2018年马来西亚大选

2018年马来西亚大选是勒2018年5月9号举行个马来西亚国会下议院第14届选举。搿趟选举一共有222隻国会议席搭仔12個州共505隻州议会席位一道选，就剩砂拉越州弗勒里向。搿趟大选是马来西亚历史上顶顶激烈个一趟选举，总共有2,333個候选人抢727隻国会议席搭州议席。选举结果勒5月10号早浪向11点钟公布，前总理马哈蒂尔·穆罕默德带头个反对党联盟希望联盟（希盟）勒国会下议院222隻席位里向抢着113席，拿下来组阁个权力，用简单多数优势成功变天。搿记完结脱巫统搭国民阵线（国阵）执政联盟从马来亚独立以来将近61年个掌权，也是马来西亚联邦政府头一趟政党轮替。另外，马哈蒂尔第二趟做总理个辰光已经93岁哉，变成当时全世界顶顶老个国家领导人。

勒举行选举个12個州里头，本来拨国阵长期捏勒手里个柔佛、森美兰、登嘉楼、马六甲、霹雳、吉打搭沙巴搿7個州侪输脱哉，国阵只好勒砂拉越、彭亨搭玻璃市继续掌权。希盟弗单单保牢仔槟城搭雪兰莪，还从国阵手里抢过来柔佛、马六甲、森美兰、霹雳四隻州个执政权。希盟勒吉打州也拿到仔半数以上个席位，好组织州政府；勒沙巴是搭沙巴民兴党、沙民统联合执政。伊斯兰党除脱保牢仔吉兰丹，还从国阵手里抢着登嘉楼。2018年6月12号，随着砂拉越州四名国阵成员党退出国阵，国阵丢掉砂拉越州个州政权，只剩两隻州（彭亨搭玻璃市）勒海继续执政哉。