2021年3月中美高层对话

中美高层对话，又好叫阿拉斯加会谈、美中阿拉斯加对话、中美阿拉斯加对话、中美阿拉斯加会晤或阿拉斯加会晤，是讲中华人民共和国搭美利坚合众国勒海2021年3月18号到2021年3月19号进行个一趟战略对话。勒美国阿拉斯加州安克雷奇举行。中方代表以中共中央政治局委员兼中央外事办公室主任杨洁篪帮国务委员兼外交部长王毅为首；美方代表以国务卿安东尼·布林肯帮国家安全顾问杰克·苏利文为首。

过程

3月18号会议开始前头，伊拉讲好4名高官每人向中美各6名记者作两分钟简短、公开个开场白。美国国家安全顾问杰克·苏利文讲：“美国弗寻冲突，但是欢迎激烈竞争，阿拉永远捍卫阿拉自家个原则，阿拉个人民，阿拉个朋友”。美国国务卿安东尼·布林肯讲中国破坏规则，威胁全球稳定，并表示：“美国会得讨论中国勒海新疆、香港、台湾个行径，以及中国对美国个网络攻击，搭仔对美国友邦（澳大利亚）采取个经济胁迫。美国对搿桩事体交关关心。”美国国务卿布林肯搭白宫国安顾问苏利文讲个闲话各2分多钟。

中共中央政治局委员兼中央外事办公室主任杨洁篪用了17分钟指责美国利用军事力量搭金融手段施压其他国家，滥用自身个国家安全，威胁全球贸易。中国内政方面浪，杨洁篪表示新疆、香港及台湾是中国𪥸分割个领土，中国坚决反对美国干涉中国内政。外加，有点非裔美国人勒美国畀杀脱，美国应该处理好自家事务，让中国管理自家个事体。外长王毅用了约莫4分钟补充发言，并表示勒对话前夕美国制裁中港24名官员，搿根本弗像是待客之道。杨洁篪搭王毅发言加翻译个辰光侪是超过了半个钟头。

布林肯勒中方讲了老多辰光闲话之后，要求记者暂时留下来。布林肯搭沙利文两个人又各自简单发言2分钟。布林肯表示，美国重返世界，加强同盟，得到交关国家高度肯定，搿眼国家同样也对中国搿人权严重忧虑。沙利文讲，一个自信个国家，是好反省自家个缺点，持续弗断地寻求改进，搿是美国个秘诀。

搿闲话讲脱仔，就要求现场记者马上离开。杨洁篪问美方为啥害怕记者勒勒，指美方驱赶记者证明美国弗支持民主，杨要求记者勒场地里向继续采访。杨洁篪随后表示，“对㑚期待忒高了，阿拉以为㑚会得遵守基本个外交礼节”，“我现在讲一句，㑚呒没资格勒中国个面前讲，㑚从实力出发，搭中国谈话。20年前、30年前㑚就呒没搿种地位，因为中国人是弗吃搿一套个。”乃末中美双方官员就开始互相指控对方代表开场发言违反礼节。