恆星

畫家想出來個白矮星繞牢天狼星轉個情況。美國太空總署個圖

恆星，是體積窮大、會發光、像球一樣個等離子體，發光是因為裏向一直勒垃核聚變，能量從當中經過內部，以電磁波形式放射出來。太陽就是離地球頂近個恆星，地球查弗多所有個能量儕是從太陽噠來個。恆星有「生」、「老」、「死」，死脫個恆星產生重點個元素，譬方碳、鐵、金。宇宙裏向窮大部份個物質集中勒恆星浪向。嘸不恆星，就嘸不該點重元素，也嘸不生物搭生命。

夜裏向天浪一點點個光，俗稱星，大部份就是恆星。叫恆星，是因爲俚篤離地球交關遠，老底子個人看見該點星，搭行星弗一樣，一經勒一個場化弗動，當仔俚篤「恆常」勒天浪箇隻位置。恆星該個詞勒《春秋》裏向就出現哉。天文學家估計全宇宙裏向有7×10²²（70,000,000,000,000,000,000,000）隻恆星。現在個資料來看，交關恆星儕有自家個行星。