黑池

出自维基百科,自由个百科全书

勒金融行业里向,黑池(又称暗流动性,或暗池交易)是一只私人个证券交易场化。勒嗨该些市场里向交易个流动资产侪畀称为暗流动性资产。黑池交易个大部分交易量基本浪向侪来自于金融机构个大额交易,该些交易弗发生于好比纽约股票交易所或者纳斯达克等等公众可以接触到个交易所,因此伊拉可以保持机密而弗畀外部投资者了解。金融交易场化个碎片化搭仔电子交易技术导致了黑池交易个产生,交易者可以通过交叉网络或者直接个私人合约安排进行交易。有一眼黑池交易也是公众可以通过零售经纪人来参与个。

机构投资者参与黑池交易个一只顶重要个理由就是伊拉可以买或者卖金额巨大个证券却弗需要透露交易信息,因此也无没必要去担心该只交易会得对市场有啥事先影响。另外方面讲,其他个市场交易者会得由于黑池交易而失去知情权,市场价格只有勒嗨黑池交易结束之后才会得发生相应个变化,而黑池交易双方只需要买或者卖一只事前约定好个价格。

市面浪向现在有三种主要个黑池交易类型:

  • 为仔提供独特交易平台而设立个独立公司;
  • 经纪人所有个、让经纪人个客户互相匿名接触谈判交易个黑池;
  • 一眼公共交易所设立个让客户匿名且隐性交易个黑池设施。

根据弗同黑池个特定运营搭交易程序,某一眼黑池也会得畀一眼供应商叫做“灰池”。

黑池交易自从2007年以来得到仔快速个发展,勒美国已经积累仔邪气大个股权交易份额。伊属于一种另类交易系统