运动学

出自维基百科,自由个百科全书

运动学(kinematics)是力学个一门分支,专门描述物体个运动,也就是物体拉空间中个位置随辰光个演进而作个改变,完全弗考虑作用力质量等影响运动个因素。运动学搭动力学弗同,动力学专门研究造成运动或影响运动个各种因素。

运动学里向,任何一样物事,假使好忽略其内部个相对运动,其内部每一部分侪朝相同方向、以相同速度移动,箇么就好拿箇只物事看成质点,拿质心位置当作质点个位置。运动学里向,最基本个研究对象就是箇种质点运动。

假使弗好忽略物体内部个相对运动,箇么当解析其运动个辰光,必须先拿物体理想化成刚体,也就是一群相对距离弗变个质点。涉及到刚体个问题交关困难,因为刚体可能会进行平移运动、旋转运动或者两者侪有。更困难个是多刚体系统个运动。