雷士德工学院

雷士德工学院

雷士德工学院（英语：The Lester School and Henry Lester Institute of Technical Education），1930年代到1940年代勒拉上海个一所土木工程类私立大学，名字用个是英国旅沪建筑师、地产商、慈善家亨利·雷士德个名字。伊1934年开始办学个，弗开设帮宗教相关个任何课程，并规定主要生源是华人学生。1942年底，学堂畀日本人接管，名字改成功东亚工业学院，1944年个辰光，箇块地畀日本海军抢脱，学堂正式停办。

2022年1月4号，雷士德工学院箇块地啟動修缮，7月完工，9月投入运营。2023年12月8号，雷士德工学院旧址保护修缮工程入选第四届“上海市建筑遗产保护利用示范项目”。

建筑风格

1932年，上海发生一·二八事變，畀日本人个飞机炸唻人力财力侪出现弗小损失，孙中山提出个“航空救国”思想又畀国人翻出来。雷士德工学院拿主体建筑设计成一架面向东北张开翼梢飞个战斗机，有学习好工科，造出飞机，打脱日本，收復东北个意思。主体建筑占地10000多平方米，建筑面积19900平方米，是钢筋混凝土结构。建筑中间五层楼高，两面阶梯状，逐步降到四层搭三层。建筑细节部分搭窗前多用科学仪器、机械图案做装饰，显示出工学院个本质。

内部装修方面，主楼校舍装饰精美，房屋内部装修考究，装有暖气设备搭仔专供教职人员用个电梯。大楼还有各种实践工场搭仔实验室，机器齐备侪是新款。弗少国际性学术会议也会得借伊拉宽敞个大礼堂开会。

雷士德工学院个整体建筑由上海建筑设计事务所德和洋行负责设计，设计师是E.F.鲍斯惠尔（E. F. Bothwell），设计风格是英国哥特式搭仔装饰艺术个融合。1994年，雷士德工学院旧址畀评为第二批上海市优秀历史建筑。

影响

校友会

1985年2月17号，雷士德工学院校友会来勒上海市民政局社会团体管理处进行登记，2001年成为上海市宁波经济建设促进协会个团体会员，由上海市教育委员会领导。校友会初创个辰光由鲁平、梁于藩、陈铭珊、曹文锦、叶元章、钱嘉栋担任名誉会长，唐翔千做名誉顾问，目的是团结国内外校友，调动积极因素，每2年举行一次年会，每季度出版会刊《雷友通讯》。 2004年10月份，上海市历史博物馆借校友会召开年会，来勒雷士德工学院原址个上海海员医院举办庆祝建校70周年展览会。毕竟雷士德工学院来勒1945年畀日本人关脱，是停办个大学个校友会，每年侪有老校友病故，校友存世个越来越少。

雷士德基金会

雷士德基金会乃朝总部搬去英国伦敦，1975年开始助学计划正式运作。资助对象是留学英国，来勒大学或研究机构从事建筑学、医药学、计算机发展、机械科学领域个研究生或更高水平学习个中华人民共和国公民，对申请人还有学成以後要回到中国，拿所学着个物事贡献畀国家人民等要求。