蛋白质

来自 吴语维基百科
蹦到: 导航搜寻
肌红蛋白

右图是肌红蛋白个3D(立体)结构,有颜色个部分代表个是α螺旋。搿个蛋白质个结构首先拨Max PerutzJohn Cowdery Kendrew爵士勒1958年通过X光结晶技术发现,居使得伊俚获得了诺贝尔化学奖。 蛋白质个英文单词 protein (来源于希腊文protas ,意思是“最重要”),中文名取“蛋白质”是因为蛋白质是鸡蛋个主要成分。头一下子使用protein是勒到一封1838年6月10号Jöns Jakob Berzelius寄拨Gerhardus Johannes Mulder个信当中。

勒信里向,伊写道:(法语

«Le nom protéine que je vous propose pour l’oxyde organique de la fibrine et de l’albumine,

je voulais le dériver de πρωτειοξ, parce qu'il paraît être la substance primitive ou

principale de la nutrition animale.»

翻译成吴语: “吾建议侬用protein搿个名字指纤维蛋白血白蛋白个有机氧化物。吾想搿个名字应该从希腊文πρωτειοξ引申起来,因为伊象是动物营养物最原始或者是最主要个物质。”

蛋白质是一种有机高分子个复合体,伊主要是由多个氨基酸通过肽键互相连接组成。蛋白质对于有生命个个体、细胞,甚至病毒发挥伊俚个生理功能有非常重要个意义。

弗同个蛋白质有自家弗同个生理功能,有星蛋白质是催化化学反应,有星作为组织结构,譬如讲作为细胞骨架个主要成分。除开伊俚,蛋白质还有免疫功能、运送功能等等。

蛋白质作为生物高分子,搭高聚糖核酸等物质是构成生物机体个基本组成。伊主要是由氨基酸按照一定顺序排列个高聚物,氨基酸顺序个信息通过基因代码储存起来。通过基因个转录翻译,细胞可以提取信息,並合成出蛋白质。

营养学里向,蛋白质通过消化作用拨分解成自由个氨基酸,提供拨机体合成伊需要个物质,有星氨基酸人体本身呒处自家合成,只好通过食物从外界吸收。 蛋白质勒1838年拨Jöns Jakob Berzelius发现,之后一直是生物化学广泛研究个分子之一。

组成搭合成

蛋白质是通过20种弗同个L-α氨基酸构成个高聚物,勒组成个过程当中,需要利用储存勒勒基因里相个信息。先从基因转录到RNA(核糖核酸),再通过转运RNA(tRNA)遵守密码子-反密码子法则运到核糖体当中。按照信使RNA个序列合成出蛋白质。当然勒居过程当中酶是弗可缺少个。 由氨基酸形成个多肽链有两个末端,根据末端个弗同个官能团(-COOH或者——NH2),分别称为C端搭N端。

结构[编辑]

蛋白质3D结构

蛋白质是由氨基酸通过肽键按照一定个顺序连接形成个多肽链。蛋白质个基本单位是氨基酸,氨基酸个氨基搭羧基通过缩和反应形成肽键,由多个氨基酸组成个肽称为多肽。 蛋白质个分子结构可以分成四级机构: 一级结构:组成多肽链个氨基酸序列。 两级结构:借助不同肽键个C=O搭N-H基团之间个氢键形成个稳定结构。 三级结构:由一条多肽链个不同氨基酸侧链之间个互相作用形成个稳定结构。 四级结构:由不同多肽链亚基间相互作用形成个有特定功能个蛋白质分子。四级结构弗一定勒所有蛋白质当中侪可以寻着。 一级结构借助转录过程中形成个共价键维持。通过蛋白质折叠形成高一级结构。特定个多肽链可能有弗止一个个稳定构型,每种构型侪有自家特定个生物活性,其中只有一种有天然活性。 假如说一个蛋白质某个区域有二级结构,一般是α螺旋或者β折叠。随机个区域拨称为随机卷曲。多肽链通过氢键厌水作用或者二硫键等等作用进一步折叠成更加大个三维结构。 蛋白质一般是大来交关个分子,分子量可能达到3000kDa(1Da相当于1g/mol)。差弗多搿个分子量等级个氨基酸链拨认为是蛋白质,稍微短点个氨基酸链拨称为“多肽”,“肽”或者“寡肽”。分界线並弗明确。

蛋白质个功能[编辑]

生理功能

蛋白质基本浪勒细胞个各个功能里向侪发挥作用,包括信号转换搭新陈代谢等。生命,从化学个观点看,只弗过是蛋白质发挥作用个过程,但是有一点吾俚要承认,就是还需要DNA(脱氧核糖核酸)来专一合成蛋白质。蛋白质有下头几项基本功能:

  1. 酶,催化新陈代谢过程当中个各个反应。
  2. 结构组成部分,譬如:胶原蛋白
  3. 调节功能, 譬如转录过程当中控制因子。
  4. 信号发送分子搭伊俚个受体,譬如激素荷尔蒙)搭伊俚个受体。
  5. 防卫功能, 包括免疫系统个抗体、毒素,来保护机体弗受侵害。

营养功能

蛋白质有处(同 可以)用来生产能量,但是伊俚必须首先拨转化成普通个代谢物质。搿个过程需要脱氨——毒性大来交关个物质。氨勒肝脏里拨转化为尿素,毒性下降,拨排到尿(浠,勒吴语拼音里相念Sy或者Shi)里。另外一星动物帮尿(浠)素转化成尿酸。 蛋白质是动物性食物个必需成份,对生长搭组织发育非常重要,伊可以从肉、鱼、鸡蛋、牛奶搭豆制品当中吸收。 蛋白质缺乏一般涉及到营养学,尤其是落后贫穷国家人民个饥荒搭营养弗良。甚至勒发达国家,象美国,居也是一个拨忽视个健康因素。因为种种原因,食物严重依赖碳水化合物,缺少必需个氨基酸。蛋白质缺乏可以导致病症,譬如疲劳,脱发,头发掉颜色(本来是黑头发个变成功红颜色),肌肉重量减轻(蛋白质可以修复肌肉组织),体温低,激素失调。严重个蛋白质缺乏还会得致命。 有时候造食物过敏搭过敏反应个元凶也是蛋白质。因为各种蛋白质个结构侪稍微有弗同个,有星蛋白质会得引起免疫系统个反应,而另外一星非常安全。交关人侪对长生果当中个有星蛋白质,或者贝类或其他海鲜个蛋白质过敏,但是呒得多少人对所有居三种侪过敏。

References[编辑]

External links[编辑]

Commons-logo.svg
维基共享资源里向寻得着搭该篇文章搭界个多媒体资源: