依夫城堡

好文
出自维基百科,自由个百科全书

依夫城堡
依夫城堡个城

依夫城堡(法文:Château d'If),造勒马赛弗留利群岛(Archipel du Frioul)上个城堡。

城堡建设[编辑]

1516年辰光,法国国王弗朗斯伐一世(François Ier)来玛里娘打仗,一落头地打到马赛。从依夫岛望,渠分析马赛根本呒没防外侵个防卫设施,怪得渠命令来岛上造一个防卫城。隔脱仔8年,西班牙国王卡洛斯一世只想吃落马赛。虽然讲特派大臣米朗达勒(Mirandal)拿进攻部队打退哉,不过箇事体还讲明一个问题:城市进口个防卫要加强。箇年,也便是1524年,第一批城墙开造咾,望渠里好保护港口,外加派仔两百个兵搭廿二门大炮摆勒岛上。

马赛人弗买账,还搭箇只城堡起着只绰号叫“讨惹厌个邻舍”(L'importune voisin)。马赛人开始争论箇城堡,因为来1481年前,马赛弗是法国领土。怪得对渠里来讲,城堡是法国国王对马赛掌权个象征。

城堡最终来1531年造好。西班牙国王卡洛斯一世后歇来登1536年也亲自进攻马赛,不过渠登拉城堡边上兜仔几圈,终归还是呒没办法拿渠攻下来。

犯人[编辑]

依夫城堡造好交关年数之后,大约莫来16世纪中期,渠多仔一项监牢个功能。为仔城堡个地理位置搭建筑风格咾,渠变成理想个监牢,难板有人逃得出。只要有人拿城堡守牢就好哉,外加城堡也从来朆有人来进攻。

关拉里向个头一个犯人是1580年盎赛勒姆骑士(Chevalier Anselme),渠畀人指控阴谋推翻君主制度,后首来来拉渠牢房里畀人吊杀。

除脱仔关过好星反皇室个人,1598年南特赦令颁布之后,牢房里向也关过好星新教徒。大约3500个人,关着过个有名个有强·赛合(Jean Serres)还有艾里·诺(Elie Neau),关箇星人关200年。

城堡也关过大家族个儿,最后收着㪬章信[1]。有个例子是米拉鲍(Honoré Gabriel Riquetti, 米拉鲍伯爵 Comte de Mirabeau)。伊爷勒1774年帮伊关仔里向。但是伊生活蛮惬意,住个地方亦大,长阔,还有壁炉,窗门许。伊平常寻寻司令开心,饭堂个女佣人勾搭勾搭。另外,依夫城堡也关过一只船(Grand Saint-Antoine号)个船长强-白底斯脱·写导(Jean-Baptiste Chataud),该船勒1720年畀鼠疫带到马赛。

法国大革命辰光,反倒呒多少人关勒里向。克莱办将军(Général Kléber)是犯人里向有名点个末脚个。1800年勒开罗畀人暗杀,伊个尸体送转法国,放勒城堡里向放18年。

1848年6月份骚乱,120个人畀伊关勒里向。

共和主义者[编辑]

1852年12月2号国家政变之后,304个犯人畀伊塞进城堡肚里,准备发送到阿尔及利亚圭亚那(La Guyane)去。

1870年,法国第二帝国崩脱,共和主义者畀人镇压。巴黎独立消息传出去之后,伽斯冬·克莱米友(Gaston Crémieux)当仔占领省政府运动个头头。箇星人畀部队捉出,公社解体,伽斯冬·克莱米友畀人送进依夫城堡,后晚勒1871年枪毙。

犀牛[编辑]

犀牛木版画,作者阿尔孛莱希托·杜莱尔,目前勒勒巴黎小宫博物馆(Musee du Petit-Palais)

1513年,印度古石拉王国(Guzarat)个国王送畀葡萄牙国王艾马努艾勒大帝(Emmanuel le Magnifique)一只亚洲犀牛。伊收着之后准备送畀罗马教皇莱翁十世(Leon X)。箇咾开始从里斯盆(Lisbon)出发送犀牛到罗马,其中1516年经过马赛依夫岛。欧洲人从来朆看见过箇种活牲,市里向人侪去看好孛相,甚至弗朗斯伐一世也跑过来看。

犀牛勒勒岛浪养仔几个礼拜,后来坐船去罗马,但是海浪大风暴帮船打沉脱,后来仔人勒勒极挪阿(Genoa)海滩看见沉脱船个木架,海员尸体海岸浪跑跑看见一个。

基督山伯爵[编辑]

依夫城堡真正出名是因为一本书:大仲马个《基督山伯爵》。箇本小说个主人公艾特蒙·堂戴斯(Edmond Dantès)就是关勒依夫城堡里向个。

开放旅游时刻表[编辑]

  • 5月1号 - 9月15号: 天天开放 9点-18点30
  • 9月16号 - 3月31号: 礼拜一弗开放 9点-17点30
  • 4月1号 - 4月30号: 天天开放 9点-17点30
  • 1月1号、12月25号弗开放

价钿[编辑]

  • 18岁朝下免费
  • 成人票 5欧元
  • 优惠票(25岁朝下学生子) 3.5欧元
  • 特别职业免费(记者、建筑师等等)

图片欣赏[编辑]

内部链接[编辑]

参考注解[编辑]

  1. 㪬章信,法文:Lettres de cachet,国王命令发出去,要毒杀啥人或者流放啥人。

外部连接[编辑]

维基共享资源里向寻得着搭该篇文章搭界个多媒体资源: