角洲,濒临东中国海,勒浪长江入海口南岸。眼门前中国发展得顶快个城市,也是经济顶发达个城市之一,伊拨认为是中国个商业搭金融中心,是全世界公认个全中国顶大个城市。上海市只移民城市,2300萬寧住了此地,里香有的40%個流動人口。噶系獨寧樂樂一淘,形成了海派文化。

Shanghai montage

中華民國個辰光,上海是亞洲最大個城市,也是东亚顶最重要个工商業中心,被公认为東方巴黎。1990年起實行個浦東開發開放政策使得上海經濟發展迅速,并於2005年成立國家綜合配套改革實驗區。

2005年上海年货吞吐量有得4.43亿吨介多。2006年成为世界高头第三大集装箱港口,吞吐量有得2171万标准集装箱,齐巧勒仔新加坡香港个后头。到了2008年,上海港有的各類碼頭1200都只,萬噸級以上個生產性泊位137個,碼頭線總長毛115公里,每年吞吐量有的58170萬噸,最大靠泊能力15萬噸級。至2010年,上海港已成為世界最大個集裝箱港。

2006年上海個GDP為2,972亿美金,估寧GDP已经達到了12,748美金。2010年,世界博览会勒上海举行。另外,2009/2010年上海個人類發展指數達到0.908,成為大陸最高,啊是唯一一個達到極高人類發展指數個中國城市。

上海是大陸個商業幫經濟中心,地區生產總值在大中華區城市中拔了第一位。上海頂重要的產業是商貿流通、金融、信息、製造等。上海啊是中國的鐵路幫航空個樞紐,上海個港口是世界高頭最大個集裝箱港,已經成為一個國際金融跟航運中心。

行政区划[编辑]

时至2011年末,上海有16个区、1个县,共108个镇,2个乡,99个街道办事处,3852个居民委员会搭1632个村民委员会。 [1]

2009年5月6日上海市政府勒给新闻发布会浪宣布,国务院已批复了上海关于浦东扩区嗰申请,同意撤除南汇区,将南汇区行政区域并入浦东新区。[2]

2011年7月26日,原来嗰卢湾区同黄浦区畀撤销,随后成立了新嗰黄浦区,即两区合并了。


历史[编辑]

详情参见上海历史上海近代史

建城搭发展[编辑]

上海地区,苏州河南面垃拉公元751年(唐明皇天宝十年)拿嘉兴东半边、海盐北面、昆山南边从原来个地方拆开来,重新设华亭县。1277年(元朝至元十四年)拿华亭县升级为华亭府,第二年改叫松江府。到满清人个辰光松江府辖有华亭、娄、上海、青浦、金山、奉贤、南汇7只县搭川沙抚民厅。苏州河以北于1218年1月7日(南宋嘉定十年十二月初九日)设嘉定县,后头又从当中分出一部分作为宝山县。

上海市区原先是苏州河下游个一只渔村,至唐宋逐渐成为繁荣个港口。南宋辰光(1265-1274年)建上海镇,因了许黄浦江西个上海浦得名。到明朝辰光,上海已经成为江南有明个贸易中心,老县城中央修造豫园城隍庙书隐楼等建筑物。明朝末年,西方个耶稣会传教士利玛窦搭上海人徐光启合作,翻译几何原本,也拿天主教传播到上海哉。

近代远东第一城[编辑]

清朝之后,上海继续发展,到嘉庆辰光,已经成为全帝国顶大个贸易港口之一。由于优越个地理位置,也吸引到西方文明国家个注意。来勒1842年南京条约签署后,上海成为帝国对世界开放个第一批口岸,也成为大英帝国个租借地。法兰西来勒之后几年也来勒洋泾浜以南开辟租界。上海近代个城市景观开始形成。

1930个上海 远东第一城市

国民党个辰光于1927年设立上海特别市,1930年5月改叫上海市。迭个辰光,上海个发展已经搭国际接轨,外滩边浪向修造交关西洋折中风格个银行建筑物。形成著名个“万国建筑博览会”。来勒南京路高头,四大百货公司开始修造新个百货商场,大小弗亚于纽约搭伦敦。南京西路到静安寺一代成为有钞票个资本家修造大庄园个场所。来勒法租界霞飞路,中产阶级个新式里弄一片片被房地产开发商规划。1917年之后逃难来个俄罗斯帝国白俄,开始逐渐融入上海个生活,伊拉居住个岳阳路地区,现在还有一尊普希金铜像,作为迭个辰光个见证。

