古剑奇谭 琴心剑魄今何在

出自维基百科，自由个百科全书

《古剑奇谭 琴心剑魄今何在》是上海烛龙科技研发个一部角色扮演游戏，徕2010年7月10号徕中国大陆上市。因为箇部遊戏是2007年以前，负责《仙剑奇侠传系列》單機遊戲開發个上海软星科技解散过之后，新成立公司[1]个第一部大型RPG單機遊戏，怪仔毛受关注。遊戏个正式名字公布徕2009年12月25号，徕箇以先官方一直来用“烛龙RPG”叫。根据官方个讲法，古剑奇谭以后会是一个系列个总名。[2]作为首代古剑奇谭个主题是“重生”，对外宣传话语是：“七弦琴鸣，梦回太古；灵霄剑吟，书此奇谭。”

遊戲世界觀[编辑]

主题诗[编辑]

“

百世山河任调换，一生意气未改迁；
愿从劫火投身去，重自寒灰飞赤鸾；
沧海桑田新几度，月明还照旧容颜；

琴心剑魄今何在，留见星虹贯九天。
”

故事背景[编辑]

游戏个背景设定来源是中国古代个神话传闻，主要是从《山海经》取材。游戏故事发生个时代背景，大体浪相当于唐朝。伏羲是天帝，顶开始道一班神仙歇徕人世，其子祝融用榣山木材造出三把琴。祝融顶欢喜里首个凤来琴，亦让地皇女娲用牵引命魂个法术畀琴改化成人，起名太子长琴。太子长琴欢喜徕榣山抚琴，一只水虺专门来边浪聆听，慢慢较道太子长琴成为至交好友。后头来伏羲带群神去到天界定居，安定落来之后，太子长琴再回榣山，时光已经过去300年。水虺已经成龍，徕人界兴风作浪。伏羲派长琴落去人界除妖，长琴却勿当心引发不周山大灾，导致天柱要倒。伏羲大罚长琴，让佢永世轮回都要经历孤独。

太子长琴个魂魄徕榣山久留勿去，畀铸剑师角离发觉，掸了一魂四魄铸徕剑里，剑名焚寂。剩落二魂三魄没寄托，就寄托到角离儿子身浪。因为焚寂之剑危险凶煞，女娲畀佢道另外六把凶剑一道封印。佢自家则带了角离个族人去到地界定居。

情节[编辑]

少年韩云溪歇徕南疆个乌蒙灵谷，作为大巫祝继承人个云溪专门畀娘韩休宁逼牢学法术，不过云溪天性皮，畀法术当作负担，急惯勿听娘个禁令跑到村当外头去玩。一次出去玩，云溪带楚蝉去寻一只金色狐狸，却畀一头棕熊捣乱计划。回村个辰光云溪想起娘交代个任务没完成，立马去冰炎洞完成仪式。来到统村当顶高点个云溪却望着一场外人进村个大屠杀，娘亦在徕杀里死掉。云溪畀娘个尸首抬到冰炎洞顶深地方囥好。

成年后个韩云溪改叫百里屠苏，成为昆仑山天墉城里首个一名弟子，因徕派里畀诬陷害杀师弟畀逼落山。来到琴川，屠苏畀嘱托去到一个畀妖魔占牢个山寨救人。徕妖魔关人个牢房里，屠苏认着了琴川大户人家个儿子方兰生，还有青玉坛丹芷长老欧阳少恭。通过少恭，屠苏晓得了妖魔用玉横来吸收死人魂魄，再用来炼妖丹，另外有交关别他玉横碎片散落人世，危害极大，由此决定同少恭同行收集玉横。

去琴川途浪，屠苏偶遇徕河里洗浴个风晴雪，晴雪勿晓世事，畀屠苏当淫贼对付，亦抢去屠苏随身带个焚寂宝剑。屠苏一路跟到琴川，寻到风晴雪个辰光体内煞气大发，昏死过去。等到醒来，已经徕船舱里，晴雪徕边浪引渡真气来缓解煞气，屠苏甚是感激。几人徕船上碰到决心跟随屠苏个襄铃。

翌日，屠苏、少恭同襄铃动身去江都。路浪逃婚个兰生、担心屠苏个晴雪道追寻屠苏个红玉接连接加进队伍。大家拜访少恭故人瑾娘之后定落下一个目的地是甘泉村。

徕甘泉村，大家畀甘泉村村长洛云平骗进藤仙洞，差些死徕藤妖口底下，不过末脚畀村民救出。原来藤妖以前是村里老人，洛云平得到玉横碎片后打算炼长生药孝敬老人，勿料老人异化变妖。顶后洛云平以身饲妖，少恭畀突然出现个青玉坛弟子带去，屠苏、晴雪、襄铃畀过来除妖个天墉城弟子带到铁柱观，临时关徕牢房里。

屠苏一班利用煞气发作逃出牢房，误进铁柱观禁地勿当心解开畀镇压徕禁地里个狼妖封印。屠苏为了弥补大祸独个人战狼妖，惨赢昏迷。天墉城弟子硬要带屠苏回天墉城受罚，刚好追寻少恭勿着个兰生红玉归来，群弟子退回天墉城。

屠苏醒过来身徕安陆。徕安陆戏院亦一回偶碰醉道士尹千觞，再接受委托调查碧山闹鬼。

第两日大家通过碧山到自闲山庄。兰生畀魅惑进到山庄里，徕幻觉里望见自己前世个事体：晋磊为仔复仇勿顾爱人贺文君病危，道武林盟主个女叶沉香假意成亲，再后亲手杀掉叶沉香灭叶家门；叶沉香冤魂决心要杀晋磊或者佢转世。大家救出沉迷徕幻境里个兰生亦打败叶沉香厉魂再后青玉坛弟子突然出现，用玉横碎片吸去山庄冤魂。勿当心讲出要用明月珠重造玉横。

红玉告诉大家明月珠有可能徕始皇陵里首。大家生人徕始皇陵中亦碰着尹千觞。屠苏一班寻着青玉坛掌门雷严，并且看到囚禁徕边浪个少恭。大家力战雷严，勿敌，雷严却突然力竭死去。原来少恭炼个青玉坛平日用个丹药含剧毒。屠苏突然记起雷严就是小时光屠杀主谋，大仇得报……

（省掉后头情节）

角色介绍[编辑]

