朱舜水
朱之瑜（1600年－1682年），字鲁玙，号舜水。吴越余姚人，17世纪东亚地区重要个思想家，文学家，史学家。明帝国个中央政府畀灭脱之后，伊参加反清复明活动，加入仔郑成功个机构，到越南、日本筹集援助。弗过，郑成功战败脱仔之后，伊就滞留在日本哉。伊歇辰光，到日本去个渡来人蛮多，朱之瑜因为儒学根基扎实，得到交关大名个青睐——水户藩也拿伊请到仔江户。伊个思想，对江户辰光日本个国学替本土主义影响邪气大。
生平
[编辑]家族
[编辑]姚江朱氏
[编辑]朱之瑜出身姚江朱氏。根据伊自家个讲法，迭个大家族个祖先，是宋帝国辰光个朱廷碧；到仔12世纪，迁移到余姚。传承六代之后，在拉宋帝国晚期辰光，有一个分支，搬到龙泉山， 并在拉龙泉山南麓创建“一本堂”宗祠，朱之瑜就是“一本堂”第十四世孙。
传到14世纪后半段，次子一系第六世有兄弟三人，分房立祠， 长兄大房仅传一世断脱。二房子孙繁衍，后又分出六个房头。 三房（仲文），即朱之瑜所属支系。
家庭成员
[编辑]朱之瑜个曾祖父朱诏，号守愚。祖父朱孔孟，号惠翁，生四子。 第四子朱正，号定寰，就是朱之瑜个爷。伊是万历三十一年（1603） 个举人，弗曾去当官。万历三十五年（1607），朱之瑜拉爷朱正生仔重病，故脱。
“仆不幸先父母久已厌世，同胞惟兄弟二人，形影相依尔。”（《朱 舜水集·书简六》）
朱之瑜有弟兄三个，大阿哥是朱启明（1590—1671），当过明帝国个总兵搭总督；朱之瑜是奶末头。明万历二十八年十月十二号（1660 年 11 月 17 日）申时，朱之瑜在拉余姚城内龙泉山北麓出生。
老婆搭小人
[编辑]朱之瑜十八岁辰光，娶叶氏女作为正妻，婚后第二年，万历四十六年(1618)，得到第一个儿子，取名大成。后手来又养了一个儿子，名叫朱大咸。叶氏后手来故脱，伊又讨陈氏当老婆。
青年辰光
[编辑]新松江人
[编辑]朱之瑜年轻辰光待teng1在老家，一直到伊廿岁辰光，跑到松江府，成为松江府个儒学生，获得类似秀才个身份。《松江县志》有写:“朱之瑜原籍浙江余姚，明万历四十七年客寓松江，入松江籍。”。
之所以年轻辰光个朱之瑜跑到松江府去定居，搭伊拉阿哥朱启明有直接关系。朱启明考中武进士之后，接受调派，到松江府个金山卫当武官，后手来，又以神武营总兵兼督漕运，常年驻扎在拉松江府。朱之瑜依附兄长，个咾有长达廿几年在拉松江生活个经历，好算是正宗个新松江人哉。
朱之瑜在拉松江个故居老早子畀毁脱哉。弗过，在拉乃朝松江方塔园当中，有一个伊个纪念馆，介绍伊在拉松江个求学经历。
科举弗顺
[编辑]朱舜水尽管长期钻营儒学，但科举个道路弗大顺当；一直到崇祯十一年(1638)，才得着学政欢喜，举荐伊为“文武全才第一”，以“恩贡生” 推荐到礼部。弗过，迭个辰光，伊已经对明帝国邪气失望，拒绝出来当官。1643年，伊又畀朱启明个朋友、总兵官方国安推荐作为监纪同知，但还是回头脱哉。
哪能得名舜水
[编辑]伊万年东渡日本后，自号舜水，取“舜水者敝邑之水名也”个意境，表示弗忘故国（吴越）故土之情。