田文镜

田文鏡（1662年-1733年），雍正辰光个大臣。原来是汉军正蓝旗，后头因为得到主子个赏识，被抬到正黄旗。是雍正辰光顶得到赞赏个大臣之一。

生平

田文鏡，字抑光，监生出身，康熙廿二年（1683年）成为淹州縣官、福建昌乐县丞，康熙末年，调到北京，成为出入紫禁城个侍讀學士。

雍正元年（1723年），出任山西布政使，因为伊有办事能力，让官场效率变快，得到雍正个赞许，大皇帝评价伊「忠誠體國，公正廉明」。

雍正二年（1724年）成为河南布政使，同年，官运恒通，做到河南巡抚。雍正五年（1727年）七月升任河南总督，雍正六年（1728年）十月成为河南山東总督，同时管理两个帝国中央个行省；田做事体效率高，同时刁鑽刻薄，是典型个对主子忠诚，对下手凶横个一类人。来勒治理地方当中，用严酷个手段打击盗贼，让自家管辖范围内个偷盗现象短期消失。同时，伊还督責各地州县清理賦收，拿皇帝开垦做农田，并且规定邪气严格个期限。各地稍有怠慢，就立即被伊懲罰，伊手下头个官僚来勒搭伊碰头辰光，没啥人个眼乌子敢东张西望。雍正称伊为“模範疆吏”。

李岳瑞《春冰室野乘》里向写到，田文鏡个幕客鄔思道，为田文鏡寫密褶參劾隆科多而「寵遇日隆」。后来，田鄔二人以事齟齬，鄔憤而辭去。「自此文鏡奏事，輒不當上意，數被譴責」。田只好重金聘回鄔思道。雍正八年，田文镜又兼任北河总督。雍正八年，河南水災，民不聊生，伊卻匿報“今年河南被水，州县收成不等，实未成灾”，“民間家給人足”，最後以“年老多病，为属吏欺诳”，勒令退休。雍正十年（1733年）十一月二十一日，生毛病，来勒河南死脱，屋里没有多余财产。谥端肃。令河南省立专祠祭祀。乾隆辰光，尚书史貽直、河南巡抚雅尔图等奏称“河南民怨，田文镜不当入河南贤良祠”等，不許。著有《抚豫宣化录》、《钦颁圣谕条例事宜》。

评价

田作为满洲帝国个忠诚、能吏、一直受到大皇帝个表扬，雍正顶欣賞李卫、鄂尔泰、田文鏡三人，曾经搭兩江總督尹继善，要伊认真向迭三个人学习。尹繼善回报：「李衛，臣學其勇，不學其粗；田文鏡，臣學其勤，不學其刻；鄂爾泰，宜學處多，然臣亦不學其愎。」

參考書目

• 羅遠道：〈雍正時期田文鏡對河南的治理〉，《中國歷史博物館館刊》，8 期(1986年6月)，頁92-96。