高桥公园

高桥公园勒拉中国上海市浦东新区高桥镇浪，占地面积69.9亩（4.35公顷），有口0.21公顷大个湖，叫碧潋湖。湖西岸有座两层楼混合结构个茶楼，东立面样子赛过隻游艇，建筑面积314平方米，楼後头是一片桂花林。湖北面有座叫清溪桥个仿古石拱桥。公园中部有座亭子，叫临江亭，下头原先是民国个辰光修个混凝土碉堡，经过加土成坡，勒垃一顶浪向造仔迭隻仿古六角亭，因为高桥宋代个辰光是临江乡下头个，故咾叫伊“临江亭”。1985年12月份，高桥镇人民政府上报高桥公园计划任务书，1986年2月份，川沙县计划委员会批准箇隻公园立项，总投资250多万元。1988年5月（貤有讲是1989年个）开工建设，1990年6月1号伊造好开放。2024年2月份拿围墙拆脱，24小时对外开放。