国民党为了搭租界里厢迭个国际化、文明化个上海相抗衡,大力开发江湾地区个建设,准备拿江湾地区修造成弗亚于市区个上海特别市。来勒1929-1937年中间,国民党政府先后修造了江湾体育场上海特别市政府上海特别市博物馆上海特别市图书馆等建筑物,体现出明显个中国宫殿风格。

来勒虹口地区,日本人从一战之后就弗断扩充实力,来勒现在个四川北路地区,修造了自家个神社、本愿寺,一副东瀛情调。多伦路高头个内山书店,也体现出迭个辰光日本人来勒虹口地区个巨大影响力。


1840年以后,上海老早是畀逼勒许开放个港口。结果来了交关外国人,勒浪上海开租界。渠拉有自家个法律搭仔行政机构。还有交关犹太人逃到此地,勒浪上海开店铺,扒仔木老老钞票,变成功富翁,还勒浪上海造仔交关多个房子。哈同、沙逊就是其中鼎鼎有名个犹太人。1949年以后,伊拉侪跑脱哉。

1941年太平洋战争爆发之后,日本搭当时辰光个汪精卫政府签署条约,来勒日本占领区废脱老早个租界,随后英美等国也搭当时来勒重庆个蒋介石政府签署条约,宣布废脱租界。所以,到1945年二战结束个辰光,保持一百多年自治个上海近代社会体系也宣告解体哉。

来勒国共内战辰光,上海充当国民党政权个经济中心,弗过因为糟糕个财政搭飞涨个军费,国民党老快就碰到用钞票个问题。到1948年,金融状况一塌糊涂,又因为国民党来勒军事高头个无能。到1949年5月,上海被共产党占领。国民党来勒离开上海之前,拿上海金库内交关黄金运到台湾。

计划经济下个转型[编辑]

1949年之后,上海彻底切断自家搭世界其他市场个联系。金融市场被取缔,银行业搭私有经济被强制转轨。老早喧嚣个外滩,彻底改变用途,上海发展个重点,被归纳到工业中心高头。来勒之后交关年数,上海制造成为中国名牌个同义词。来勒同一个辰光,上海个城市规模也继续扩大,老早认为个租借地区已经弗好容纳介多人口,所以市区向东北搭西面扩展。徐家汇田林新村曹杨新村侪来勒迭个一段辰光开始形成。上海人个职业,彻底围绕工业进行发展。大部分上海人成为各种各样个工人。

城市规划方面,老早个石库门房子被拆脱比较少,只有来勒市中心老早个哈同花园被拆脱,修造苏联斯大林风格个中上海展览馆。上海人口来勒迭段辰光增长比较快,弗过侪是自然增长,所以家家户户个用房侪比较紧张。来勒老城厢搭南京路等地段。上海三代同堂,蹲勒一间房间里过夜是平常事体,这也让上海人来勒租界辰光形成个“门槛精明”个形象进一步加深。

来勒50年代到70年代,上海个外来人口流动也因为户籍政策彻底停滞,整整一代上海人开始来勒纯粹个上海言话环境当中成长,这种环境也让三十年代来上海个淮扬地区移民搭四十年代末个南下干部子女,接受海派文化,对上海当代文化个形成,起到交关大个作用。来勒六十年代,有老多个上海工厂搬迁到内地,作为支援大三线个举动。又有交关上海年轻人上山下乡,这些举动,侪是计划经济辰光个特有产物,弗过,这一代人个青春也被这样荒废脱哉。

开放后个动荡[编辑]

1978年之后,上海也开始慢慢改革开放,弗过来勒八十年代,主体面膜还是没啥大个更改,上海依然是以工业为主个城市,上海人依然是各行各业个基础,弗过七十年代开始个计划生育已经让上海个人口增长开始减慢。到1990年代,上海个浦东地区来勒中央个政策下开始开发,上海重新发展起老早被取缔个金融市场。弗过上海老早文化中心个地位,已经弗可能恢复哉。

2000年代后,上海外来人口流入猛增,外来人口个规模,从2000年个一百多万人,猛增到2012年个一千八百多万人,来勒绝对数量高头已经超过本地户籍居民。加上外来人口绝大多数是青年人,所以对上海各个方面侪带来邪气大个冲击。现在来勒上海碰到讲河南话人个概率已经超过碰到讲上海言话年轻人个概率,长此以往,上海个面貌必定将发生颠覆性个变化。

方言[编辑]

