苏联

苏联国旗

苏联曾经个范围

苏维埃社会主义共和国联盟（俄语：Союз Советских Социалистических Республик），是1922-1991年间存在向东欧和亚洲北部个一个联邦制社会主义国家。苏联首都一直是莫斯科。

历史

列宁时期

1917年俄罗斯帝国发生二月革命，沙皇退位，帝国灭亡；后头马上亦发生十月革命，共产党（布尔什维克）上台，伊个领导人是弗拉基米尔·伊里奇·列宁。1922年12月30号，俄罗斯苏维埃社会主义共和国、乌克兰、外高加索联邦作白俄罗斯合并，成立得苏维埃社会主义共和国联盟。1924年通过第一部宪法，宣布国家是联邦制个、社会主义个国家，各个共和国有退出苏联个权力。

斯大林时期

1924年列宁逝世，斯大林当得苏联党作国家个最高领导人。执政前期，斯大林作党内个反对派进行政治斗争，打到得各种反对派，搞起得个人崇拜。1936-1937年发动“大清洗”，杀落弗得了干部。经济高头，从1928年开始，推行五年计划，实行快速工业化政策，让苏联变成得一个工业强国、农业弱国。1941-1945年，苏联击败得法西斯德国，取得得卫国战争个胜利。战后，斯大林继续当苏联个独裁者。冷战也来向箇个辰光开始。1953年斯大林逝世。

赫鲁晓夫时期

1953年，赫鲁晓夫当得苏联领导人。伊开始慢慢推行改革，苏联社会出现得“解冻”个局面。1956年，赫鲁晓夫来向苏共二十大高头发表秘密报告，严厉批评斯大林，几乎全盘否定斯大林。由此，苏联开始得越加大规模个改革，平反冤假错案，放活经济。赫鲁晓夫晚年脑髓搭牢，瞎捻西捻，1964年畀党内保守派推翻。

勃列日涅夫时期

1964年，勃列日涅夫上台。伊开始推行“新经济”，推动得经济个发展。后头开始变得保守僵化，弗思进取，主要靠石油收入发展经济。70年代，勃列日涅夫来向国际高头频频出击，对美国取得得局部优势。1979年入侵阿富汗。1980年举办莫斯科奥运会。1982年逝世。

安德罗波夫、契尔年科时期

勃列日涅夫时期，干部终身制严重，调动蛮少。政治局里头是一帮老人来向执政。勃列日涅夫死后，年老个安德罗波夫、契尔年科相继执政。伊拉都有心挽救苏联，难为都做得15个月总书记后头就死坏哉。

戈尔巴乔夫时期

1985年，五十多岁个戈尔巴乔夫畀高层看重，出任总书记。伊提出得“改革与新思维”，对内提倡改革，对外反对冷战，搞新思维。伊个改革基本上失败，经济形势一片混乱，政治高头反对派层出弗穷，政局混乱。新思维个结果是东欧剧变，冷战结束。苏联个国际战略形势变得极度恶劣。1990年，苏联修改宪法，实行多党制、总统制，也弗寻挽救苏联个灭亡。1991年8月19号，苏联发生八一九事件，解体速度大大加快。12月26号，苏联停止存在。