游戏里主要角色个名字源出美酒。每一个角色都有属于自家个星蕴图。

17歲，人族（人、仙半魂），老家徕乌蒙灵谷，本鄉受血塗之陣畀灭族，畀天墉城恩師救落，因箇變故，身帶濃厚个煞氣，没法道任何人太過親密，亦清晓分離个必然，勿願與人深交，身边有一隻大鳥阿翔伴佢左右。道風晴雪相處過程，慢慢较打開心房，过後散掉魂魄，变作野魂。900年後畀晴雪用邪族仁獸「辟邪之骨」重生，但是因900年漫長時光个缘故勿復原先記憶。人名源出屠苏酒，星蕴是重明鸟。昆仑山天墉城弟子。
17歲，人族，（人、女媧族混血），出徕幽都，因幽都人从小帶有瘴氣毒，風晴雪善良亦熱情，好像對世界浪个一切都木牢牢好奇，勿希望别人受瘴毒害，長年戴一雙手套，用个是巨镰。人名源出中皇山盛景“中皇晴雪”个意象，意謂「純潔」，亦有認為是晴雪酒[4]，星蕴是腾蛇。徕尋失蹤已久个大哥風廣陌路浪，百里屠蘇（韩云溪）徕一處空谷撞着徕耷洗浴个風晴雪，埋落情根，同佢交往，还叫佢蘇蘇，道尹千觞（风廣陌）是兄妹，喊佢尹大哥（风廣陌就吼大哥），同紅玉關係蛮好，叫佢紅玉姐，百里屠蘇顶后还是变作野魂消散，為了寻着重生之法，帶牢百里屠蘇遺劍焚寂，獨自家踏浪旅途，自願放棄死後輪迴，掉来千年壽命，歷經九百年後，終於掸着邪族仁獸「辟邪之骨」，並徕桃花谷创立起滿是桃花个村当，身边有一個名叫屠蘇个小鬼头，心里意願看到屠蘇長大成人，兩人好從今之后勿再分离。
18歲，人族，家徕琴川，人名源出兰生酒，亦叫旨酒；星蕴是青狮，本是琴川方家少爷，父亲老早就出家做和尚，畀五个如花似玉个姐姐围牢个书生，個性浮躁勿夠穩重，縱是以後成親立業，还是蛮難擺脫小人脾氣。因小時光受父親出家影響道本人好學佛家經典，武器使用佛珠。有一日勿当心接着孫家小姐繡球，勿願成親，偷偷摸逃出来后认着了百里屠蘇等人，並常道襄玲鬥嘴，但毛歡喜襄玲，叫百里屠蘇木頭臉，吼尹千殤臭酒鬼，紅玉則喊女妖怪（後来直头叫紅玉）。
前世是晋磊，因为义父畀害而立誓报仇，勿惜投进自閑山莊，同叶沉香成親，顶後報仇成功，殺掉葉家一门，但是没法子同師妹賀文君相守(賀文君徕晉磊成親个辰光病逝)。顶后道前世爱人賀文君个转世孙小姐结成夫妻，育一女沁兒，是古劍奇譚一主角群里首結局还算好个人。
16歲，妖族（妖、人混血），常道方蘭生鬥嘴，歡喜百里屠蘇（韩云溪），並叫佢屠蘇哥哥，喊紅玉紅玉姐姐，畀風晴雪当情敵兼好友，家徕紫榕林，使用扇子。人名源出平阳襄陵酒，星蕴是九尾狐。本是一隻金色狐狸。因畀百里屠苏救落而追随。徕百里屠苏归西後，去到青丘之国，亦會抽空去琴川望望方蘭生一家。
年纪勿明，灵族，（古剑之剑灵），個性冷靜機智，像團隊里姐姐，覺得方蘭生蛮痴，就叫佢猴兒，風晴雪則喊晴雪妹妹，叫襄铃小铃兒，家徕崑崙山，使用双剑，徕百里屠苏归西後，回到天墉城，亦會撥冗去琴川望望方蘭生一家。人名玉红草[5]，生徕崑崙山，食用后可以一醉三百年；星蕴是赤豹。
  • 尹千觞（风廣陌）（声：陆揆）
27歲，人族，（人、女媧族混血），實際身份是幽都侍奉女媧神殿个十巫之一，本名風廣陌，多年以先奉命去烏蒙靈谷協助加強封印焚寂兇劍，弗料因青玉壇雷嚴、歐陽少恭凑封印減弱一日大肆攻进屠族，受血塗之陣衝擊喪失記憶，流浪人界江湖，並改名尹千觴，人名源出“觞”，古代个一种酒器；星蕴是天狼。善用重剑，受歐陽少恭命令監視百里屠蘇等人。箇人爱酒同命，叫百里屠蘇恩公，同风晴雪是兄妹，並吼佢晴雪妹子，顶後選了道歐陽少恭消亡天地。

系统[编辑]

星蕴系统[编辑]

游戏里首6个主角都有自家个星蕴图，星蕴全是动物，躯体畀分作一些小块，每块可以填充金水木火土五种星蕴点，星蕴点则随等级提升、情节推移道特殊任务完成奖励慢慢较得到。由于游戏里没设计法技学习系统，星蕴系统就负责全部角色法技学习。徕游戏里，仙法个修炼畀设计成徕某个角色个同属性亦连牢星蕴点数量达到一定级别个辰光，自动学会；法技个修习畀设定为当某位角色的同区块星魄填满、剧情的发展和特定任务完成，自动学会。

五行法技对应五种顶强招式，对应12个该属性星蕴点相连。箇些招式亦叫作五行召唤兽。另外，徕情节DLC《醉梦江湖篇》里头，亦出现了就欧阳少恭可以用个阴、阳两样属性，但是因阴阳两属性各自只对牢一个法技，还有情节DLC里勿好配星蕴，怪仔箇两个新增个属性没对牢个召唤兽。

星蕴系统就徕主线情节里头有用，徕故事外传（情节DLC）里用弗来。

战斗系统[编辑]

《古剑奇谭》个战斗系统源出回合制，不过有稍大幅度个改动。游戏还没采用敌我双方轮来行动个模式，而是畀敌我双方全部角色个敏捷指数算好统一排位，叫行动顺序，敏捷指数高个角色徕一段时光里行动次数多些。徕行动里头，还可以用家生来提高或者削减敌我角色个敏捷指数，用来临时改变行动顺序。我面行动个时光，可以选攻击，防御，用家生或者逃。

任何攻击招数都消耗“行动点”，从1点到5点。角色个总行动点跟牢情节推进慢慢较加多，顶大5点。也就是玩家可以徕一次行动里排多个招数，但是排好个招数只好用普通攻击、仙术同法技，弗可以用家生道防守。敌我双方个攻击性法技都遵守五行互生互克原则。另外每个法技都附带战意值，发出法技过后，战意值算进箇一场战斗个总战意值，显示徕屏幕右下底战意槽里，等战意槽满，角色个某些法技（叫“终结技”）可以发挥出愈加大个效果。

自家面角色受攻击个时光，可以机会性触发QTE系统，玩家徕规定时光里揿落鼠标左键就可避开攻击还有立马还手。

组合技[编辑]

跟牢游戏个推进，角色个行动点数会慢慢加多。行动点数加多以后，有些低行动点数个仙术或者特技搭配徕一道，讲勿来会有别样个效果或者愈加大个本事。

地仙扑卖[编辑]

战斗了场之后有一定机会触发箇机制。得到个效果统道战斗搭界，有增益也有减益效果。箇类效果要用特定家生或者读档才仔消得掉。

灵兽[编辑]

灵兽是游戏里头重要个辅助系统，游戏里一共笼总有7只灵兽，各带一个法技，样貌取材徕古代神话传闻书籍，像《山海经》《十洲记》《庄子》，亦勿一式样。灵兽个得到办法是触发情节或者开宝箱。
7只灵兽道佢得个用头分别是：

  • 录力（雍和）：开锁牢宝箱、通过移动石头同破坏墙头来开路
  • 柿子金（金钱豹）：徕买卖里用可以讨价还价，提高卖价，压低买价
  • 露兆丰（当康）：采摘场景里某些植物种子
  • 沐零方相（罔象）：通过冻结水面搭冰桥、冻牢敌人
  • 映虚（离朱）：徕地图里头暂时显现场景里头敌人道宝箱个位置、暂时显现隐藏个敌人个位置
  • 炎光（火光兽）：射出火焰，打开冰封道路同打开冰冻宝箱
  • 波奇（波奇）：畀角色集元气

其中录力、沐零方相、映虚同炎光通过触发故事情节得到，柿子金、露兆丰还有波奇通过开启灵兽宝箱得到。

烹饪系统[编辑]

烹调系统徕游戏里比较重要，比起毛多角色扮演游戏里头敌人死掉脱落装备个设计，《古剑奇谭》个敌人死坏以后大多数脱落同自身搭界个材料，箇里首基本浪是烹调材料。玩家通过买食谱，集食材，通过烹调系统可以做出各种菜肴。菜肴可以徕战斗中里当做恢复物品用，也可以作为饲养灵兽个材料。甚至于交关任务需要个物品也只有通过烹调系统来做。 烹调系统有成功概率限制，烹调失败会生出副产品。副产品徕游戏里也有大用场，有些副产品可以徕战斗里当攻击性家生，有些可能会改变队伍里各人对主角个好感度。

