张士诚

出自维基百科,自由个百科全书

张士诚(1321年-1367年),元末个起义军领袖跟地方割据势力之一。泰州白驹场(今朝江苏大丰市)人;勒元朝末年抗元起义领袖当中,有“友谅最桀,士诚最富”之说。死脱过后葬勒吴县斜塘

生平[编辑]

张士诚小名叫九四,本身是个运盐工,因为弗愿畀盐官压迫,在正十三年(1353年)搭俚个兄弟张士义、张士德、张士信还有盐贩李伯升等十八个人起兵反元,弗久就攻下泰州、兴化、高邮等江北重镇。十四年正月(1354年)勒高邮建国,国号大周,自称诚王,以天祐为年号。

至正十四年(1354年)九月,元太师右丞相脱脱领重兵南下攻高邮,十一月,勒城外打败张士诚军,张士诚退进城中固守。十二月,元军攻占外城。勒搿个危急个辰光,元顺帝听信谗言,解除之脱脱个兵权,临阵换将,元军军心涣散。张士诚军趁机反击,打败元军。至正十六年(1355年)张士诚继续往南发展,攻入平江路(今朝苏州市)改平江路为隆平府。至正十七年(1357年)元朝江浙行省平章达识帖睦迩派杨完者打张士诚,张士诚因为面临畀元军搭方国珍夹击个情况就投降元朝哉,畀封为太尉。至正十八年(1358年),采取分化策略,搭达识帖睦迩联合,起兵攻打杨完者,杨完者自杀。

张士诚乘朱元璋搭陈友谅大战个机会,势力弗断扩张,北到徐州、南到绍兴个割据实力,拥兵几十万;并且几次运粮十几万石到大都(北京)。二十三年(1363年)三月,派吕珍去打安丰个红巾军刘福通部,逼得刘福通搭韩林儿投靠朱元璋。九月,张士诚自称吴王,以俚个兄弟张士信为丞相,用黄敬夫、蔡彦文、叶德新三人为参军,弗再归顺元朝;第二年,朱元璋也称“吴王”;著名小说《三国演义》个作者罗贯中也勒张士诚处任职。

张士诚搭朱元璋个势力弗断交战,张部以渔盐近海交通个便利,还有日本倭寇力量暗中支持,明朝建立以后实施“海禁政策”也搭迭个有交关大个关系。朱元璋以“先取通泰诸郡县,剪士诚肘翼,然后专取浙西”个办法一步步削弱张士诚;勒朱元璋消灭脱陈友谅之后,至正二十五年(1366年)朱元璋开始对张士诚个势力进攻,张士诚个兄弟张士德几次打败明军,可惜个是张士德个马发狂,畀徐达前锋赵德胜抓牢,勒金陵绝食而死,张士诚力量大失;至正二十六年(1367年)十二月包围张士诚所居个平江;九月平江城畀攻破,张士诚畀捉牢,后来畀押到应天(今南京),俚想自杀哉,畀部将救下来。勒押往应天个船浪,明史记载俚“至金陵,竟自缢死,年四十七。命具棺葬之。”

张士诚有养子“五太子”,投降朱元璋。

目前苏州市斜塘镇有张士诚墓。

评价[编辑]

张士诚死后勒民间受到怀念,搭元朝官兵,宝庆府杨完者军队个混乱个军纪相比,苏州、秀州杭州等地有“生不谢宝庆杨,死不怨泰州张”个俗语。每逢七月三十张士诚个生日,苏州、杭州等地每家人家门口头侪会扎草龙,烧九四香(张士诚小名九四)来纪念俚。一直到中华人民共和国成立以后,再逐渐停止。

维基共享资源里向寻得着搭该篇文章搭界个多媒体资源: