福喜事件

福喜事件，指个是勒拉2014年7月20号媒体发现并报导个，福喜集团勒拉中国上海个子公司（上海福喜食品有限公司）向麦当劳、肯德基等饭店提供过期原料个事体。箇桩事体导致上海福喜食品有限公司畀政府查封脱。2016年2月1号，上海市嘉定区人民法院一审宣判，10名被告人全部畀判一年零七个月到三年弗等个有期徒刑。10月3号，上海市食品药品监督管理局证实，上海福喜食品有限公司搭仔欧喜投资（中国）有限公司拢总畀罚款2428.5万元人民币。

经过

2014年7月20号，上海电视台新闻综合频道搭仔东方卫视报道上海福喜公司向麦当劳搭仔肯德基提供过期原料个事体。电视台讲，根据公司个生产计划，原料解冻间当天要用18吨个麦乐鸡原料，当中有交交关关过期脱毛半個号头个鸡皮搭仔鸡胸肉。绞肉机拿过期个原料绞唻粉粉碎，裹上三层浆粉，高温油炸就做出来麦乐鸡哉。为咾加强对供应商个管理，每隔一段辰光，麦当劳等客户侪会得上门参观检查。记者发现，每趟检查前一天，上海福喜个质量把控部门侪会得发邮件通知生产单位，让伊拉检查当天各条生产线浪“不能有次品”。工人表示，万一让客户们晓得伊拉个过期原材料，订单会得畀取消脱。2014年6月10号，上海福喜各部门个主管侪收到箇能样子个一封邮件，要求“物料延长保质期至本周末，明天安排生产”。迷你小牛排每天要用5吨个肉，现场个工人直接讲个，伊拉只肉侪臭个，已经过期脱能超过7個多号头哉。另外，箇些产品个生产数据侪自家改过啦。箇些过期个原材料还畀优先安排供应中国市场。

曝光以后，食药监、公安、媒体等全部拥到上海福喜。最早到个食药监部门夜到头七点多就到哉，畀保安拦牢毛一個钟头。夜到头11点钟，上海市食药监部门表示，伊拉已经查封箇家企业。

7月21号，全国各地食品药品监督管理局组织力量，对相关个洋快餐品牌个供货渠道进行检查，要求所有个问题产品全部下架，部分麦当劳门店罪过咾咾个只好卖薯条搭仔鱼柳。同一天中午，调查人员约谈福喜工厂相关负责人。工厂质量部经理表示，用过期原料箇桩事体是高层直接授意个。

7月22号，上海市食药监局表示，上海福喜公司涉嫌有组织实施违法生产经营食品行为，相关责任人已经畀控制，伊个辰光有5家头畀刑拘。广东省食品药品监管部门对广州福喜公司检查，发现箇家公司呒没肉制品加工，河北廊坊市大厂县个福喜公司正常生产，卫生查唻更加严格。

8月3号，上海市副市长、上海市公安局局长白少康勒拉上海人民广播电台《市民与社会》节目里向讲，上海福喜食品公司又有高管畀抓牢，目前已刑拘6個高管。

8月27号，国家食品药品监督管理总局副局长滕佳材表示，福喜事件箇桩事体会得向社会公布最终结果个。8月29号，上海福喜食品有限公司高管胡骏等6家头因涉嫌生产、销售伪劣产品罪畀上海市人民检察院第二分院依法批准逮捕。

2015年9月30号，上海市人民检察院宣布，上海福喜食品有限公司、河北福喜食品有限公司相关负责人杨立群等10名被告人，涉嫌生产、销售伪劣产品罪，上海市嘉定区人民检察院向嘉定区人民法院对伊拉提起公诉。

2016年2月1号，上海市嘉定区人民法院一审宣判，10名被告人犯生产、销售伪劣产品罪，畀判一年零七个月到三年弗等个有期徒刑，并判上海福喜、河北福喜两家公司罚金人民币120万元。当中杨立群（澳大利亚籍）畀判有期徒刑3年，处罚金人民币10万元，驱逐出境；挺下来9家头畀判一年七个月到二年八个月弗等，罚金3万到8万元弗等。箇当中有4家头适用缓刑。10個人侪上诉。2016年7月1号，上海市第三中级人民法院对上海福喜食品有限公司、河北福喜食品有限公司犯生产、销售伪劣产品罪作出二审终审判决，维持原判。10月3号，上海市食品药品监督管理局证实，上海福喜食品有限公司搭仔欧喜投资（中国）有限公司拢总畀罚款2428.5万元人民币，吊销並注销相关食品生产许可证，排拉上海食品严重违法失信黑名单里向。