家园系统[编辑]

家园系统开放徕游戏中前期，箇系统徕游戏里现出一张独立个地图，玩家可以徕箇地图里头种植道抲鱼，饲养宠物，布置房间等。宠物可以通过任务情节得到，也可以直头买来。不过房间家私就全部要买。

侠义榜同成就点[编辑]

侠义榜是游戏里一个任务集总发出地，就徕城市里，玩家才仔可以通过“侠义榜”拣任务。每个侠义任务都是一场战斗，嘦战斗胜利就可以得到额外奖励，并掸着一些侠义值。每回战斗了场，玩家会看到自家个侠义值徕100个NPC英雄里头个名次，箇些NPC英雄个名字勿是开发人乱编乱造，是徕游戏故事里恪实有个，比方侠义榜第一名逐风浪侠楚随风实际浪是西海白龙王，玩家徕龙绡宫可以到茶小乖𡍲里打听箇事体。侠义榜任务跟牢故事个推进越来越多，并且徕玩家进到第两轮回个时光，会有额外个侠义任务。

《古剑奇谭》是汉语游戏里头一个加进成就系统个游戏，佢成就系统分4部分（故事、世界、战斗、法宝），玩家通过完成任务来达到故事部分个成就；通过探索地图，道NPC交流来达到世界部分个成就；战斗部分成就主要通过战斗来达到；通过烹调、宝箱、灵兽等达到收藏部分成就。另外有蛮多特殊成就要玩家达到特殊事体才会开启。每一条成就都有5-25点勿等个成就点。玩家个成就点可以上载到官方网站道其他玩家比较。

书信[编辑]

游戏里个书信系统是作为任务个延伸出现个，玩家完成规定个任务或者侠义榜，就可能收到信。来信个内容一般来讲是任务主角个感谢或者搭界内容个描绘。玩家通过书信还可以掸着额外个任务奖励。另外还有少数信件有“广告”性质，并没实际作用。一部分信件用来细化游戏个故事背景。

DLC同内容管理器[编辑]

本作引进DLC（追加内容下载包）系统，借助箇一系统，可以用补丁个形式畀游戏加多官方提供个更新内容，箇些内容都通过内容管理器展现畀玩家，并让玩家决定要弗要付费激活箇些追加内容。徕2010年9月17号，古剑奇谭放出第一个付费DLC，同时推出了内容管理器。

DLC名字 发布日子 有没情节 价格
超值畅游版 2010年8月13号（大陆）
同港台实体版同道发售（港台）		 没 免费
海底风情包 2010年9月17号（大陆）
同港台实体版同道发售（港台）		 没 ￥3.00（大陆）
免费[6]（港台）
千古剑灵篇 2010年11月24号（大陆）
2011年5月5号（港台）		 有 ￥10.00（大陆）
HKD$20（香港）
NT$100（台湾）
天墉旧事篇 2011年1月18号（大陆）
2011年5月5号（港台）		 有 ￥10.00（大陆）
HKD$20（香港）
NT$100（台湾）
彼岸浮灯篇 2011年4月22号（大陆）
2011年6月29号（港台）		 有 ￥10.00（大陆）
HKD$20（香港）
NT$100（台湾）
醉梦江湖篇&桃花幻梦篇 2011年8月10号（两岸三地） 有 ￥15.00（大陆）
HKD$30（香港）
NT$150（台湾）

全程配音[编辑]

箇是烛龙徕游戏里首新加进个元素，聘请配音演员对游戏里首全部对话全程配音。负责畀本作配音个队伍是中国大陆个“京诚之声”组合，箇组合里大多数配音演员是头一回畀游戏配音。全程配音包由上海烛龙徕2010年9月30号正式对外公布消息，并徕2010年10月20号公布，同第一个情节扩展包“千古剑灵”一道发布，2010年11月25号，烛龙正式公布新DLC《千古剑灵篇》，箇系统随箇DLC正式实装。全程配音还会畀直头包进繁体中文版个《古剑奇谭》游戏里。

