静力学

静力学是经典力学个分支，专门解析物体拉静力平衡状态下个负载（力、力矩）。拉迭个状态下，或许有外力作用拉此物体；但是，各个分系统个相对位置、成分、结构仍旧保持弗变。当呈静力平衡状态辰光，系统或者是静止个，或者伊个质心维持常速运动，也就是讲系统是力学平衡状态个。经典力学里向，静力解析个重点是比较静力学，也就是比较各种弗同个静力平衡状态，並弗看中系统变换状态个过程。

设${\textbf {F}}$是作用拉系统上个合力，$m$是系统总质量，${\textbf {a}}$是系统加速度，箇么按照牛顿第二运动定律有${\textbf {F}}=m{\textbf {a}}\,$（粗体表示向量，即有方向个量）。

假设加速度为零，箇么当进行外力力矩求和个辰光有${\textbf {M}}=I\alpha =0$，当中${\textbf {M}}$是外力力矩个和，$I$是质量惯性矩，$\alpha$是系统个角加速度。对于$\alpha =0$个系统，自然有${\textbf {M}}=0.$

合外力${\textbf {F}}=m{\textbf {a}}=0$又叫静力平衡第一条件，合外力矩${\textbf {M}}=I\alpha =0$又叫静力平衡第二条件，用来求解作用拉系统高头个未知量。

历史

阿基米德（c. 287–c. 212 BC）勒拉静力学领域做仔先驱个工作。

应用

固体

分析结构个辰光，静力学邪气重要，要靠伊算系统阿好达到静力平衡。譬如建筑学搭结构工程学当中，重要个是质心个位置，箇决定了外力作用个物体个稳定性。假使质心勒拉地基外头，箇么力矩起作用，物体弗稳；假使质心勒拉地基里向，箇么呒没合力矩作用，物体稳定；假使质心同地基重合，箇么系统处于准稳态。

流体

流体静力学研究静止状态个液体。静态液体个特性是内部每個分子所受个力勒拉任何一個方向侪是同值个，弗然，液体会得往合力个流过去。箇只概念1647年由法国数学家布莱兹·帕斯卡提出个，大家叫伊帕斯卡定律，勒拉水力学里向有交交关关重要应用。