伍子胥

来自 吴语维基百科
蹦到: 导航搜寻

伍子胥(-前484年),名员字子胥,以字行。春秋个辰光楚国椒(今安徽阜南焦坡镇)人,后来吴国拿俚封勒申,所以又叫申胥。伍子胥个先袓伍举,以正直进谏楚庄王而得名声,所以俚个后代勒楚国也蛮有名声。

生平[编辑]

伍子胥个爷伍奢是楚国太子建个太傅,太子建畀奸人诬陷,伍奢也受到之牵连。伍奢畀监禁个辰光,楚平王要伍子胥搭俚个阿哥伍尚来救,弗然就杀脱俚哚个爷。伍子胥晓得楚平王想杀脱俚哚父子,劝俚个阿哥伍尚覅去,留有用之身替父报仇,但不过伍尚弗舍得看之俚个爷畀杀脱而弗救,还是去救,果然弗久就搭伍奢一淘畀杀脱哉。

搿许辰光伍子胥想要逃到吴国去,但不过路途忒远,只好放弃。之后俚因为太子建勒宋国,就去投靠俚哉,但宋国内乱,只好搭太子一淘奔郑。勒郑国,太子建为之搭晋国联合谋反个意图畀郑定公晓得而畀杀脱,最后子胥只好带之太子建个倪子一淘投奔吴国。途中经过陈国想要出昭关到吴国,昭关守卫勒嗨到处捉俚哚,两个人只好徒步逃脱。

伍子胥逃出楚国过后,白天躲藏,夜里赶路,弗久就生毛病哉,搿许辰光身浪也呣没铜钿,只好勒路边浪讨饭。后来畀吴国公子光发现并任用。

勒吴国,伍子胥结交专诸搭要离,让专诸刺杀吴王,让公子光成为之吴王阖闾;之后又让要离刺杀吴王僚个倪子庆忌。

阖闾重用伍子胥,再用伍子胥发掘个孙武来做元帅,发兵击败楚国,破楚首都郢;子胥掘楚平王墓,鞭尸三百,报父兄之仇。

前496年,阖闾搭越王勾践打仗,中箭,阖闾脚拇趾头受之伤,伤重弗治,死前喊倪子夫差,覅忘记脱杀父之仇。托伍氏辅佐少君,封俚最高爵位,称相国公。

夫差继位过后,打败之越国,越王勾践投降,伍子胥认为应该一举消灭越国,但不过夫差听之伯嚭个谗言,弗听“联齐抗越”个主张,前484年赐死伍子胥,送之一把剑畀伍子胥喊俚自杀。子胥勒愤恨之余,留下遗言,要窝里人勒俚死托以后拿俚个眼睛挖出来,挂勒东城门浪,要亲眼看看越国军队灭脱吴国。

吴王夫差极怒,五月初五拿伍子胥个尸首用鸱夷革裹好丢勒钱塘江里厢。后来吴国果然畀越王勾践灭脱,夫差羞于勒阴间看见伍子胥,用白布蒙牢双眼过后再举剑自尽。

伍子胥有一个倪子托畀齐国个鲍氏,后来别为王孙氏。

Commons-logo.svg
维基共享资源里向寻得着搭该篇文章搭界个多媒体资源: