孔德成

孔德成（1920年2月23号－2008年10月28号），字玉汝，号达生，山东曲阜人，孔子七十七代嫡长孙，袭封三十二代衍圣公兼第一代大成至圣先师奉祀官，

生平

出生

1920年，孔德成在拉山东曲阜出生。生下来之前，伊个阿爸，第三十一代衍圣公孔令贻在拉北京突然生毛病死脱，为保障自家还弗曾生下来个后代好继承爵位，伊还写信把个辰光北洋政府个大总统徐世昌，要求保证自家后代个合法性。1920年3月，孔德成在拉曲阜经过蛮长辰光拉锯之后，总算生下来，北洋政府山东省省长屈映光搭孟（孟庆棠）、颜（颜世镛）、曾（曾繁山）三氏奉祀官同时到场监督。

成长

之后，孔德成因为身份比较特殊，就得到北洋政府个照顾，供养起来。一直到1928年北伐战争结束之后，伊个地位虽然有畀影响，但蒋中正对伊还是比较尊崇，让孔府度过之后个危机，同国民党当局建立比较紧密个关系。1935年，孔德成到南京，接收国民党把伊个奉祀官称号，之后1936年年底，伊又在拉南京结婚。

颠沛流离

1938年，担心自家成为日本人傀儡个孔德成，带老婆一道，从曲阜跑脱，往南面，转移到国民党控制个地区，之后长期在拉重庆定居，个辰光，也接触到交关同样避难到重庆个学者，对伊后势来个思想产生蛮大影响。1945年之后，伊随同蒋中正回到南京，之后跑曲阜稍许蹲过一歇，1948年，伊到美国读书，之后因为局面变化，就直接去台湾，定居在拉台中。

定居台湾

跑到台湾之后，伊担任蛮多个辰光文化领域个职务，比方讲，管理搬迁到台湾个北京故宫博物院文物之类。此外，也兼职交关大学个教授头衔，比方讲台湾大学、东吴大学之类。到1990年代之后，伊还畀聘用，成为国策顾问，享受特殊待遇。2008年，88岁辰光，寿终正寝。