上海闲话,一般指上海个市区里厢个闲话,属于吴语太湖片个苏沪嘉小片(也有得另外一种讲法,就是上海市区闲话应该从苏沪嘉小片当中独立出来),也有眼人拿上海言话叫作“沪语”。搿个讲法虽然行情行市的人勒许用,但是弗是最准确个。上海闲话属于吴语迭一点是邪气肯定个,尤其搿一腔吴语个地位受到城市化搭仔普通闲话个威胁。

上海闲话个历史[编辑]

上海老早属松江府,曾隶属嘉兴辖下头,语言也以嘉兴闲话为主。松江府成立之后,松江地区闲话勒嘉兴闲话个基础上独立发展,形成吴语中发展相对滞后个松江闲话。根据老早《松江府志》个记载:明代是“府城视上海为轻,视嘉兴为重”个。而到清朝变成功“府城视上海为轻,视苏州为重”。苏州闲话因其权威性搭之邪气丰富个文学形式(吴语小说、传奇、弹词搭民歌等)对上海话也有过交关重要个影响。

上海开埠后移民行情行市个涌入,各路移民个屋里厢个闲话对上海闲话个形成造成了一番影响,特别是宁波话闲话。因为宁波人数量大、搭之有社会地位,现在上海话个第一人称复数“阿拉”就是从宁波闲话伊面搭来个.。搿形成以上海本地闲话(松江闲话)为主,多种吴语方言(苏州、宁波闲话为主)个共存、混杂搭融合的新上海闲话。新上海闲话继承了老上海话个基本特色,有北部吴语个主流特征,一记头成之太湖片吴语区发展顶快的方言,也替代传统个苏州闲话成之为最有影响力的吴语方言,搭苏州话一道成之当代吴语个代表方言。

解放前头个30年代真真叫之上海言话个黄金期间。出现了交关吴语文学作品、其中大多数是张爱玲迭个上海本土作家创作出来个。伊个辰光个上海人发明了交关新个汉语词汇,搿一批词语有从英文来个,譬如讲“水门汀”(cement),又从广东闲话来个,譬如讲“夯么啷当”,当然,也有一大批上海人自家发明个词汇,拨拉普通言话吸收得去了。当时个上海,上海言话是绝对个主流,弗管啥地方个外地人儕要学上海言话个,就算是外国人也勒该学。上海个交通大学需要资料证明,也是用上海言话来授课个,像圣约翰大学、同济医学院搿鼐。

解放以后,全中国开始推广普通言话。别过上海人还是欢喜讲自家个上海言话,上海人勒勒上海是老少讲普通言话个。伊个辰光全国实行老严格个户口制度,外地人移民到上海个是邪气少。搿能之就算政府勒勒强行推广普通言话,上海言话登勒上海还是相当个强势个。

上海闲话个现状[编辑]

九十年代浦东开发以后,外地人搭仔乡下人开始源源不断个到之上海来。帮解放前头个移民潮弗一样个是,搿趟子个移民是来自全国弗同个地方个,是弗会,也弗愿意得讲吴语个。再加上上海人经过学堂里个强行教育,儕会得讲一口唠流利个普通言话,葛唠新个上海人搭之老个上海人开始用普通言话交流了。辰光一长,勒了上海个交关公共场合就只听得到普通言话了,上海言话讲个人已经越来越少了。同时,政府推广普通言话个立升是邪气吓人。学堂里个老师弗好讲上海言话,学生子勒勒课间休息个辰光也勿好讲上海言话,电视台个上海言话节目拨拉纷纷取消,交关老优秀个上海言话电视剧也弗拨拉放,广播台个上海言话节目也拨关脱了,吴语个报刊杂志就更加呒沒哉。个搿能仔一来,上海言话已经到了要受保护个田地了。

进入廿一世纪以来,上海出现了一批本土学者,伊拉对于上海言话个逐渐消亡是邪气担心。纷纷提出保护、传承上海言话个方案帮仔行动。眼门前,上海言话已经拨拉越来越多个上海人所重视了。交关年轻个上海小人又发明了邪气多个新词汇,上海言话正勒勒复兴个过程当中。上海言话搭仔其他吴语地区个方言个融合也了拉慢慢交进行。

现代个上海年轻人使用上海话聊天也是司空见惯。至今,上海人还是喜欢使用当地语言,但也让老多外地人感觉到上海人排外个心理,但实际上搿是上海市民保护老祖宗遗留下来个口头遗产个最好个形式。

语音[编辑]

上海闲话内部有分歧,主要以年(拟)龄区别老派、中派搭之新派。

老派:声母27个,韵母51个,声调6个(阴平、阴上、阴去、阳去、阴入、阳入) 中派:声母28个(增加[ʑ]),韵母43个,声调5个(阴平、阴去、阳去、阴入、阳入) 新派:声母28个,韵母32个,声调5个(阴平、阴去、阳去、阴入、阳入) 下头是关于语音的具体描写以中派上海闲话为基此(基础)。

声母[编辑]

搭多数吴语方言一道,上海闲话有一整套个浊塞音、不送气清塞音搭送气清塞音个对立。而且,还有一套对立个清擦音和浊擦音。

参考中文维基百科个表格[1]

韵母[编辑]

中古汉语个[-m]韵尾搭 [-n]鼻韵尾嘞该上海闲话中合流变成功鼻化,并最后落脱之,一道并入了阴声韵。一些中古汉语的[-ŋ]韵尾也变成了鼻化音。中古汉语个[-p -t -k] 勒上海话中已经都变成了喉塞音[-ʔ]。

了一些变体里,[u]的发音实质郞是不圆唇的[ɯ]。

声调[编辑]

上海闲话音调向重音化方向演变,声调从8只合并功成5只,实际郞只剩下来一只降调(阴平)搭一只平升调,变得邪气简单。搿让上海人读声调个辰光,自由个变体可以相当宽泛,譬如讲降调调值读成功“53”、“51”、“552”儕不影响听感,平升调读成平降升调也不会影响理解。语音搭词汇语法词双音节连调成之主流后,上海闲话在吴语中最快进化到“延伸式”连调,后字都失去了独立的声调而弱化粘着,重又向屈折语变化。

眼门前,上海闲话语个流当中,相对稳定个音位有两种,一种是声母,一种是前字声调,这两中为主的音位对上海闲话语音嘞嘞起着重要个稳定作用。(钱乃荣《上海语言发展史》)

由于人口融合带来的快速蜕变,加郞中、新派语音越来越受到普通闲话个影响,音节搭声调儕趋于简化,已经越来越失去吴语的代表性及特性。所以讲,某种程度郞厢上海话已成为一种“有声没调”,只有音高重音个独特汉语方言。

文化教育[编辑]

上海老早是全中国头一个接触外国人个场化。葛咾交关英文单词侪是以上海个发音来音译个。譬方讲,水门汀、席梦思咾啥。不过现在上海已经呒无搿能界个机会哉。外加现在上海交关小人讲上海言话已经勿大灵光哉。

解放前,上海个电影是全中国头一位。1949年以后,上海勒浪文化方面逐渐失去着伊个领先地位。但是,伊独特个海派文化始终搭仔京派文化属于两种不同个中国文化,上海个海派文化始终是一种真正个传统搭仔外来文化最好个融合,也是国际上承认个一种高雅个中国文化。文化大革命前头,上海曾经拍过勿少根据滑稽戏改编个电影,譬方讲,1963年个《如此爹娘》搭《七十二家房客》,搿眼电影用个语言包括交关勿同场化个吴语方言搭仔带山东腔、江北腔还有广东腔个上海言话,舞台剧味道邪气浓。九十年代,上海自家拍仔一部完全用上海言话讲个电视剧,是描写都市生活个正剧,叫《孽债》,几化讨人欢喜,不过后首来重播个辰光拨改成功普通言话哉。接下来上海还拍仔一部用上海言话讲个正剧叫《何须再回首》,搿趟朆通过审查,乃末勿来事于是呼改成功普通言话播出。现在上海荧屏高头个上海话节目只有号称地方曲艺滑稽戏个情景喜剧,比如讲《老娘舅》搭仔《开心公寓》。节目个质量整体浪来讲,水平弗高,内容庸俗,低级趣味,顶重要个是交关辰光一眼也勿好笑。滑稽节目口碑勿佳,不过收视率倒是老高个,侧面反映了上海人对沪语节目个需求。上海人要求中央政府放宽对方言影视作品管制个呼声也勿低。

上海老里八早个广播电台是有上海言话个广播个。必过现在已经呒无啥哉。东方广播电台有一档《阿拉上海人》个节目,部分内容是用上海言话播出个,交关受听众欢迎。两个主持人沈蕾搭晓林侪老赞个。现在每个礼拜下半天五点钟望里,上海人民广播电台戏剧曲艺频率有一档叫《笑笑乐翻天》个节目,专门播放点老滑稽。有兴趣个听众也好去听听看。

