包起帆

包起帆（1951年2月2号生），男，上海人，中华人民共和国工程师、发明家。1968年参加工作，乃朝任华东师范大学国际航运物流研究院院长。曾任上海国际港务（集团）股份有限公司副总裁、上海市人民政府参事、中国发明协会副会长。

生平

1968年，初中毕业个包起帆勒垃上海港务局白莲泾装卸作业站做生活，6年以後脚骨折，改做机修车间个修理工；1977年进仔上海市业余工业大学，勒垃起重运输机械专业半工半读，1981年毕业。1978年，因位工伤调职到原上海港务局南浦港务公司，负责修理码头起重机。箇辰光，伊为咾改善工人木材装卸个条件，发明“木材抓斗装卸工艺系统”，获得专利授权，故咾大家叫伊“抓斗大王”。1985年加入中国共产党。1996年，调职上海港务局龙吴港务公司。为咾拿箇隻港口水文条件弗适合外贸集装箱个劣势规避脱，包起帆帮伊同事一道研究，1996年12月15号开创中国水运史丄第一条内贸标准集装箱航线。2001年，做上海港务局副局长（分管技术）；上海港务局改制以后，做过上港集团副总裁。

2005年6月份，包起帆从武汉理工大学物流管理专业毕业；2011年，包起帆畀武汉理工大学请去做客座教授。

荣誉

1981年，包起帆获评上海市劳动模范；1989年、1995年、2000年、2005年、2010年，包起帆连续五届获得全国劳动模范称号，是共和国60位最具影响力个劳动模范；1985年、2004年，包起帆获得全国五一劳动奖章两趟。2007年，包起帆获评第一届全国敬业奉献模范。

2006年5月10日，包起帆勒垃巴黎国际发明展览会获得4枚金质奖章，成为105年以来单趟展览会丄获得顶多金奖个发明家。箇当中，专家认为包起帆团队研制个“集装箱电子标签系统”会得是集装箱运输个革命。2011年，箇隻电子标签系统畀国际标准化组织正式标准化，也就是ISO 18186。伊还勒垃1992年帮2008年分别获得比利时利奥波德军官级勋章搭仔比利时王冠军官级勋章，1999年获得聂荣臻发明创新奖，2007年获得何梁何利科技创新奖，2010年获得发明者世界联合会特别奖。2018年12月获评改革先锋称号。

参见

• 上港集团