上海

上海（上海言話，[zãhe]），簡稱滬，別稱申，是中華人民共和國個直轄市之一。勒了中國東部長江沖積三角洲，瀕臨東中國海，勒浪長江入海口南岸。眼門前中國發展得頂快個城市，也是經濟頂發達個城市之一，伊撥認為是中國個商業搭金融中心，是全世界公認個全中國頂大個城市。2005年上海年貨輸送量有得4.43億噸介多。2006年成為世界高頭第三大集裝箱港口，輸送量有得2171萬標準集裝箱，齊巧勒仔新加坡高香港個後頭。2006年上海個人均GDP已經達到了7490美元，是中國大陸地區個第一位。2010年，世界博覽會勒上海舉行。

行政區劃

2005年年底，上海有18個區、1個縣，118個鎮，3個鄉，100個街道辦事處，3293個居民委員會搭仔1991個村民委員會。

2009年5月6日上海市政府勒給新聞發佈會浪宣佈，國務院已批復了上海關於浦東擴區的申請，同意撤除南匯區，將南匯區行政區域併入浦東新區。

上海行政區劃

歷史

上海地區，蘇州河以南於西元751年（唐明皇天寶十年）拿嘉興東半邊、海鹽北面、昆山南邊從原來個地方拆開來，重新設華亭縣。1277年（元朝至元十四年）拿華亭縣升級為華亭府，第二年改叫松江府。到滿清人個辰光松江府轄有華亭、婁、上海、青浦、金山、奉賢、南匯7只縣搭川沙撫民廳。蘇州河以北於1218年1月7日（南宋嘉定十年十二月初九日）設嘉定縣，後頭又從當中分出一部分作為寶山縣。上海市區原先是蘇州河下游個一隻漁村，至唐宋逐漸成為繁榮個港口。南宋辰光（1265-1274年）建上海鎮，因了許黃浦江西個上海浦得名。國民黨個辰光於1927年設立上海特別市，1930年5月改稱上海市。

1840年以後，上海老早是畀逼勒許開放個港口。結果來了交關外國人，勒浪上海開租界。渠拉有自家個法律搭仔行政機構。還有交關猶太人逃到此地，勒浪上海開店鋪，扒仔木老老鈔票，變成功富翁，還勒浪上海造仔交關多個房子。哈同、沙遜就是其中鼎鼎有名個猶太人。1949年以後，伊拉儕跑脫哉。

方言

上海閒話,一般指上海個市區裡廂個閒話,屬於吳語太湖片個蘇滬嘉小片（也有得另外一種講法，就是上海市區閒話應該從蘇滬嘉小片當中獨立出來），也有眼人拿上海言話叫作“滬語”。搿個講法雖然行情行市的人勒許用,但是弗是最準確個.上海閒話屬於吳語迭一點是邪氣肯定個,尤其搿一腔吳語個地位受到城市化搭仔普通閒話個威脅,各地吳語更加應該團結起來,加強吳語個認同意識,保護伲個語言.

上海閒話個歷史

上海老早屬松江府，曾隸屬嘉興轄下頭，語言也以嘉興閒話為主。松江府成立之後，松江地區閒話勒嘉興閒話個基礎上獨立發展，形成吳語中發展相對滯後個松江閒話。根據老早《松江府志》個記載：明代是“府城視上海為輕，視嘉興為重”個。而到清朝變成功“府城視上海為輕，視蘇州為重”。蘇州閒話因其權威性搭之邪氣豐富個文學形式（吳語小說、傳奇、彈詞搭民歌等）對上海話也有過交關重要個影響。

上海開埠後移民行情行市個湧入，各路移民個屋裡廂個閒話對上海閒話個形成造成了一番影響，特別是寧波話閒話。因為寧波人數量大、搭之有社會地位，現在上海話個第一人稱複數“阿拉”就是從寧波閒話伊面搭來個.。搿形成以上海本地閒話（松江閒話）為主，多種吳語方言（蘇州、寧波閒話為主）個共存、混雜搭融合的新上海閒話。新上海閒話繼承了老上海話個基本特色，有北部吳語個主流特徵，一記頭成之太湖片吳語區發展頂快的方言，也替代傳統個蘇州閒話成之為最有影響力的吳語方言，搭蘇州話一道成之當代吳語個代表方言。

