戲作

出自维基百科,自由个百科全书

戲作げさく、ぎさく、けさく、きさく)是日本近世後期也就是18世紀後半開始在江戶興起箇通俗小說咾排物事箇總稱。意思是戲而作之——寫來薄相、引人發噱箇物事。寫昰種作品箇人叫戲作者。

種類[编辑]

戲作大概好分成功灑落本滑稽本談義本人情本讀本草雙紙昰幾種。昰箇裏向,草雙紙照形態咾內容貤好再分成功赤本、青本、黑本、黃表紙搭合卷。

歷史[编辑]

「戲作」隻詞彙倒是漢語裏勢蠻早便有,日本在江戶時代前也用箇。後首來慢慢然變成功相對正統作品來話箇一種有眼打朋意思在裏向箇詞彙哉。

江戶時代箇戲作[编辑]

荻生徂徠等對當時辰光中國文學箇口語小說蠻有研究,在渠場箇影響下頭,有人開始寫讀本哉。一般認爲箇戲作之祖是《風流志道軒傳》箇作者平賀源內。另外,開初交關戲作者是武士階級,譬如大田南畝。卻情,因寬政改革,出版統制邪氣結棍,蓋咾戲作出現著低迷。後首來反倒出現著庶民戲作者式亭三馬十返舍一九點人,讀本、人情本搭合卷興盛起來。之後貤因天保改革,人情本衰退,而合卷流行起來。

明治時代箇戲作[编辑]

明治前期昰歇,滑稽箇內容像煞吸引力弗足著,職業戲作者一朞頭減到衹有假名垣魯文咾5個人。弗過,後首來因得政治箇關係,古典文藝復興,貤借著報紙連載鉛字印刷發展箇機會,明治10年橫裏,戲作重登舞臺。卻情,後首來箇坪內逍遙對戲作進行爻批判,認爲要讓日本文學近代化必須厾慝戲作箇寫作習慣。