慈禧太后

西佛爷

慈禧太后（1835年11月29号－1908年11月15号，穆麟德拼音：hiyoošungga gingguji iletu hūwangheo），那拉氏，满洲人，北京出生。伊是咸丰帝个妃子。同治帝个姆妈，光绪帝个抚养人，死之前一个月，选中宣统帝溥仪继承帝位。伊是晚清阶段顶有权势个统治者，见证从第二趟鸦片战争到清末新政所有历史事体。

生平

出生搭入宫

1835年，慈禧在拉清帝国首都北京个劈柴胡同出生，伊个家族出自满洲叶赫氏，属满洲镶蓝旗，虽然弗好讲是大富大贵，但终归世代为官，伊从小吃穿侪弗用操心，是典型个满洲贵族铁杆庄稼生活。

1852年，伊18岁辰光，参加北京旗人家庭必须参加个选秀女活动，畀皇室挑中，从此进入紫禁城，号“兰贵人”，居储秀宫丽景轩。

独宠后宫

咸丰四年（1854年）畀封为懿嫔（迭个词汇个满文含义是文雅），也是从迭个辰光开始，伊得到咸丰帝个宠爱，咸丰六年三月（1856年），伊生下咸丰帝独子载淳（即同治帝），晋封“懿妃”，次年，封贵妃，成为咸丰帝后宫当中排名第二个人物，又因为咸丰只有单独一个儿子，更加确保伊之后个地位。

热河上位

1860年，因为判断失误，英国同法国发动第二趟鸦片战争，清廷大沽口失守、又在拉八里桥战役当中输脱之后，为避免畀英法联军捉牢，只好急急忙忙跑路热河避暑山庄。慈禧也跟牢咸丰来到热河。1年过后，咸丰十一年七月十七号（1861年8月22日），咸丰帝因为天天搞女人，吃老酒，身体越来越推板，最终在拉承德避暑山庄烟波致爽殿内驾崩。伊个皇后畀尊为慈安太后，载淳即位，成为同治帝。慈禧因为是载淳个姆妈，也就自动成为皇太后，又因为慈安太后住避暑山庄烟波致爽殿东暖阁，所以又叫东太后，慈禧太后住烟波致爽殿西暖阁，所以叫西太后。

政变掌权

咸丰死脱个辰光，设计出一套保障自家儿子个制度，即：让肃顺为代表个八个咸丰信任个皇室远亲或者做题家，掌握朝廷个政治权，让自家个两个老婆（慈安同慈禧），掌握决定权。弗过，迭个制度一来弗曾考虑到自家阿弟奕䜣，二来对八大臣同两宫太后个矛盾估计弗足，老快就因为慈禧个干涉解体。1861年十月，慈禧、慈安同恭亲王奕到，通过发动辛酉政变，拿肃顺为代表个八个顾命大臣做脱，让自家成为清帝国个实际统治者。

垂帘听政

政变之后个慈禧，同慈安一道，借口同治帝年龄太小，就在拉紫禁城个养心殿设置门帘，让自家坐到皇帝身后个门帘当中听政，判断、处理事体。因为慈安本身是比较传统个满洲女人，弗大清爽汉文，而慈禧刚好反过来，汉字侪看得懂，满文倒是水平比较推板，导致慈禧参加政治活动个频率同听到个消息侪占据压倒性多数。个能，伊就彻底成为清帝国实际个控制人哉。

在拉同治辰光，慈禧对外做个主要事体，是明面高头赏赐曾国藩为代表个南方汉人地主一眼自我管理个实际权力，换取伊拉对中央个服从同表面恭敬。背地里，则通过杨乃武和小白菜之类个案件，拿湖南人、安徽人个实力釜底抽薪。对于同外国人打交道，慈禧因为咸丰出逃个记忆，表现个稍许灵活一眼，同意恭亲王个想法，开设总理各国事务衙门，作为对外国人打交道个场所。弗过，对于洋人提出个交关要求（比方讲直接搭同治皇帝见面，自由贸易之类），伊嘸多少兴趣了解，更欢喜随便应付，或者让李鸿章之类自家信任个洋务运动带头人去处理。

慈禧真正关心个，还是自家权利是弗是有彻底稳固。1870年代，同治帝年龄大起来之后，逐渐弗听伊个言语，让伊邪气操心。1874年，同治还因为感染天花死脱，之后，慈禧为稳固自家地位，立咸丰帝之弟奕𫍽之子载湉入嗣大宗，继承大清皇位，改年号“光绪”，两宫太后再次听政。

独揽朝堂

1870年代末，因为朝廷当中清流崛起，左宗棠回到北京，以及恭亲王长期掌握朝局，同慈安关系搭僵等关系，慈禧身体弗大灵光，经常生毛病，弗过，到1880年代头几年，几个问题一一消失。首先是1881年，慈安太后突然死脱。3年之后，清流同恭亲王因为法清战争个举措失误，让慈禧捉牢把柄，拿伊拉侪罢免调人，之后几年，慈禧享受难得太平年岁，伊信任个人变成功荣禄搭奕劻。心思花在帮光绪挑选老婆以及修造颐和园高头，1890年，伊拿处理政治个权力“归还”光绪，移居颐和园，开始退休生活。

