白洋淀足球场

白洋淀足球场，2008年11月26号更名成杨浦区青少年业余足球学校，勒拉上海市杨浦区定海路街道周家嘴路4214弄22号，是杨浦区体育局个专门培养足球后备人才个基地。伊拥有3片标准足球场，造有800多平方米个运动员宿舍，1200平方米个室内训练房搭仔200平方米个健身房。

历史

白洋淀本来是大宅搭仔沈家桥两個自然村个农田，部分是坟地。民国10年（1921年），日商勒拉箇埭造公大纱厂个辰光，伊拉越界挖地取土，拿地基填高，拿箇块土地挖成品字形个三只大坑，平均深度勒拉3米左右，最深处达到6～7米，日脚久仔么积水形成3只大水凼，俗称白洋淀，亦有叫大水潭、白洋潭个。1954年1月份，上海市工务局园场管理处征地10.91万平方米，1955年5月份个辰光勒拉箇埭造了只沪东大水潭苗圃，育苗搭仔繁殖草皮。

1956年1月，上海市人民委员会拿伊南部个主要水面搭仔边浪约6.1万平方米土地拨畀上海市体育运动委员会做划船个场地。同年8月份，又转交畀杨浦区体育运动委员会，做杨浦区划船运动站。1957年3月份，杨浦区人民委员会、上海市城市规划建筑管理局、上海市园林处会商决定拿箇埭本生个土地拨畀上海市园林管理处，造只划船活动为主个公园。1959年，白洋淀公园开工，征脱近平凉路4700平方米个土地搭仔大水潭两面1.4万平方米个地。1962年上半年，白洋淀公园正式造好开放，面积12.8万平方米，当中水面积约5万平方米。同年8月18号，白洋淀公园因为勒拉水凼里向，经常性积水，再加上呒没经费，关脱。

1964年，改造成白洋淀天然游泳场；1972年，因水质呒没办法进行调节而停止开放。1980年，改造成占地面积3.7万平方米个白洋淀足球场，开仔3片大型足球场，高头还养草皮。1982年，杨浦区足球学校搬进白洋淀足球场。1984年，增设房间、更衣室、浴室、食堂。