拙政园

拙政园
苏州拙政园
全国重点文物保护单位 中华人民共和国国务院公布
所在	江苏省苏州市
坐标	31°19′28″N 120°37′48″E
分类	古建筑及历史纪念建筑物
时代	明、清
编号	1-121
登录	1961年

拙政园里向个船屋

拙政园，来勒苏州娄门内东北街178号，占地52000平方，是江南古典园林搭仔古代私家花园个代表。拙政园是中国有名个古典私家花园，明朝正德四年（公元1509年）由御史王献臣造个箇隻园林。1961年国务院拿伊排进首批全国重点文物保护单位，1997年伊跟其它几座园林一道畀联合国教科文组织（UNESCO）列进世界文化遗产當中。

拙政园占地面积78亩（52000平方米），是苏州园林里向现存顶大个一隻，分成功东、中、西三部分搭仔园林博物馆展厅。东部明快开朗，主要是平冈远山、松林草坪、竹坞曲水咾啥；中部是拙政园精华所在，池水面积占到三分之一——以水为主，池广树茂，景色自然。临水布置形体弗一、高低错落个建筑，主次分明；西部主体建筑是靠近住宅一面个卅六鸳鸯馆，水池呈曲尺形，特点是台馆分峙、回廊起伏；水波倒影，别有情趣，装饰交关华丽精美；主体建筑为靠近住宅一侧个卅六鸳鸯馆，乃朝是园林博物馆展厅，是典型个苏州民居。

历史

明朝正德四年（公元1509年），明朝弘治进士、御史王献臣弃官回到屋里向，来勒唐代陆龟蒙个宅地搭仔元代大弘寺旧址个地方造个。伊取晋代文学家潘岳来勒《闲居赋》里向写个“筑室种树，逍遥自得……灌园鬻蔬，以供朝夕之膳……此亦拙者之为政也”，拿箇隻园林起名叫拙政园。伊个辰光个拙政园，以水为主、疏朗平淡、接近自然风景，文徵明曾来勒嘉靖十二年（1533年）到此里画图三十一幅，每一幅边丄侪写一首诗，还写仔篇《王氏拙政园记》。

王献臣死脱以後，伊个儿子一夜豪赌，拿园林输畀徐氏。徐氏个小囡也弗争气，慢慢交拿隻园林荒废脱，分割卖畀其他人哉。

明崇祯四年（1631年），侍郎王心一拿园林东部十余亩荒地买下来。伊悉心经营，摆些假山石头咾啥个，来勒崇祯八年（1635年）造好，叫伊“归田园居”。里向有秋香楼、芙蓉榭、泛红轩、兰雪堂、漱石亭、桃花渡、竹香廊、啸月台、紫藤坞、放眼亭咾啥个，还有口四、五亩大个荷花池，多个是奇峰怪石。到清道光年间，王家门还住勒迭头，必过呒啥人打理个结果是伊也荒废脱，大部分变成功菜地草地哉。

园林中部搭仔西部个归属就变化复杂哉。清初，顺治四、五年（1647—1648年）个辰光，钱谦益（牧斋）曾来勒箇埭造别业包养名妓柳如是。清兵打进苏州，园林畀镇将佔脱，弗得已来勒清顺治十年（1653年）只用二千金个低价抛售畀大学士海宁陈之遴。陈之遴拿园林重新弄仔一遍，极尽奢丽。必过伊长年来勒京城，五年以後因为党争，全家流放盛京尚陽堡，故咾伊呒没亲眼看过园里向个花花草草。清康熙元年（1662年），拙政园畀收没成官产，圈封成宁海将军府，清康熙三年（1664年）又改成兵备道行馆。後些来，园林又还畀陈之遴个儿子，伊再卖畀吴三桂个女婿王永宁。王永宁大兴土木，易置丘壑，造仔斑竹厅、娘娘厅、楠木厅，极尽奢华。清康熙十八年（1679年），拙政园又变成苏松常道新署，参议祖泽深再细仔一遍，加装对联匾额咾啥个。清康熙廿三年（1684年），康熙帝玄烨南巡，参观箇隻园林。1683年，苏松常道署裁撤，拙政园慢慢交变成富人个民房。乾隆初，拙政园再畀拆开来，变成西部个“书园”搭仔中部个太守蒋棨个“复园”两部分。本来浑然一体、统一规划个拙政园，演变成相互分离、自成格局个三隻园林哉。

清咸丰十年（1860年）六月二号（旧历四月十三），长毛打进苏州哉。太平天国忠王李秀成拿拙政园、东面个潘㬶子潘爱轩宅、西面个汪硕甫宅合起来造隻忠王府，还呒没造好就畀李鸿章打下来哉。清同治二年（1863年），李鸿章占领苏州，拿忠王府当成江苏巡抚个办公地，让善后局畀园主白银三千两，算公家拿伊买下来，箇個辰光园里向已经荒废脱弗少哉。清同治五年（1866年），巡抚搬出拙政园。清同治十年（1871年）冬天，张之万任江苏巡抚个辰光来勒此里造了隻园林，里向有远香堂、兰畹、玉兰院、柳堤、东廊、枇杷坞、水竹居、菜花楼、烟波画舫、芍药坡、月香亭、最宜处诸胜，画仔《吴园图》十二册，还叫伊拙政园。第二年，伊升任浙闽总督，就拿隻园林改成功“八旗奉直会馆”，范围包括园个中部花园搭仔前头个房子，园仍名拙政。清光绪十三年（1887年）又修过一𡍲。以水为主，池广树茂，景色自然，迭隻布局就是现在拙政园中部个布局。

