我的三体
《我的三体》，是《我的世界》制作个中国大陆网络动画，是根据刘慈欣创作个科幻小说《三体》改编个。《我的三体》一开始只是同人作品，勒拉第二季第三集以后伊获得原作个改编权[1]。伊主要勒拉bilibili浪放出个。
剧情[编辑]
第一季[编辑]
四五十年前，科学家叶文洁勒拉搜寻外星文明个秘密基地“红岸”，向三体星系发仔消息。因为三体星是一颗畀三颗恒星包起来个行星，随时会得畀恒星吃脱，所以三体人决定向外太空进发。叶文洁又因为个人身世，对人类失去信心，所以拿地球个坐标发畀三体星。后些来，离开红岸基地个叶文洁认识志同道合个伊文斯，告诉伊三体个事体，两個人拉仔一帮对人类失去信心个人，成立反人类个“地球三体组织”（ETO）。经过搜查，科学家汪淼、警官大史同各国政府认识三体组织个阴谋，捉脱叶文洁，还灭脱邮轮“第二红岸基地”浪剩下来个人。通过船浪个资料，人类晓得三体人向地球发射质子造出个检测器“智子”，箇末地球浪所有计策侪勒拉三体人个眼皮子底下[2]。
第二季（罗辑传）[编辑]
为对付智子，联合国决定选出4位“面壁者”，“面壁者”好调动交交关关个资源，不用作任何解释，目的是对智子搭三体人进行战略欺骗。4個人当中，其他3家头侪是杰出个政治家搭科学家，只有罗辑是普通个社会学教授，因为伊是唯一一個畀三体人点名要杀个人[2][3]……
第三季（章北海传）[编辑]
中国军人章北海，勒拉爷个影响下头，志向坚定，认为箇是延续人类文明个唯一方法。因为希恩斯思想钢印计划个逃亡主义畀看出来，章北海勒拉末日之战前畀叫醒。自然选择号浪个伊实施伊个逃亡主义计划，奔向深空[4]……
制作[编辑]
《我的三体》导演神游八方是一位法国波城大学个学生，也是《三体》个粉丝。由于伊经常畀人问“啥个是《三体》”，箇咾决定用我的世界造动画版个《三体》[2]。
做第一集个辰光，因为制作团队除脱配音只有神游八方伊一家头，箇咾伊也要做剧本改编、执镜、世界架构。因为技术、经验、资金弗够，第一季个制作效果邪气糙，但吸引其它人参加制作[2]，还勒拉做第四集个辰光成立制作团队[5]。
《我的三体》一开始用我的世界来做个[2]，第一季第八集开始加入部分动画制作，第九集开始纔调成动画制作[5]。第二季开始，光影搭人物表情加强哉，还加入口型设计[6]。
因为《我的三体》第一季个辰光是一部同人动画，箇咾《我的三体》第一季呒没捞着投资[7]。但从第二季第三集开始，制作团队有仔资金支持搭仔《三体》原作个改编权[1]。
2021年9月22号，导演神游八方宣布离开游族公司[8]。
歌曲[编辑]
第二季罗辑传主题曲是中国大陆网络歌手云翼星辰唱个《黑暗森林》，第三季专辑《我的三体章北海传 原声音乐集》，里向有原创音乐基地歌手不才唱个主题曲《夜航星》（Night Voyager）搭仔其他歌曲。
参考文献[编辑]
- ↑ 1.0 1.1 科幻巨著《三体》被动画化，前几集令人绝望，后面堪称神作！. 搜狐网.
- ↑ 2.0 2.1 2.2 2.3 2.4 当大家还在纠结《三体》电影版时，一群穷学生把它拍出来了。. 搜狐.
- ↑ 哔哩哔哩我的三体第二季.
- ↑ 哔哩哔哩，章北海传.
- ↑ 5.0 5.1 我的三体专题. 哔哩哔哩. 原始文档勒2021-01-21存档. 访问日脚2023-02-16.
- ↑ 《我的世界》版《我的三体》新季预告片来袭：黑暗森林 档案，存勒互联网档案馆当中。（2019年6月4号），IT之家
- ↑ 国人神作！《我的三体：黑暗森林》第一集在线观看 档案，存勒互联网档案馆当中。（2018年2月10号），游讯网
- ↑ 神游八方离开三体宇宙，《我的三体》动画，还能继续推出吗.