解放前頭個30年代真真叫之上海言話個黃金期間。出現了交關吳語文學作品、其中大多數是張愛玲迭個上海本土作家創作出來個。伊個辰光個上海人發明了交關新個漢語詞彙，搿一批詞語有從英文來個,譬如講"水門汀"(cement),又從廣東閒話來個,譬如講"夯麼啷當",當然,也有一大批上海人自家發明個詞彙.撥拉普通言話吸收得去了。當時個上海，上海言話是絕對個主流，弗管啥地方個外地人儕要學上海言話個，就算是外國人也勒該學。上海個交通大學^{需要資料證明}，也是用上海言話來授課個，像聖約翰大學、同濟醫學院搿鼐。

解放以後，全中國開始推廣普通言話。別過上海人還是歡喜講自家個上海言話，上海人勒勒上海是老少講普通言話個。伊個辰光全國實行老嚴格個戶口制度，外地人移民到上海個是邪氣少。搿能之就算政府勒勒強行推廣普通言話，上海言話登勒上海還是相當個強勢個。

上海閒話個現狀

九十年代浦東開發以後，外地人搭仔鄉下人開始源源不斷個到之上海來。幫解放前頭個移民潮弗一樣個是，搿趟子個移民是來自全國弗同個地方個，是弗會,也弗願意得講吳語個。再加上上海人經過學堂裡個強行教育，儕會得講一口嘮流利個普通言話，葛嘮新個上海人搭之老個上海人開始用普通言話交流了。辰光一長，勒了上海個交關公共場合就只聽得到普通言話了，上海言話講個人已經越來越少了。同時，政府推廣普通言話個立升是邪氣嚇人。學堂裡個老師弗好講上海言話，學生子勒勒課間休息個辰光也勿好講上海言話，電視臺個上海言話節目撥拉紛紛取消，交關老優秀個上海言話電視劇也弗撥拉放，廣播台個上海言話節目也撥關脫了，吳語個報刊雜誌就更加嘸沒哉。個搿能仔一來，上海言話已經到了要受保護個田地了。

進入廿一世紀以來，上海出現了一批本土學者，伊拉對於上海言話個逐漸消亡是邪氣擔心。紛紛提出保護、傳承上海言話個方案幫仔行動。眼門前，上海言話已經撥拉越來越多個上海人所重視了。交關年輕個上海小人又發明了邪氣多個新詞彙，上海言話正勒勒復興個過程當中。上海言話搭仔其他吳語地區個方言個融合也了拉慢慢交進行。

現代個上海年輕人使用上海話聊天也是司空見慣。至今，上海人還是喜歡使用當地語言，但也讓老多外地人感覺到上海人排外個心理，但實際上搿是上海市民保護老祖宗遺留下來個口頭遺產個最好個形式

語音

上海閒話內部有分歧，主要以年齡區別老派、中派搭之新派。

老派：聲母27個，韻母51個，聲調6個（陰平、陰上、陰去、陽去、陰入、陽入） 中派：聲母28個（增加[ʑ]），韻母43個，聲調5個（陰平、陰去、陽去、陰入、陽入） 新派：聲母28個，韻母32個，聲調5個（陰平、陰去、陽去、陰入、陽入） 下頭是關於語音的具體描寫以中派上海閒話為基礎。

聲母

搭多數吳語方言一道，上海閒話有一整套個濁塞音、不送氣清塞音搭送氣清塞音個對立。而且，還有一套對立個清擦音和濁擦音。

參考中文維琪百科個表格[1]

韻母

中古漢語個[-m]韻尾搭 [-n]鼻韻尾嘞該上海閒話中合流變成功鼻化，並最後落脫之,一道併入了陰聲韻。一些中古漢語的[-ŋ]韻尾也變成了鼻化音。中古漢語個[-p -t -k] 勒上海話中已經都變成了喉塞音[-ʔ]。

了一些變體裡，[u]的發音實質郞是不圓唇的[ɯ]。

聲調

上海閒話音調向重音化方向演變，聲調從8只合併功成5只，實際郞只剩下來一隻降調（陰平）搭一隻平升調，變得邪氣簡單。搿讓上海人讀聲調個辰光，自由個變體可以相當寬泛，譬如講降調調值讀成功“53”、“51”、“552”儕不影響聽感，平升調讀成平降升調也不會影響理解。語音搭詞彙語法詞雙音節連調成之主流後，上海閒話在吳語中最快進化到“延伸式”連調，後字都失去了獨立的聲調而弱化粘著，重又向屈折語變化。

