宝兴路谒师所
宝兴路谒师所，俗称印度教堂，是上海老早辰光个一隻锡克教謁師所，来勒迭歇个上海市虹口区东宝兴路326号（近四川北路），1907年到1908年造个。1943年汪精卫政府接管公共租界以后，锡克教教徒陸陸續續回国或者跑到香港去，到1949年减少到200多人，1962年关脱，改造成幼儿园，後首來貤改造成虹口区四川北路街道社区卫生服务中心。
歷史
[编辑]上海開埠後首，有眼錫克敎徒打印度到仔上海，開始辰光聚居拉第歇个廣西北路（伊歇叫錫克路）。同治兩年（1863年）公共租界建立，錫克人搬場虹口去哉。爲仔維護租界治安，租界當局拉光緒九年（1883年）從印度招巡捕搭司閽（看門个），上海个錫克人慢慢較多起來哉。[1]清光緒廿八年（1902年），錫克人要求租界當局畀渠拉造錫克教謁師所（錫克廟），工部局董事會雖則同意仔第个要求，從公共基金裏向撥款3000銀兩買地皮，但是朆實施；到仔光緒三十一年（1905年），工部局董事會認爲造隻謁師所“對上海个印度人好處板板大”，貤好畀渠拉一隻條件合適个戶蕩做禮拜，貤好監視渠拉个一般行咾日常行爲。[1]第二年，租界工部局用脫3396銀兩，拉寶興路買仔1.9畝地皮，貤拉印度僑民裏向籌集仔8000銀兩个建築基金，請公共工程建築師特納（R. C. Turner）設計建造。[1][2]
1907年，謁師所動土。1908年，寶興路謁師所正式使用，是上海頭一隻正式个錫克敎謁師所。[1][2]開幕儀式丄，英國駐上海總領事霍必澜爵士發表演講，強調區分“好”搭“恘”个錫克人个必要性，前者是對大英帝國忠心耿耿个錫克人，後者是渠眼“搨累前者清爽名聲”个人。[2]伊歇上海个錫克人裏向，反抗英國个民族主義思想也是傳拉許。1915年古鲁那纳克诞辰个辰光，謁師所通過決議，重申所有真正个錫克敎徒全要效忠英國政府，承諾要阻止“恘个上海錫克人”。謁師所也變成功政治意見个中心，有親英派集會，貤有反英派集會。[2]
1909年八月份，巴伊·尼丹·辛格（Bhai Nidhan Singh）討仔一個上海人娘子，渠拉兩家頭拉許謁師所造好个一日實行錫克敎个婚禮儀式，是有記錄个頭一趟錫克教徒搭中國人拉寶興路謁師所个跨国婚姻。[2]
印度巡捕搭司閽專門磕碰咾，租界工部局董事會拉戈登路（迭歇个江宁路）巡捕房壗頭造仔一隻畀巡捕用个謁師所，1916年，戈登路巡捕房新謁師所開放。[1][2]因爲寶興路謁師所受到个限制比較小，外加對所有人開放，介咾迭𡍲原舊是錫克敎徒搭另外个印度人社羣（比方講信德人）主要个朝拜場所。[2]
司閽間因爲鄉情弗同咾，方言弗同，馬恰（Majha）人搭馬爾瓦（Malwa）人磕碰弗停。1926年8月，因为锡克教谒师所新任工作委员会秘书一直朆入职，两帮人打相打哉，英國領事命令關脫謁師所，後首來一總个錫克敎徒保證“謁師所只用拉宗教目的，再弗會得打相打”，總算拉11月9號古鲁那纳克诞辰个辰光重新開放。[1][3]後首來拉馬霍路搭舟山路貤造仔兩隻小个謁師所。[1]
太平洋戰爭爆發之後，日本人佔領租界，到1943年，汪精衛政府接管租界，交關印度人無得仔生活，有眼人回到印度去，有眼人轉業去卖奶製品。[1][3]第二次国共内战个辰光，牧場經營也弗景氣，益发多个印度僑民回國去哉。[1][3]1949年5月份，解放軍佔領上海，到中華人民共和國成立，上海只挺兩百來个印度僑民。[1]1956年，上海市人民政府資助印度僑民到香港去尋飯喫，留拉上海个弗到廿個人。[1]1962年10月份，市政府再次資助印度僑民去香港，寶興路謁師所關脫。[1][3]謁師所先是改成幼儿园，[1]後首來一樓是虹口区四川北路街道社区卫生服务中心，樓丄向蹲人。[3][4]
2003年，印度锡克教堂旧址成为虹口区登记不可移动文物[5]，迭歇也拉上海市不可移动文物名单裏向。[6]
建築
[编辑]
謁師所有兩層樓，是用紅磚搭仔人造石頭砌个，屋頂丄鋪油毛氈搭仔波形鐵皮。[1]樓上樓下分開，要走十九級踏步个胡梯再好到兩樓[7]。一樓是15米長，9米闊个會議室，也當喫飯間，南面有得兩隻小接待室。樓丄是謁師所，圓拱屋頂，南面有四隻小房間畀佈道師生活起居。謁師所裏向簡單樸素，無得繪像搭另外个裝飾品，只有當中用繩子隔出方形祭臺，佈道師坐拉當中，一面搖鈴，一面讀《元經》，敎徒坐拉四遭，聽佈道師誦經。禮拜結束以後，敎徒一淘到會議室喫中飯，喫好飯搉事體，搉定以後散會。[1]
参考資料
[编辑]- ↑ 1.00 1.01 1.02 1.03 1.04 1.05 1.06 1.07 1.08 1.09 1.10 1.11 1.12 1.13 1.14 （简体中文）《上海宗教志》编纂委员会（2001）．“第六编其他宗教 第四章琐罗亚斯德教祆教和锡克教 第二节锡克教”，上海宗教志 ，上海市专志系列丛刊．上海：上海社会科学院出版社．ISBN 7806188258．
- ↑ 2.0 2.1 2.2 2.3 2.4 2.5 2.6 （zh-cn,en）沙美智（2018年05月）．“泪水和辛劳：谒师所的生活”，章可 编：黄浦江上的飞鸟 上海印度人的历史 ．上海：上海人民美术出版社，108-118．ISBN 978-7-5586-0890-2．
- ↑ 3.0 3.1 3.2 3.3 3.4 （简体中文）刘世炎（2017年06月）．“虹口区的两座印度教堂”，虹口区图书馆 编：虹口记忆 虹口历史文化研究资料汇编 ．上海：上海科学技术文献出版社．ISBN 978-7-5439-7322-0．
- ↑ Vathyam, Meena (2016-11-11). Sikhs: A piece of history that remains fragmentary. Shanghai Daily.
- ↑ 上海虹口门户网站 (2003-12-18). "虹口区公布“登记保护建筑”名单" (in zh-cn). 上海市虹口区人民政府. Archived from the original on 2025-03-09.
- ↑ 上海发布 (2017-07-30). "上海公布3435处不可移动文物名单" (in zh-cn). 澎湃新闻. Archived from the original on 2024-11-18. Retrieved 2025-03-10.
- ↑ 薛理勇 上海城建档案 (2020-12-16). 申城记忆| 从Sikh Gurdwara到“红头阿三” (zh-cn). 澎湃新闻. 访问日脚2025-03-10.