来自 吴语维基百科
蹦到: 导航搜寻

吴王僚(?-前515年),姓姬,名僚,又叫州于。《春秋公羊传》讲俚是吴王寿梦个庶长子,但不过《史记》、《吴越春秋》讲俚是余昧个倪子。春秋个辰光吴国第廿三个君主(前526年─前515年在位)。后来畀俚个阿侄公子光个刺客专诸刺杀。

生平[编辑]

余眛四年(前527年),余眛死脱,想传位畀公子季札。季札避让,逃出去哉,僚继位为王。

王僚二年(前525年),公子光带兵讨伐楚国,畀打败,还拿吴先王个舟也丢脱哉。公子光怕得罪,就偷袭楚军,拿王舟‘余皇’抢转来再回军。

王僚五年(前522年),楚国流亡出来个伍子胥逃到吴国,公子光以客礼来招待俚。公子光是诸樊个倪子。俚认为:“吾父兄弟四人,当传至季子,季子即不受国,光父先立。即不传季子,光当立”所以暗中结纳贤士,好来袭击僚。

王僚八年(前519年),公子光征伐楚国,打败楚军,拿楚太子建个娘接回吴国。借势北伐,打败陈、蔡个军队。

王僚九年(前518年),楚国边城卑梁氏少女搭吴国边城女子抢采桑叶,两家人家互相攻杀,两国边邑官长听说过后,互相发兵进攻,吴国边邑畀灭脱。吴国大怒,派公子光又征伐楚国,攻克居巢、钟离两城再转去。

伍子胥逃到吴国个辰光,向吴王僚陈述之伐楚个好处。公子光说:“胥之父兄为僇于楚,欲自报其仇耳。未见其利。”伍子胥再明白公子光有别个目的,伍子胥介绍一个叫专诸个勇士畀公子光。公子光相当高兴,拿伍子胥做宾客对待。伍子胥退居郊外耕作,等待专诸成功。

王僚十二年(前516年)冬,楚平王死脱。

王僚十三年(前515年)春,僚借楚国有国丧攻伐楚,派公子掩余、烛庸包围楚国个六、灊二邑,派季札出使晋国,观察诸侯个动向。但不过楚国派兵断之俚个后路,吴兵弗能回国。公子光讲:“此时不可失也。”告诉专诸:“不索何获!我真王嗣,当立,吾欲求之。季子虽至,不吾废也。”专诸讲:“王僚可杀也。母老子弱,而两公子将兵攻楚,楚绝其路。方今吴外困于楚,而内空无骨鲠之臣,是无奈我何。”公子光讲:“我身,子之身也。”

四月丙子,公子光勒地下室埋伏之甲士,然后宴请僚。僚派兵立勒旁边,从王宫到公子光窝里,公子光窝里大门、台阶、屋门、坐席旁边,侪立满之僚个亲兵。僚到之后,公子光以脚浪有毛病为借口,进之地下室,派专诸拿匕首囥勒烤鱼肚皮里,假装上菜。专诸拿鱼送到僚门前,从鱼肚皮里拿出匕首刺向僚,僚当场就死脱哉,但不过左右卫士也拿专诸杀脱。公子光自立为王,也就是阖闾。封专诸个倪子为卿。

季札回到吴国,讲:“苟先君无废祀,民人无废主,社稷有奉,乃吾君也。吾敢谁怨乎?哀死事生,以待天命。非我生乱,立者从之,先人之道也。”就到僚个墓浪,回报之完成外交任务个经过,痛哭一番,之后回朝廷等待新君个命令。公子掩余、烛庸听说公子光自立为王,就投降之楚国,畀楚王封勒舒地。