百代公司旧址
百代公司旧址（英语：Former Site of Pathé），又叫百代小红楼、百代小楼或者中唱小红楼，后来变成功中国唱片厂，勒拉上海徐汇区衡山路浪，徐家汇公园里向。箇栋三层楼高个红房子是民国十年个辰光造个，老法头是东方百代唱片公司录音个地方[1]。历史浪，周璇、姚莉、李香兰等有名气个歌星侪勒拉此里录制唱片，而中华人民共和国国歌《义勇军进行曲》搭仔《夜来香》等华语歌坛邪气出名个歌侪勒拉箇埭创作出来个。2004年，百代公司旧址入选第四批上海市优秀历史建筑。
房子特色
[编辑]房子是砖木结构个，红颜色曲面坡个屋顶，开仔老虎窗，屋檐出挑，檐下头有斜向个木头撑拉。外墙立面是清水红砖搭仔白色粉刷。二楼有阳台，底层有敞廊，用个是爱奥尼式双柱，白颜色混凝土宝瓶栏杆，有常春藤石瓶做装饰[1]。门窗黑颜色个，是地中海式，又狭又深。
底楼是录音搭仔接待歌手个客堂间，二楼是编辑办公室，三楼是百代公司老板个起居室。伊个辰光，小红楼里向录音棚有特制个双层墙隔音搭仔好活动个墙面，混响效果国内最好[1]。