眼門前，上海閒話語個流當中，相對穩定個音位有兩種，一種是聲母，一種是前字聲調，這兩中為主的音位對上海閒話語音嘞嘞起著重要個穩定作用。（錢乃榮《上海語言發展史》）

由於人口融合帶來的快速蛻變，加郞中、新派語音越來越受到普通閒話個影響，音節搭聲調儕趨於簡化，已經越來越失去吳語的代表性及特性。所以講,某種程度郞廂上海話已成為一種“有聲沒調”，只有音高重音個獨特漢語方言。

文化教育

上海老早是全中國頭一個接觸外國人個場化。葛咾交關英文單詞儕是以上海個發音來音譯個。譬方講，水門汀、席夢思咾啥。不過現在上海已經嘸無搿能界個機會哉。外加現在上海交關小人講上海言話已經勿大靈光哉。

解放前，上海個電影是全中國頭一位。1949年以後，上海勒浪文化方面逐漸失去著伊個領先地位。但是，伊獨特個海派文化始終搭仔京派文化屬於兩種不同個中國文化，上海個海派文化始終是一種真正個傳統搭仔外來文化最好個融合，也是國際上承認個一種高雅個中國文化。文化大革命前頭，上海曾經拍過勿少根據滑稽戲改編個電影，譬方講，1963年個《如此爹娘》搭《七十二家房客》，搿眼電影用個語言包括交關勿同場化個吳語方言搭仔帶山東腔、江北腔還有廣東腔個上海言話，舞臺劇味道邪氣濃。九十年代，上海自家拍仔一部完全用上海言話講個電視劇，是描寫都市生活個正劇，叫《孽債》，幾化討人歡喜，不過後首來重播個辰光撥改成功普通言話哉。接下來上海還拍仔一部用上海言話講個正劇叫《何須再回首》，搿趟朆通過審查，乃末勿來事於是呼改成功普通言話播出。現在上海螢屏高頭個上海話節目只有號稱地方曲藝滑稽戲個情景喜劇，比如講《老娘舅》搭仔《開心公寓》。節目個品質整體浪來講，水準弗高，內容庸俗，低級趣味，頂重要個是交關辰光一眼也勿好笑。滑稽節目口碑勿佳，不過收視率倒是老高個，側面反映了上海人對滬語節目個需求。上海人要求中央政府放寬對方言影視作品管制個呼聲也勿低。

上海老裡八早個廣播電臺是有上海言話個廣播個。必過現在已經嘸無啥哉。東方廣播電臺有一檔《阿拉上海人》個節目，部分內容是用上海言話播出個，交關受聽眾歡迎。兩個主持人沈蕾搭曉林儕老贊個。現在每個禮拜下半天五點鐘望裡，上海人民廣播電臺戲劇曲藝頻率有一檔叫《笑笑樂翻天》個節目，專門播放點老滑稽。有興趣個聽眾也好去聽聽看。

上海個教育事業邪氣發達。有勿少全國一流個大學。譬如1949年以前個國立交通大學、國立同濟大學、聖約翰大學、震旦大學咾啥。而且搿歇辰光個交通大學全世界高頭也好數數個。解放以後到現在，比較有名個大學有上海交通大學、復旦大學、同濟大學。

經濟

上海個經濟是老發達個。1949年以前，就是全中國頂結棍個。現在原舊是中國經濟個龍頭。股市房產，至今仁為上海主要投資方向。

交通

往莘莊個上海軌道交通一號線已經在人民廣場站到達。

城市交通

上海個交通也勒海發生交關大個變化。搿辰光個上海已經有得12條地鐵哉，已經是全中國排名第一個勒，遠遠超股北京搭仔其他城市。勒浪龍陽路地鐵站邊浪向還有磁懸浮火車，去浦東國際機場需要8分鐘辰光。必過呢上海個地面交通交關軋，想開車子去上班或者白相是勿大來三個。

上海的巴士四通八達，指示牌、報站清晰，高峰時期5分鐘間隔。效率頗高。上海額公車一般性都有的英文報站，外國朋友了還此地白相乘公車阿弗會的有啥困難個。

全面細緻個城市交通軌道,請望：http://www.myliving.cn/metro/index.htm

航班

上海是全國唯一擁有兩個國際機場的城市，一只是虹橋機場，一只是浦東機場。浦東機場比起虹橋來講是新造個，各種物事儕老好個，也是上海個標誌之一。

鐵路交通

上海來拉1987年以前，一直是使用天目路伊面個老北站，後首來由於老北站人忒多了，所以來許現在個位置造了新個上海站。普通市民歡喜叫渠新客站，來搭老北站區別開來。2007年，又建成功上海南站。

外部連結

• 上海市政府網站