周瘦鹃
周瘦鹃（1895年6月30号－1968年8月11号），原名祖福，字国贤，江苏苏州府吴县出生个吴越人，二十世纪东亚有名个作家搭园艺家，近代吴越地区有名个文学流派“鸳鸯蝴蝶派”代表人物之一。
生平
[编辑]伊本身个名字叫周祖福，字国贤，但因为爸爸工作个关系，伊是勒上海出生个。6岁辰光，伊爸爸生毛病死脱，伊娘帮别人做缝补为生。周祖福长到五六岁，勒上海储实两等小学搭老西门民立中学读书。1912年中学毕业前，生毛病，毛发脱光，但因为伊有才能，得到校长器重，留校任教。迭个阶段伊开始投稿文学作品，并且表现出相当高个才能，也因此改行为职业作家。
1915年，周瘦鹃参加南社。此到中华书局工作，翻译出版《福尔摩斯侦探案全集》、《欧美名家短篇小说丛刊》。
1920年起，周瘦鹃勒《申报》副刊《自由谈》担任编辑直到1932年底迭个阶段，伊还主编有名个《礼拜六》周刊、大东书局《半月》杂志（后改名《紫罗兰》搭《新家庭》）、《紫兰花片》、《良友画报》等多种报刊，侪是迭个阶段鸳鸯蝴蝶派个重要发声媒介。
1931年，周瘦鹃迁居苏州，勒王长河头修造自家房子，叫做紫兰小筑，别人也叫此地周家花园。之后，伊就勒苏州搭上海之间往返，继续负责申报《春秋》副刊。
1937年淞沪会战爆发，周瘦鹃搭程小青两家经浙江南浔避居安徽黟县山区。次年《申报》在租界复刊，周瘦鹃也回到上海，居愚园路田庄，并勒海格路售卖盆景。经同学蒋保厘介绍，周瘦鹃加入上海中西莳花会，勒比赛中两趟夺魁，获得彼得葛兰奖杯。第三届仅获次奖，就因此退出。到太平洋战争爆发，日人占领租界，周瘦鹃辞脱《申报》副刊个编务。
1946年起，周瘦鹃又回苏州隐居，闭门研究盆景。1950年代以后，陈毅、周恩来、叶剑英侪去拜访。后首来，伊还发表过有关花草园艺、游记个散文集《行云集》、《花花草草》、《花前琐记》、《花前续记》等。
1960年代之后，周瘦鹃遭受交关冲击，并勒文革当中畀张春桥批判，伊无办法忍受弗羞辱，1968年勒自家屋里投井自杀。