王韬（思想家）

王韬照

王韬（1828年11月10号—1897年5月24号），初名王利宾，字兰瀛；十八岁个辰光县考第一，改名王瀚，字懒今、紫诠、兰卿，号仲弢、天南遁叟、甫里逸民、淞北逸民、欧西富公、弢园老民、蘅华馆主、玉鲍生、尊闻阁王，外号“长毛状元”，苏州城外长洲人，是晚清辰光，吴越地区个一个维新文人，写过交关洋务运动个材料，对迭个辰光个洋务运动有一定个影响。伊老早参加科举，弗过落榜；因为搭太平天国缠在拉一淘过歇，个咾后手来逃到香港；再朝后还到仔欧洲巡游过，积累仔交关丰富个见闻。乃么伊根据见闻，写成功仔《漫游随录图记》，是晚清欧陆见闻个代表作品。

生平

清道光八年十月四号（1828年11月10号）生勒苏州府长洲县甫里村（难朝江苏省苏州市吴中区甪直镇）。王韬小个辰光蹲勒甫里：“余少居甫里，莫有知余者”。王韬五岁个辰光，陈墓镇出身个娘朱氏教渠启蒙识字。渠拉爷王昌桂（字肯堂）是乡村私塾先生，王韬跟牢父亲熟读四书五经，打好扎实个经学基础。少年王韬空个辰光常庄到甫里街丄唐代诗人陆龟蒙留下个斗鸭池赏荷花，或者到明代梅花别墅探梅，顶欢喜勒太阳要落山快个辰光，到保圣禅院听松，“有如千军万马声，又如千山落叶，万豁泉流”，毕生难忘。四十多年之后，王韬勒1882年，1885年，1887年三趟回到老屋，全要到保圣禅院孛相，还对对搭渠一淘个朋友淘拉讲少年个辰光勒垃保圣禅院听松个故事。道光廿四年（1845年），王韬到昆山应县考，考中秀才。道光廿七年（1846年）到金陵应考，不第。