朱進
.jpg)
朱進（1965年4月24號生），北京人，中國天文學家，現在做北京天文館館長。
生平
[编辑]朱進1965年4月24號養勒北京，籍貫陝西省藍田縣。1985年7月從北京師範大學天文系本科畢業，拿著學士學位。1991年7月從南京大學天文系拿著博士學位。1991年7月到2002年9月勒中國科學院北京天文台（後歇來名字改成功中國科學院國家天文台）工作，做助理研究員、副研究員、研究員，其中1992年5月到1994年4月是箇個單位博士後流動站博士後。2002年9月調到北京天文館做館長。[1]
學術成就
[编辑]朱進勒天文學浪向個主要成就是對小行星個研究，有蠻多成績。從1994年開始，朱進主持北京施密特CCD小行星研究項目，到2001年爲止，一塌刮子發現仔得著國際小行星中心暫定編號個小行星2728顆，裏向有1214顆已經得著仔永久編號搭命名權。1997年6月3號，朱進個項目還發現仔一顆彗星，後歇來畀起名字叫朱-巴拉姆彗星（Comet Zhu-Balam）。朱進自家還擔任國際天文聯合會小天體提名委員會委員。[2][3]
科學普及
[编辑]朱進窮關心天文科普事業，外加自家參與到裏向。交關趟勒垃北京天文館搭仔全國各地搞天文講座。勒廣播、電視等等媒體個訪談節目浪做天文科普活動。朱進還積極參與青少年個業餘天文活動。[4]
別個有勁事體
[编辑]朱進自家是天文學家，俚個言話裏向對占星學有明顯個否定態度。勒2011年6月19號下晝北京天文館辦個「占星搭天文個對話」活動，北京天文館館長朱進搭美國占星師大衛·瑞雷做仔關於天文搭占星個對話。朱進交關趟質疑大衛·瑞雷個占星理論。[5]對於占星學，朱進表示：
“
從天文學個角度浪講，行星個排列組合對我伲個生活是嘸不影響個，有人做仔相關統計，也朆發現會有啥個特別個影響。
”
——[6]
勒2006年8月舉辦個國際天文聯合會關於冥王星行星地位個決議浪，朱進投仔贊成票。[2]
參考資料
[编辑]- ↑ 朱 进 (简体中文). CCTV (2005-07-22).
- ↑ 2.0 2.1 北京天文馆馆长朱进：投了让冥王星下岗的票 (中文). 上海科技 (2006-08-21). 原始文档勒2015-05-17存档.
- ↑ Jin ZHU. 國際天文聯合會. 访问日脚2015-11-20.（英语）
- ↑ 北京天文馆馆长朱进 (简体中文). 北京师范大学新闻网 (2010-10-15). 原始文档勒2011-11-02存档.
- ↑ 北京天文馆举行“天文与占星的对话” (简体中文). 人民网 (2011-06-20). 原始文档勒2019-03-25存档.
- ↑ 占星和天文：兄弟还是敌人？ (简体中文). 科学新闻 (2011-08-08). 原始文档勒2011-10-16存档.