周边搭界[编辑]

官方攻略本[编辑]

徕2010年8月21号推出，里头有本作主支线攻略，还有武器装备家生等各项数据。

美术设定集[编辑]

徕2010年9月15号推出，箇独立周边主要收录包括人物，场景等多方面美术设定。

徽章礼盒[编辑]

徕2011年1月推出，收录60枚配合游戏主题个徽章，同道还送集成到1.3.7版本个《古剑奇谭》游戏安装光盘。

原声音乐集[编辑]

徕2011年3月18号推出，收录101首游戏里配乐道主旋律华丽钢琴谱、一些乐曲乐谱（5首）。箇独立周边道豪华版里送个原声音乐光盘勿同。

企划设定集[编辑]

徕2011年12月02号推出，包括游戏里个交关设定元素、全对话剧本、企划编写个构思、用意，还原《古剑奇谭》个设计过程。

官方情节小说[编辑]

全名《古剑奇谭•琴心剑魄》，由游戏主企划某树担当故事原案，宁昼执笔，2012年7月徕中国大陆由湖南美术出版社出版发行，还徕2013年5月由青文出版社徕台湾出版发行。

搭界事体[编辑]

存档门事体[编辑]

7月19号，有玩家发现游戏存档里竟讲包括用明文存储个游戏序列号，假使掉换或者公开发布游戏存档，毛容易导致序列号泄露。随后游戏吧发出紧急公告，提醒用户勿要交流存档[7]，并徕7月20号发布补丁修复该问题[8]。但是，官方发现研发里个重大失误过后，还没道歉，反过来畀责任推卸畀玩家，引发一部分玩家诟病[9]。

香港繁体版光盘压制错误事体[编辑]

2010年12月24号，香港繁体版《古剑奇谭》发布开卖。开卖几日，就有部分玩家徕官方论坛还有巴哈姆特等论坛发帖讲：香港繁体版《古剑奇谭》徕游戏到打败噬月玄帝以后进安陆县之先，会出错退出。后头官方测试证实，箇问题是由光盘压制问题导致，并徕2011年1月7号发布公告讲[10]会朝玩家供应更新版个光盘掉掉，同道附带DLC《千古剑灵》个激活码作为补偿。

评价[编辑]

游戏评价
媒体评分
媒体 得分
《大众软件》 8.5/10[11]
腾讯游戏 9.0/10[12]
所得奖项
2011年获《巴哈姆特游戏大赏》人气单机游戏银赏[13]

游戏发布以来，得到大多数媒体道玩家个正面评价。评测普遍觉得，游戏画面比较华丽，有丢次世代游戏个风范。另外，音乐优美，情节还精彩，系统丰富式样多，值当花时光琢磨。但是游戏个勿足地方也毛明显，主要是游戏Bug太多，情节冗长，硬件优化勿足，人动作硬锵锵等。游戏发售之后，上海烛龙推出交关补丁，大多数个Bug道别垯一些问题解决了得。但是优化水平还没达到官方基本配置可以流畅游戏个要求。

综合各大媒体个评价来望，该游戏可以讲是近年来中文单机RPG里个佳作。腾讯游戏评价游戏“清新明朗，特色鲜明，古朴大气”[12]，太平洋游戏网讲佢“基本达到箇毛国产单机游戏个巅峰”，但是也指出游戏有勿少小毛病[14]。电玩巴士标出游戏画面、情节道人设危险出彩，但是系统还缺少丢惊喜，蛮多bug还要改进[15]。《大众软件》畀游戏打出8.5分，觉得游戏品质上等，情节精彩，画面绚丽，系统创新，“离史诗个殿堂就一步之遥”；不过情节叙述太过拖沓，属于“慢热型”游戏，慢慢较玩落去才仔会感觉到味道[11]。

