虹镇老街

虹镇老街是中国上海市虹口区东北一块地方，勒拉新港路、东沙虹港路、临平路、虹镇老街四条路圈起来个地方，占地面积约90万平方米，名字来自箇条长700米个同名道路“虹镇老街”。虹镇老街曾经是上海市区顶顶大个棚户区。2019年2月份，虹镇老街旧区改造完成，原先憕拉棚户区个居民侪搬到别个地方去。现在，虹镇老街有国际级综合性社区瑞虹新城搭仔55万平方米个商业综合体瑞虹天地。

同名个路

虹镇老街箇条马路长700米，清朝初年出现个。1958年，跟马路贴壁个一条河浜填埋脱，拓宽虹镇老街。

历史

虹镇老街箇块地方勒拉元朝以前是虬江，後些来慢慢交淤成沙洲。清朝，箇埭叫虹安镇。20世纪初，箇埭叫闸北虹镇，20世纪20年代出現虹镇、虹镇北街、虹镇老街等叫法。

1945年到1950年，交交关关江浙移民搬到虹镇老街，用稻草泥咾啥个搭棚户，形成功大规模个棚户区，有超过1.38万户人家曾住拉箇埭。1953年秋天，飞虹路大火，烧脱1000余间棚户，重建个辰光造仔砖木结构个房子。20世纪70年代，虹镇老街接通自来水管。

1995年10月开始，虹口区政府同瑞安房地产公司一道对虹镇老街进行旧区改造，陆续建出瑞虹新城1-7期。1998年，新造好个瑞虹新城开始交付。2012年，计划增加一個叫瑞虹天地个商业综合体。2015年搭仔2017年，瑞虹天地里向陆续开张以亲自体验为主个“星星堂”搭仔音乐娱乐为主个“月亮湾”等商业中心。2018年8月9号，虹镇老街阿末只棚户区虹口区122街坊成功征收。2019年2月28号，虹镇老街7号地块A块阿末1证居民自行搬家交房，虹镇老街地区旧改彻底完成。2021年9月19号，商业设施瑞虹天地太阳宫开张。