上海个教育事业邪气发达。有勿少全国一流个大学。譬如1949年以前个国立交通大学国立同济大学圣约翰大学震旦大学咾啥。而且搿歇辰光个交通大学全世界高头也好数数个。解放以后到现在,比较有名个大学有上海交通大学复旦大学华东师范大学同济大学

经济[编辑]

做为几百年来中国经济顶发达个地区,来勒江南中心位置个上海从清朝辰光开始就有雄厚个经济实力。到近代之后,经济发展更日新月异,成为远东顶大哥金融中心搭交易市场。上海个工业,来勒19世纪末发展起来,到20世纪大部分年数里厢,侪保持全国第一个地位。租界辰光个上海没有帝国统治个约束,发展极为繁荣,到1927年之后,则逐渐受到中央权力越来越大个影响。

总体情况[编辑]

上海是中国各经济中心,生产总值占到4%,是所有城市当中顶高个,2013年,上海个生产总值达到21,602.12亿元,来勒世界高头排名第11位,其中第三产业个比例超过百分之六十。一半以上个经济增长是私营经济企业贡献个。上海顶重要个产业依次是:商贸流通业、金融业、信息产业、房地产业、成套设备制造业、汽车制造业,此六大支柱产业贡献全部生产总值个一半。上海市民人均生产总值达到达到90,700元(14,756美元)

中华人民共和国成立到1990年开始个辰光,上海每年上缴个财政收入占到全部中央财政个20%以上。1990年代,中央启动浦东开发开放政策,上海财政上缴个比重稍许减脱一点,但仍有12~15%比例,大规模个财政上缴让上海本地投资资金紧张,造成土地财政并且引发高房价等问题。近年来,由于上海将大量地方财政收入亦上缴中央,让上海本地投资减弱,来勒相当程度高头拖累上海经济的发展

交通[编辑]

上海到周围大城市个航班时间
往莘庄个上海轨道交通一号线已经在人民广场站到达。


城市交通[编辑]

上海个交通也勒海发生交关大个变化。搿辰光个上海已经有得13条地铁哉。勒浪龙阳路地铁站边浪向还有磁悬浮火车,去浦东国际机场则要8分钟辰光。不过呢上海个地面交通交关轧,想开车子去上班或者白相勿大来三个。

上海的大巴士四通八达,指示牌、报站清晰,高峰时期5分钟间隔。效率颇高。上海额公交车一般性都有的英文报站,外国朋友了还此地白相乘公交车阿弗会的有啥困难个。11路公交车诶增嘎勒上海闲话的报站。

全面细致个城市交通轨道,请望:http://www.myliving.cn/metro/index.htm

航班[编辑]

上海拥有两个国际机场,一只是虹桥机场,一只是浦东机场。浦东机场比起虹桥来讲是新造个,各种物事侪老好个,也是上海个标志之一。

铁路交通[编辑]

上海来拉1987年以前,一直是使用天目路伊面个老北站,后首来由于老北站人忒多了,所以来许现在个位置造了新个上海站。普通市民欢喜叫渠新客站,来搭老北站区别开来。2007年,又建成功上海南站。2010年又建成功虹桥火车站。

公路交通[编辑]

注解[编辑]

  1. 中国上海»上海概览»自然地理»行政区划
  2. http://sh.xinmin.cn/shizheng/2009/05/06/1916337.html

外部链接[编辑]

Commons-logo.svg
维基共享资源里向寻得着搭该篇文章搭界个多媒体资源:
上海市行政区划 Zanheshiodupio.JPG
市辖区 黄浦区 | 卢湾区 | 徐汇区 | 长宁区 | 静安区 | 普陀区 | 闸北区 | 虹口区 | 杨浦区
宝山区 | 闵行区 | 嘉定区 | 松江区 | 金山区 | 青浦区 | 奉贤区 | 浦东新区(含原南汇区)
崇明县
中华人民共和国省级行政区划 Flag of the People's Republic of China.svg
直辖市 北京市 | 天津市 | 上海市 | 重庆市
黑龙江省 | 吉林省 | 辽宁省 | 山东省 | 河北省 | 山西省
陕西省 | 甘肃省 | 青海省 | 江苏省 | 安徽省 | 河南省 | 湖北省
浙江省 | 江西省 | 湖南省 | 四川省 | 福建省 | 广东省 | 贵州省
云南省 | 海南省 | 台湾省(弗勒实际统治,参见台湾问题
自治区 新疆维吾尔自治区 | 内蒙古自治区 | 宁夏回族自治区
西藏自治区 | 广西壮族自治区
特别行政区 香港特别行政区 | 澳门特别行政区