但是另外一面首，《电脑报》则刊文批评《古剑奇谭》重炒作轻品质，讲佢是“击碎国产单机顶后个梦”。文章列出游戏七宗罪，指责游戏销量喜人可惜质量低劣，并畀“存档门”责任归罪到玩家，对中国国产单机业造成毛大伤害[9]。后头来还畀游戏同中国著名劣作《血狮》相提共论[16]。文章一经发表，立马徕玩家里引发轩波一场。有玩家觉得文章基本符实，也有玩家讲列出个些问题大多数老早就解决，并撰写《电脑报七宗罪》来反驳。有些国产单机游戏个支持人控诉箇篇报导太过偏颇，让玩家“畀代表”。[17]游戏制作人张毅君亦徕渠微博暗指《电脑报》有自家炒作之嫌[18]。

参望[编辑]

注释[编辑]

  1. ↑ 上海软星2007年9月14号散伙（参考 仙剑开发公司上海软星确定9月14号解散 仙剑前途勿明 档案，存勒互联网档案馆当中。（2018年10月1号））后，同年10月上海烛龙公司成立，11月原来上海软星骨干员工接连接徕上海烛龙就职（参考：上海烛龙信息科技有限公司官方网站 烛龙沿革），仙剑奇侠传三、外传、四代个监制张毅君当上海烛龙总经理。
  2. ↑ 仙剑奇俠傳四团队单机《古剑奇谭》震撼公布. 原始文档勒2019-11-07存档. 访问日脚2013-10-12.
  3. ↑ 箇角色徕游戏个开头个名字是韩云溪，非百里屠苏，后头到特定情节之后才仔变箇名字。
  4. ↑ 游戏玩家觉得晴雪酒指个是梨花酒，因为古代诗人常把梨花比作雪。
  5. ↑ 玉红草曾徕《仙剑奇侠传三外传•问情篇》个支线里出现
  6. ↑ 香港繁体版道台湾繁体版个海底风情包均是跟牢实体游戏赠送，勿特零清卖。
  7. ↑ 《古剑奇谭》存档问题紧急公告. 古剑奇谭 (2010-07-19). 原始文档勒2016-03-06存档. 访问日脚2010-08-20.
  8. ↑ 《古剑奇谭》1.0.4补丁发布公告. 古剑奇谭 (2010-07-20). 原始文档勒2016-06-24存档. 访问日脚2010-08-20.
  9. ↑ 9.0 9.1 《古剑奇谭》 打破国产单机顶后个梦. 电脑报 (2010-08-04). 访问日脚2010-08-28.[链接坏脱]
  10. ↑ 繁體版香港區問題光碟掉換公告. 原始文档勒2019-09-14存档. 访问日脚2013-10-18.
  11. ↑ 11.0 11.1 古剑奇谭．大众软件．2010，8月下：130页。
  12. ↑ 12.0 12.1 腾讯游戏：《古剑奇谭》游戏独家评测_游戏_腾讯网. 腾讯游戏 (2010-06-26). 原始文档勒2019-11-19存档. 访问日脚2010-08-20.
  13. ↑ 《古剑奇谭》获2011年巴哈姆特游戏大赏银奖.
  14. ↑ 绝对勿容错过！国产神作《古剑奇谭》评测. 太平洋游戏网 (2010-07-21). 原始文档勒2010-08-30存档. 访问日脚2010-08-20.
  15. ↑ 中华第三剑【古剑奇谭】倾心评测. 电玩巴士 (2010-07-11). 访问日脚2010-08-20.[链接坏脱]
  16. ↑ 单机游戏大讨论之一：中国单机游戏让玩家毛受伤？. 电脑报 (2010-08-19). 访问日脚2010-08-20.
  17. ↑ 《古剑奇谭》获玩家认可[链接坏脱]
  18. ↑ 工长君个微博. 新浪微博 (2010-08-02). 访问日脚2010-08-20.

外部链接[编辑]

取自“https://wuu.wikipedia.org/w/index.php?title=古剑奇谭_琴心剑魄今何在&oldid=305728”