罗马帝国

奧古斯都像 (公元後第一世紀初)

罗马帝国（拉丁文：Imperium Rōmānum）是公元前27年屋大维掌握政权之后，构造个帝权国家。迭个政权拿老早个罗马共和国替代，弗过立在名义上依然维持元老院搭罗马人民个名号，皇帝自称第一公民。罗马帝国是古典文明发展个挨末阶段，是一个大一统帝国。早期个罗马帝国，因为军事搭文官系统弗大健全，立在屋大维死脱之后，经常发生政变情况，一直到2世纪，有五贤帝治国，才有长期稳定。弗过，因为帝国个经济衰退搭组织力下降，到3世纪，开始进入长期个动荡年代。284年，军阀戴克里先成为罗马帝国皇帝，伊一切侪以波斯作为样板，用宫廷法术替代元老院，用帝王神圣替代为人民服务，从此让罗马帝国走上完全弗同老早个专制道路。到公元4世纪，君士坦丁大帝宣布基督教合法，并推广基督教，古罗马传统个异教也受到打击，同时，罗马帝国也立在5世纪初最终分裂。西面帝国立在蛮族入侵个浪潮当中畀东哥特人灭脱。东面已经彻底专制基督教化个帝国，首都立在君士坦丁堡，文化希腊化，已经弗好当做古典文明个同类哉。迭个东部帝国个首都老早名字叫做拜占庭，所以乃朝一般称呼叫拜占庭帝国。