变调

變調是一部份有聲調个語言裡普遍存在个一種音變現象。

照一般性講法，中文語境裡个「變調」一隻詞好包括交關閒話裡向，因為各種勿同个因素，一個字或者詞伊原本个聲調發生變化个一種情況。會得影響咾造成變調个因頭有得交交關在許（laq-he）；箇末（keq-meq）伊還可以再細分，分類成為別个再詳細个類型來處理。各式類型个變調現象垃拉全世界有聲調个閒話裡儕邪氣普遍，樣式多，用場也多。伊常樁勿光影響到調頭高咾低咾，幫交關別樣語音咾語法个現象也會得互相影響，來各式語言裡演化出豐富多彩个品相。

變調个種類

中文環境裡所講个「變調」箇概念，一般性是勿怪哪能牽涉到音調變化垃許，就好稱為叫變調哉。但不過勿同情況下頭音調个變法木老老末呀，自然是勿好雜佮倫登只算伊一樣物事；箇裡向也牽涉到勿同語言大家用詞裡向个一眼小推扳。

一種大个分法是拿「變調」分成連讀變調 (英文：tone sandhi) 交詞彙變調 (英文：(morphological) tone change)。

連讀變調也好叫連續變調。伊是為仔詞語咾語素結合个順序、結構啦，導致伊各个音節調值變化脫个一種現象。英文个術語通常喊伊叫連音 (英文：sandhi) 裡向个一種，是借仔梵文「拼攏來、混一道」箇意思个詞根 (梵文：संधि, saṃdhí)，歸結成梵文裡个連音一能介，一種「成份結合」導致个音變。

詞彙變調或者語素變調 (morphological tone change) 包括各種各樣只有垃拉特定个詞語裡變化个音調，勿屬於連讀變調个範圍。英文語境下頭，可以籠統點拿所有勿算連讀變調个調形變化儕稱為所謂「普通」个變調 (tone change)。不過因為箇眼變調通常搭構詞儕有眼搭界，所以通常可以再看看伊背後頭个功能搭道理，再根據伊具體个類型來稱呼。

某點語言習慣性个理論分析裡，對特定種類个詞彙變調也會得有眼自家系統性个叫法咾分法。譬如講廣東閒話个「變音」或者一部份南部吳語裡个「小稱調」，儕是一種變調幫特定个功能、形態交意義範疇互相搭界个表現。

變調語言舉例

吳語

吳語裡个變調現象相當豐富，也相當複雜。

吳語个連讀變調系統

吳語語系裡个多數閒話儕有一套比較完整个連讀變調系統。

小稱調

一部份南部吳語裡个小稱現象會得順埭演變出來一種語素變調个現象，學術界裡普遍稱為「小稱調」。在拉（laq-la(q)）譬如金華、湯溪、龍游、慶元、文成交溫州个閒話裡向，儕有學者調查得來有各種各樣个小稱調類型。

閩語

表示臺語裡變調規律个一幅圖。

閩南語个連讀變調系統也老完善个。

研究問題

連讀變調垃垃語言學裡是一個大問題。連讀變調箇隻現象，本生也講大勿出伊有勿有啥老明顯个語音學上个道理，外加各地个連讀調類型還介勿一樣咾，現在階段到底哪能拿伊解釋法子還蠻難講个。

一部份研究倒發覺要想解釋連讀變調，可能還要綜合歷史角度上來看，拿共時因素一淘考慮進去。