鲁迅公园（上海）
有关本条目名称个其他意思，请参看“鲁迅公园”。鲁迅公园是上海主要历史文化纪念性公园搭中国第一个体育公园。来勒上海市虹口区东江湾路146号，占地22.37公顷。
鲁迅公园老早叫虹口公园，1988年10月19号纔改成功今朝箇個名字。
历史
[编辑]虹口公园
[编辑]清朝光绪二十二年（1896年），上海公共租界工部局来勒租界外头个北四川路底买仔237.288亩农地，外加丄1901年买个约200亩地，一部分畀万国商团打靶，挺下来个造公园。公园由英国园艺设计师斯德克根据英国格拉斯哥体育公园模式设计，1901年动工个辰光叫“新娱乐场”（貤叫靶子场公园），1903年定名“虹口娱乐场”。1906年4月份局部开放，1909年造好。1922年改名叫“虹口公园”[1]:6-7。
作为大型综合性体育公园，虹口公园里向有1座九孔高尔夫球场，75片草地网球场，8片硬地网球场，3片足球场，5片草地滚球场，还有曲棍球、篮球、棒球、田径场。1915年搭仔1921年，虹口公园分别举办第二届搭第五届远东运动会。根据工部局统计，民国24年（1935年），租界外侨只有3.8万人，而虹口公园直接参加体育活动个人次高达86103人次，打高尔夫还要排队[2]。
另外一方面，因为虹口公园边浪是靶场，故咾常常是操演场。1920年代，因公园贴隔壁是靶场，租界工部局决定拿虹口公园变成万国商团步兵个会操地点；日军驻沪第三舰队也基本每年侪来勒虹口公园进行天长节阅兵。1932年4月29号正好是天长节，发生仔虹口公园爆炸案。日军来勒虹口公园阅兵，韩国临时政府个独立党党员尹奉吉来勒主席台边浪引爆炸弹，当场拿日本上海派遣军司令白川义则、居留团团长河端贞次咾啥个炸死，日本公使重光葵、总领事村井仓松侪炸唻重伤，现在公园里向还有尹奉吉个纪念亭。1933年1月9号，日军再次来勒虹口公园举办大规模阅兵，戒备森严，导致老百姓还以为日军准备进攻，闸北个老百姓侪拉逃命。
1937年战前，日军事实上控制虹口公园，经常性连续几天带勒重武器操演，游客逃光哉。八一三事变以後，公园彻底畀日军佔領，变成军用场地[1]:170-175。1945年日本投降以後叫“中正公园”。1950年改回“虹口公园”。
鲁迅公园
[编辑]1927年，鲁迅从广州搬来上海，住勒虹口公园附近个大陆新村，直至伊死脱。鲁迅生前常常来公园散步。1956年，鲁迅个灵柩从万国公墓迁到迭头，建仔鲁迅纪念亭、鲁迅纪念馆咾啥个，公园转型成纪念型公园，体育功能剥离到边浪个虹口体育场（现在虹口足球场）。1959年，虹口区人民委员会发动社会各界参加“义务劳动”，来勒公园里向挖湖堆山，挖出隻面积约1.6万平方米，深3米个人工湖搭面积4400平方米，高22米个假山[3][4]。1988年10月19号，公园正式改名叫“鲁迅公园”[5]。
2013年8月28号开始，公园关门大修，2014年8月28号恢复开放，增设一些跟鲁迅有关系个装饰[6][7]。2022年10月份，公园东北角经过为期5個号头个局部改造以後重新开放，公园来勒大连西路、欧阳路之间弗再有围墙哉[8]。
参考文献
[编辑]- ↑ 1.0 1.1 熊月之（2023）．上海公园：1868-1949的城市景观和日常生活．上海科学技术文献出版社．ISBN 978-7-5439-8389-2．
- ↑ 陈洋阳. 虹口公园中的体育面貌考. 体育科研. 2018, 39 (06) [2022-10-10]. （原始内容存档于2022-10-10）.
- ↑ （2007）上海名园志．上海画报出版社．ISBN 9787806858851．
- ↑ 花以友. 跨越世纪——贺鲁迅公园百年华诞. 园林. 1996, (03).
- ↑ 史内克. 虹口公园改名鲁迅公园. 上海鲁迅研究. 1989.
- ↑ 朱珉迕 (2013-08-22). "上海鲁迅公园将改造 园方：将修旧如旧". 解放日报. Retrieved 2022-10-10.
- ↑ 马化宇; 郑莹莹 (2014-08-27). "上海鲁迅公园时隔55年首度大整修 耗资6800万元". 中国新闻网. Retrieved 2022-10-10.
- ↑ "新开2个出入口，鲁迅公园“破墙”开放！". 上观新闻. 2022-10-05. Retrieved 2022-10-10.
