石头城

南京石头城

石头城，是江苏省南京市个一个古代遗址，位置来勒清凉山附近。南京个别称“石头城”、“石城”就搭迭个古城有邪气大个关系。

历史

战国辰光，楚威王拿越国来勒钱塘江以北个势力吞并，到现在个清凉山附近，让伊个军队修造堡垒。有传说讲，当年楚国人看到此地有王气，所以埋金来镇，所以，此地又叫做“金陵邑”。个辰光，此城下临长江，地势陡峭。212年，吴越豪杰孙权来勒金陵邑个基础浪，修造建筑要塞，并且拿此地命名叫“石头城”，个辰光，城墙是夯土个，全长有“七里一百步”，东有二门，南有一门，西面因为临江峭壁，所以没门，从此之后，此地就是长江旁边个要塞，直接控制秦淮河入江河口，也是之后南朝首都建康城西面个关卡。所以，石头城成为六朝辰光个必争之地，有交关、战争搭人物侪搭石头城有着紧密个关系。隋朝灭陈、毁脱建康城之后，来勒石头城设置蒋州，到唐朝初年，来勒石头城设扬州大都督府，所以，石头城是隋朝搭初唐辰光南京地区个中心。之后，因为长江流向慢慢较往西移动，石头城个战略地位失去，到唐朝中期，已基本废脱。五代十国辰光，杨吴重建金陵城，弗过，没重修石头城。朱元璋强迫老百姓修造南京城个辰光，石头城被伊强行筑入南京城墙个西部。

遗存

石头城被废脱之后，遗迹也慢慢消失，有老百姓传讲清凉山浪个“鬼脸城”是老早石头城个遗物。鬼脸城是明城墙个一个城头，有一块邪气像鬼脸个红色砾岩，搭城下水塘构成金陵四十八景之一个“鬼脸照镜”。1982年此地成为江苏省文物保护单位，1988年，被当做“南京城墙”个一部分，认定为第三批全国重点文物保护单位。

从2009年开始，南京大学搭南京市博物馆来勒清凉山附近开始考古调查，到2011年，来勒石头城发现交关砖砌城墙遗址，可以笃定个认定石头城个位置是来勒现在个清凉山、国防园、菠萝山、红土山一带，周长有3000米左右，搭史料记载差弗多。