公曆

公曆，是世界上多數地方用個曆法，現在用個公曆是格里曆（Gregorian calendar），也翻譯成功額我略曆、格列高利曆，是意大利醫生兼哲學家Aloysius Lilius改革儒略曆造出來個，由教宗格列高利十三世勒1582年歐洲頒佈推行。

特別個場化

格里曆搭儒略曆一樣，都是每四年勒2月份個月底加一日天閏日，必過，格里曆特別規定，所有弗好畀400整除個世紀年（就是阿末有兩個零個年份，1800年、1900年該浪）儕嘸沒閏日。別個好畀400整除個世紀年就有閏日，譬方1600年、2000年，所以2000年有2月29號。

每400年，格里曆就只有97個閏年，比儒略曆少3個。格里曆個一年平均有365.2425日天，接近平均回歸年個365.24219日天，就是差弗多每3300年再有一日天誤差，也接近春分點回歸年個365.24237日天，差弗多每8000年誤差一日天。比較下頭儒略曆平均一年365.25日天，差弗多128年就多仔一日天。到1582年辰光，儒略曆個春分日（3月21號）搭地球公轉到春分點個實際辰光已經交錯仔10日天。

格里曆開始用個辰光，同時規定，原本儒略曆1582年10月4號禮拜四個後頭一日天是格里曆1582年10月15號禮拜五，有10日天弗見脫哉，必過本來個禮拜朆改。格里曆個紀年沿用儒略曆，從傳統個耶穌養出來箇一年開始，也叫「公元」或者「西元」。

世界浪用個情況

格里曆是陽曆裏向個一種，中國勒1912年開始用，代替老底子個中國個農曆，農曆是一隻陰陽曆，格里曆勒中文裏向也叫陽曆、西曆、新曆。現在還有國家弗用公曆個。