高昌庙
高昌庙是上海历史浪个寺庙，也是上海历史上一只地名。江南制造局附近叫高昌庙，半淞园路搭仔高雄路原名高昌庙路，侪是因为箇座高昌庙。[1]
高昌庙本来是立学庵，南宋辰光造个，後來伊变成功高昌乡个土地庙，明代改名为高昌庙，又叫高昌司徒庙，北高昌庙[2]。清朝咸丰十年（1860年)太平军东征个辰光，高昌庙曾畀清廷征来当洋枪队个兵营，庙也拉箇個辰光被破坏脱，僧品涵拿庙迁到浦东六里桥，改名立雪庵。同治五年（1866），慧朱重造高昌庙，占地约1亩，是临济宗寺庙，后来尼姑住拉迭埭[2][3]。
光绪五年（1879），江南机器制造总局扩建，高昌庙被征地征脱。江南制造局总办李兴锐拿高昌庙搬到江南机器制造总局西北。光绪十五年（1889)，高昌庙个尼姑又建座庙，叫伊老高昌庙[3]。江南制造局搬过去隻庙叫伊新高昌庙[3]。宣统元年（1909），新高昌庙划畀江南制造局管理。两座庙侪勒拉今朝个制造局路、龙华东路、高雄路交汇处，边丄有上海南站，逐渐形成工业集聚[4]。上海光復个辰光，为咾打箇個江南制造局，新高昌庙被炸脱。中华人民共和国成立以后，勒拉制造局路749号个老高昌庙改为公益塑料厂[2]。