清光绪三年（1877年），西部个汪姓宅园畀吴县富商张履谦用仔价银六千五百两买下来，名字改成“补园”，奢侈华丽，再造仔卅六鸳鸯馆，音响效果邪气好，用来请昆曲演员唱昆曲。

清宣统三年（1911年），因为来勒苏州个八旗奉直人越来越少，会馆缺钞票哉，决定对外开放收门票钿。园里向开茶室，开娱乐场，唱滑稽戏、说书。日常呒啥人来个，唱戏个辰光人多些。民国十九年（1930年），年久失修，回廊坍脱，磕伤两名游客，见山楼後头个木桥也断脱哉。

民国廿六年（1937年）冬，日军飞机轰炸苏州，拙政园失火哉。民国廿七年（1938年），江苏省省长陈则民拿拙政园搭仔西面个补园当成伪省政府办公处，顺带便修缮一记。陈群当伪省长个辰光，又来勒西花园造仔座日本式木屋，专门接待日军将领、特务头目。园个东部，荒废脱交关辰光，一片民房，跟中部花园隔开道墙。伪江苏省政府教育厅拿伊占用脱，打通整隻拙政园，造仔座小洋房畀官员住。

民国三十四年（1945年），抗日战争胜利。1946年9月份，国立社会教育学院从四川璧山搬到苏州，借拙政园当校舍，中部花园搭仔房屋是办公教学区搭仔学生宿舍，东部花园变成功教职员宿舍，园外菜地当操场。西部个补园还畀张氏。1948年，社会教育学院因为校舍弗够，又向张氏后人张逸侪借仔西部花园搭仔部分房子。

1949年，解放军占领苏州，社会教育学院搬到无锡。拙政园变成功苏南行政区苏州行政区专员公署。1951年11月份，拙政园划畀苏南区文物管理委员会管理，即刻修缮，延请专家名匠，规划整治，山、水、桥、亭、厅、堂、墙、门，按原样修復。1952年10月份，工程竣工，同年11月6号，拙政园中部花园搭仔西部花园正式开放，东部暂时做花圃搭仔职工宿舍。1954年，市园林管理处成立，接管拙政园，年底开始又大加整修，来勒东部花园重新砌墙，慢慢交浚池叠石，植树莳花。1959年下半年又对东部花园进行大规模修建，新造仔大门、芙蓉榭、涵青亭、秫香馆咾啥个，中、西、东三部合而为一，变成完整统一又各有特色个名园。1988年3月30号，工艺美校搬出李宅，苏州市园林管理局投资120万元进行整修，1989年4月25号竣工，拙政园宅园合一。

1992年9月份，拙政园个原住宅部分中轴线造仔中国第一座以园林为专题个博物馆苏州博物馆。2007年，苏州博物馆新馆来勒伊西面，老早个太平天国忠王府造好。

规模

拙政园中部远香堂南

拙政园中部见山楼

拙政园中部香洲

拙政园西部卅六鸳鸯馆

拙政园西部与谁同坐轩

东部

1959年到1960年新造个，现在是拙政园个主要入口，约莫31亩。重要景点有秫香馆、松林草坪、芙蓉榭、天泉亭，明快开朗，主要是平冈远山、松林草坪、竹坞曲水咾啥。

中部

中部是晚清八旗奉直会馆留下来个一部分，约莫18.5亩，是拙政园个主景区。总体布局以水池为中心，亭台楼榭临水而造，是江南水乡个特色；临水布置形体弗一、高低错落个建筑，主次分明。

主体建筑是远香堂，是拙政园个主建筑，建勒明朝王氏拙政园若墅堂个旧址丄，开门就是水池。拙政园中部个亭台楼榭个名字多同荷花有关，还有微观楼、玉兰堂、见山楼咾啥建筑搭仔精巧个园中之园——枇杷园。

西部

西部是晚清张履谦补园留下来个一部分，本来叫“补园”，面积约莫12.5亩。伊水面迂回，布局紧凑，依山傍水造个亭阁。主要建筑有靠近房子个卅六鸳鸯馆，是伊个辰光园主人宴请宾客听昆曲个地方，陈设考究，透过蓝色玻璃窗看外头，景色赛过一片雪景。卅六鸳鸯馆个水池是曲尺形个，特点是台馆分峙，装饰华丽精美，回廊起伏，水波倒影，别有情趣。西部另外一隻主要建筑“与谁同坐轩”是扇形个亭子，扇面两侧个实墙上开两隻扇形空窗，一隻对咾“倒影楼”，另一隻对咾“卅六鸳鸯馆”，後头个窗又正好对咾山丄个笠亭，形成面扇子。

外部链接

• 平江区志·第三卷（园林名胜）·第一章（历代园圃）·第一节（古典园林）·一、拙政园。
• 平江区志·第二十三卷（综录）·第二章（名胜诗文）^{[链接坏脱]}，内含拙政园相关诗文。
• 拙政园官方网站 档案，存勒互联网档案馆当中。（2021年1月22号）