入唐八家

入唐八家(意思就是到唐朝(中国)去个八家头)是指日本勒平安时代(公元784-1192年)个中日文化交流背景下头，派送个所谓遣唐使到当时是唐朝个中国去学习佛教。伊拉学得精通密教经典，随后东渡回到日本，建立了日本个天台宗特之密教(又叫真言宗)，其中一共有八位和尚，名字叫做：最澄、空海、常晓、圆行、慧运、宗睿、圆仁、圆珍。个批人又被叫做「八家真言」、「真言八家祖师」。 伊拉当中顶早个最澄跟空海个两位大师被称为「平安两宗」。

平安二宗

勒中国唐朝唐德宗贞元二十年(公元804年)，先是最澄特之空海跑到中国来学习佛法。等伊拉回到日本，最澄先勒比睿山建立天台宗，成为台密创始人；空海就勒高野山创立真言宗，成为东密创始人。个两个人及伊拉个宗派被称为「平安二宗」。日本天台宗特之真言宗成立之后，就各有人跑来追随做徒弟，东密勒空海下头，有常晓、圆行、慧运、宗睿；台密勒最澄以后，则有圆仁、圆珍。个六个和尚，觉着跟自家个师父学到个么事还勿够，就索性照了最澄和空海个做法，也一个个跑到唐朝来学密。

入唐八家简述

最澄

最澄（767-822），俗名三津首广野，密教法号福聚金刚，是日本天台宗个开创者。伊建立了日本顶早个密宗道场能福护国密寺，本人还是牢有名个书法家，《久隔帖》是伊写个顶有名个书法帖。 最澄到了中国，就跑到天台山，先跟禅林寺个和尚修然，学习牛头禅；又勒国清寺跟和尚惟象，学到了大佛顶大契曼荼罗个佛法。还进入天台山佛陇寺，跟牢天台宗湛然个弟子行满学习天台教义。个当中也勒兴龙寺向顺晓阿阇梨学习密法。伊顿勒唐朝个这段求法时期当中，广泛学习天台教学、禅法、大乘戒和密教等，收获真是莫捞捞。

空海

空海（774-835）个经历就更加勿得了，伊俗名佐伯真鱼，后来被赐法号是遍照金刚，死后个谥号是弘法大师。伊勒三十一岁个辰光，被批准特之最澄大师到唐朝，跟青龙寺惠果阿阇黎做徒弟，个位师父对伊老好个，拿伊当继承人来教，得到金刚界与胎藏界二部纯密传承，被认为是唐密第八祖，日本佛教真言宗个开山祖师。而且勒空海法师学成归国没过多少辰光，中国就发生唐武宗毁灭佛教个事件，个桩事体勒历史上被称为会昌法难，弄得中土密法仪轨亡佚，只有伊带回去个佛法还保存勒日本。因为空海书法功夫也出道了，而被称为「五笔和尚」，著名作品为《风信帖》。

常晓

常晓律师（?-865），伊勒中国个辰光处于空海大师入唐到武宗灭佛之间。伊先勒东寺(教王护国寺)接受具足戒，跟随服侍空海和尚，学习密教，得到亲授密法灌顶。到之承和五年六月(公元838年)，伊自家去中国个因缘成熟，才奉皇旨出发，特之另外几名入唐判官菅原朝臣善主同行，六月到扬州，十二月住进栖灵寺大悲持念院，拜扬州栖灵寺文璨和尚为师。而文璨和尚是当时顶有名个「开元三大士」之一不空三藏个弟子，也是惠应阿阇梨个佛法继承人。因此，常晓律师主要是向文璨和尚学，深入密法，但也勒华林寺向元照法师学习显教经论，包含《三论》。伊写个佛教著作有：《尊胜佛顶次第》、《入唐根本大师记》等。

圆行

圆行法师（799-852），伊是京都人，老早先勒元兴寺学习，之后接受空海大师个密法教导。承和五年（838）到唐朝来，勒青龙寺向义真和尚学到金刚、胎藏两部大法，回到日本后，伊建立了灵岩寺、大山寺。著作有《金刚界记》、《五大虚空藏法》。

慧运

伊也叫惠运（800-871），京都人，俗姓安昙。先勒东大寺泰基和尚个地方学习法相宗，后来跟日本东寺个实慧和尚受具足戒。到唐文宗开成三年（838，但也有人认为是武宗会昌二年）来唐朝，受了长安青龙寺义真和尚个灌顶。伊回到日本后，驻锡勒安祥寺，后来还补了只东大寺别当个职务。作品有：《菩提心戒仪》一卷、《金刚界要记》一卷等。

圆珍

圆珍（814-891）生勒讃岐国金仓郷（今香川县）个善通寺，俗姓和气，字远尘。家庭出身是豪族，同时也是空海（弘法大师）个外甥，伊成为天台寺门宗个宗祖、日本延历寺第五代座主。圆珍认为佛教个教法虽然可以分成显密，但各种教法其实全部是显密兼具；显为方便权教，密为真实教。针对圆仁个「理同事别」思想，也就是发扬「圆劣密胜」之思想。醍醐天皇延长五年（ 927）敕谥给伊只「智证大师」个称号。

十五岁登比叡山，拜义真大师(最澄到中国去个辰光带个翻译)为师，廿岁得道受戒。日本仁寿三年（853）到中国来顿了五年，勒唐朝开元寺学天台教仪，唐宣宗大中九年（855）又拜青龙寺法全为师学习密教、还广泛学习悉昙等各宗，最后拿经疏一千卷带回日本。伊著有《法华集论记》、《授决集》、《观普贤经记》、《大日经指归》、《诸家教相同异》等，另外还有《传教大师略传》、《行历抄》、《山王院在唐记》等。

流传到现在个〈梁皇帝谶〉一词，最早是发现勒圆珍携回日本个经书目录里。

宗叡

宗叡法师（808-884）姓池上，是日本真言宗和尚。伊早年跟随兴福寺个义演学习法相宗，跟比叡山义真学习天台教义、从圆珍个搭学到金刚界、胎藏界两部密法、跟实慧学真言密教，还受到禅林寺之真绍个灌顶。日本贞观四年（862）伊自家来到中国，拜见汴州个玄庆阿阇梨，受到金刚界灌顶。勒到处跑个五年里，伊拜了交关真言师父，教伊深奥个密法要领。最后带回去牢多经书、法器等闶进东寺个经藏。着有《胎藏界念诵次第》、《后入唐传》等。

圆仁

圆仁法师（794-864），下野人，俗姓壬生。伊是日本天台宗个三祖，后来还得了只谥号叫慈觉大师。伊写个《入唐求法巡礼行记》是研究唐代佛教个重要著作之一。

伊九岁进入大慈寺修行，十五岁就拜师跟牢比叡山最澄大师。承和五年（８３８）奉敕来华，以请教僧身份随最后个一批遣唐使到中国求法，修习显密各门。曾经勒五台山志远门下，研习天台宗教义；到了长安，皇帝让伊住勒资圣寺。先拜大兴善寺元政阿阇黎学习金刚界大法，又从青龙寺义真个搭学胎藏界法并受到灌顶，跟元法寺个法全和尚学仪轨，还跟醴泉寺个宗颖法师学修止观法门。后来发生了会昌法难，伊就勒大中元年（847）请了559卷经书带回日本。伊自家个著作有《金刚顶经疏》、《苏悉地经略疏》、《显扬大戒论》。