复兴岛公园
复兴岛公园，来勒上海市杨浦区复兴岛中部共青路386号，公园总面积4.19万平方米，1930年造个。伊一开始是上海浚浦局体育会，1949年以後畀上海市港务局接管，1951年改造成公园对外开放。岛上有一座日式别墅白庐，是蒋介石1949年离开上海前个阿末一隻住所。
历史
[编辑]复兴岛来勒黄浦江下游中部，一开始是一片沙滩，後些来上海浚浦局花仔10年辰光吹出来箇隻岛。1930年，现在复兴岛中部个吹泥填滩工程基本完工，故咾浚浦局来勒箇埭造仔体育会，员工日常娱乐、锻炼个辰光好来勒箇埭。1937年8月13号，淞沪会战爆发，日军迅速占领箇座岛，划成禁区，更叫定海岛，拿浚浦局体育会改造成日式庭院，种满樱花。
1945年，为咾庆祝抗日战争胜利，箇座岛改名叫复兴岛。1948年10月份，上海市政府拿复兴岛交还畀浚浦局，还来勒箇埭立仔一块“复兴岛收回纪念碑”，1966年畀敲毁脱。1949年，上海政权更迭，上海市港务局接收上海市浚浦局个单位。1951年1月份，市港务局提议拿体育会改造成公园。同年5月28号，复兴岛公园正式对外开放[1]。
公园刚开个辰光，用枪篱当围墙，路用煤屑铺个。1972年，管理部门沿咾共青路造围墙搭售票亭。1976年，园里向个路侪改成混凝土搭石块。2009年，上海市搭杨浦区两级政府园林机构开始对该公园进行为期三個号头个大规模整修；年底工程完成，园林基本恢复原有个旧貌，水泥围墙变回老早个竹篱[2]。
公交
[编辑]参考资料
[编辑]- ↑ 上海园林志>>第二篇公园>>第二章区域性综合公园>>第七节杨浦区>>三、其他公园>>复兴岛公园 (zh). 上海地方志办公室. 原始文档勒2019-04-15存档. 访问日脚2012-02-13.
- ↑ 复兴岛公园改造一新 日式园林风格得以恢复 (zh). 新闻晨报 (2009-12-31). 原始文档勒2016-03-04存档. 访问日脚2011-02-13.