弗过，1894年，慈禧因为要办六十岁生日，用脱交关本身要做国防建设个钞票，结果，在拉日清战争当中，洋务运动训练出来个北洋水师，以及之前平定太平天国之乱、捻匪、回乱个湘军、淮军侪一败涂地。个能，弗单单宣告洋务运动破产，也让光绪同慈禧个矛盾慢慢较因为到底是弗是要对帝国进行改革激烈起来。一帮主张要激烈改革，想凭借个能往高头走个读书人开始向光绪靠拢，形成所谓个“帝党”，而本身抗拒改革个道学家、满洲贵族，向慈禧靠拢，形成后党。

戊戌到庚子

1898年，光绪帝听从康有为等人个意见，开始进行大规模，激进个改革活动（戊戌变法），慈禧太后一开始对迭个举动表达过个人反对，弗过也弗强行阻止。弗过，光绪周边个文人侪认为，就因为慈禧身边个守旧派太多，才让变法操作弗起来，个能，伊拉就建议光绪寻个机会，发动政变，拿慈禧做脱，好放开手脚，彻底搞改革。弗曾想，还嘸实施，风声就已经穿出去，让慈禧晓得哉。慈禧为保自家个地位，立马召集荣禄、袁世凯，发动反制措施，夺回紫禁城控制权，软禁光绪帝，停止所有改革，拿康有为个同党谭嗣同等人捆绑到菜市口杀脱，康有为、梁启超等跑路到日本，从此长期同慈禧对立。

因为西方列强侪希望看到光绪变法，好让自家也加深参与清帝国活动个机会，所以伊拉对慈禧个重新上台，相当弗满意，之后经常表达愿望，希望好拿光绪放出来。弗过，迭个做法也进一步刺激到慈禧，让伊认为洋人是存心反对自家。

慈禧确实想拿光绪废脱，还为迭个目的选中过一个满洲贵族年轻人当所谓个“大阿哥”（也就是皇太子），就在拉迭个阶段，华北平原交关地方开始发生民间宗教发展出来个义和拳暴乱活动。拳民到处杀洋人，放火烧洋人个教堂，工厂，大阿哥为代表个满洲贵族看到机会，故意拿伊拉放入北京，计划用个帮人作为对付洋人个法宝。慈禧对义和团个真实水平认识比较清醒，弗过也晓得，几十万人万一处理弗好，要出大事体。后势来，伊决定用伊拉作为炮灰，攻击洋人个东交民巷，逼迫洋人屈服。

1900年5月开始，义和团大规模对东交民巷发动围攻，弗过因为慈禧并弗想让伊拉真正成功，只弗过想教训洋人一趟，所以，弗曾派多少正规军帮忙，导致拳匪一致嘸办法攻破东郊民巷。

1900年6月，八国联军在拉大沽口登陆，之后长驱直入，一路拿义和团之流侪灭脱。慈禧发觉事体失控，只好发挥传统特技，又带领清廷跑路，个趟一路西跑，去西安哉。

求和同新政

慈禧匆匆忙忙从北京跑路出来辰光，啥贵重物什也弗曾拿，又担心畀联军捉牢，只好穿破烂衣裳，吃粗粮粗糠，一直到山西境内之后，生活条件才稍许好一点。之后，伊拉一路西窜，9月初（农历）到达西安。

之后，伊委任李鸿章当全权代表，同洋人谈判，最终签订辛丑条约，为让洋人放过自家，伊基本同意洋人所有赔偿同改革方面个要求，从此也改变对洋人个态度。

1902年10月，伊启辰回銮，一路高头路过河南、河北，沿途百姓、官员吹吹打打，为伊到来铺路浪费，搞个好像是凯旋一样。1903年1月，伊回到北京，并且开始清末新政，具体内容实际浪同之前戊戌变法区别弗大，主要是允许各地开自家个议会，并且在拉教育、文化事业高头全面模仿西方。1905年，慈禧决定拿延续一千多年个科举制度废脱，从此清帝国全面执行近代化教育选拔体系。在拉军事高头，伊回来之后也彻底放弃之前个团练同旧军队，开始信任袁世凯个新军，让袁世凯在拉清庭个地位越来越高。1905年，慈禧下诏“预备立宪”，作为拉拢各地精英，对抗越来越流行个革命派个策略。

死脱同身后

1908年，慈禧身体开始弗适意，为避免自家死脱之后光绪重新上位，伊让人拿光绪用毒药杀脱，之后一天，慈禧自家也死脱哉。死之前，伊又选中第二代醇亲王载沣个儿子溥仪继承清帝国皇位，个就是宣统帝。

慈禧太后死脱之后，埋在清东陵，伊死脱之后第三年，辛亥革命爆发，清帝国灭亡。又十七年之后，慈禧个陵墓畀军阀孙殿英挖掘，慈禧尸体畀挖出来，暴晒凌辱，有研究认为，这也是为啥后势来溥仪要投靠日本个直接原因之一。