跳转到内容

苏州市轨道交通11号线与3号线工程贯通运营改造项目

出自维基百科,自由个百科全书

苏州市轨道交通11号线与3号线工程贯通运营改造项目指个是苏州轨道交通从2023年8月12号起,对3号线搭仔11号线个信号、车辆、轨道等设施个改造工程。箇项项目目的是拿11号线同3号线连拉一道,实现沪苏同城化同苏州市内全域一体化,提升昆山到苏州市中心个直达效率[1][2]

背景[编辑]

交通状况[编辑]

11号线是昆山去苏州市区个轨道交通主动脉,每到休息日脚侪会得碰着进出苏州个客流高峰,几乎所有个乘客侪要拉唯亭站调3号线,必过唯亭站两线发车频率弗同,会导致交交关关换乘个客流积拉站台高头[3]

市域一体化[编辑]

苏州个县级市同市区之间一向相对独立,经济上呒没绝对个中心,畀人嘲“散装”。苏州市委书记曹路宝认为,苏州要融入长三角一体化,必须要先弄好自家苏州市里向个一体化[4]。苏州官方拿3号线同11号线贯通运营作为推动昆山进入市域一体化个只重要措施。

改造前运行状况[编辑]

苏州地铁2024年规划线路图
11号线开通后,人山人海个3号线站台

3号线[编辑]

3号线全线长45.2km,是苏州城区东西向主干线,改造前运行等级为Goa2级。配车40列240辆[lower-alpha 1],列车设计时速80km/h,平均旅速约34.37km/h。全线只跑苏州新区火车站站唯亭站箇一只交路。

11号线[编辑]

11号线个运行等级是Goa4级。全线长41.2km,配车35列210辆,列车设计时速100km/h,平均旅速约42.79km/h。全线绝大多数辰光只跑唯亭站花桥站箇一只交路,早夜有弗同交路个大站快车。

工程实施[编辑]

3号线改造[编辑]

因为3号线同11号线个自动化等级弗同,3号线等级较低,故咾要先升级3号线信号系统。2023年8月12号开始,3号线开始实施改造,包括正线车站全自动运行功能改造,场段、控制中心设备改造,车辆适应性改造等[1]

2023年9月4号到12月22号,为咾配合项目施工,3号线礼拜一到礼拜四(除脱法定节假日脚)提造收车,收车后加开3部苏州新区火车站站宝带路站个小交路列车[5]

2023年11月14号,设备故障,故咾3号线唯亭方向发生延误,怀疑同信号改造有关[6]

2023年12月,3号线完成唯亭站金厍桥站个改造,预计勒拉2024年底前完成挺下来路段个改造。

唯亭站改造[编辑]

已完成的联络线右线
(2023-10-01)

11号线还勒拉设计个辰光,3号线便造好哉,所以设备差异弗小,唯亭站个设计也主要是换乘模式,仅保留远期改成贯通运营个条件。车站设计个是平行换乘,3号线同11号线联络线一开始只造右线(花桥方向),待远期(呒没具体时间表)再拆脱11号线交叉渡线去造左线(苏州市区方向)[7]。必过,现在联络线左线个建设时间大幅提早。

2023年12月15号23点10分,各专业按照抢修应急预案,开始廿多钟头长个联络线左线改造。17号01点40分,1104列车做试验列车从草鞋山站出发,开始2個钟头个热滑实验。20号,贯通工程通过第三方安全认证,相关初期运营证书也发放好哉[8]

受改造影响,2023年12月16号到22号,11号线唯亭站到阳澄湖东站临时停运,停运区间将配备免费公交接驳服务[9]。3号线则维持一开始个运行图安排。

改造后,11号线下行同联络线平交个正线部分、D0102-D0103间(西北-东南)渡线搭相关信号设备拆脱,3号线端头个信号设备更新,11号线站台弗用。

车辆升级[编辑]

车子勒拉自家个停车场、车辆段进行信号升级。

调度指挥权移交[编辑]

2023年12月18号04:16开始,3号线调度指挥权从运营一分公司调度中心(广济南路指挥控制中心)移交到运营二分公司调度中心(祖冲之路指挥控制中心)手里向。3号线浒墅关车辆段、唯亭停车场个调度指挥权同属地管理权从广济南路OCC交畀祖冲之路OCC[8]

改造后运营方案[编辑]

因为刚贯通个辰光好用个列车弗够,而且可能会受到3号线信号改造个进度个影响,故咾贯通运营会得分成两個阶段实施。

第一阶段[编辑]

进3号线里向贯通运营个11号线列车个显示屏,新加了只3号线个标志

2023年12月23号,11号线与3号线贯通工程第一阶段完成,两线运行交路调整成下头个样子:

实际运营中,11号线列车勒拉3号线区段运营个辰光会得降级采用Goa3标准,需要司机勒拉车子浪值守。

  • 上行列车停到草鞋山站个辰光,3号线司机上车,打开软隔断同司控台盖板,并勒拉司机室里向值守;列车开到金厍桥站前,司机要提早收好椅凳,到站后拿司控台盖板同软隔断关脱。
  • 下行列车从金厍桥站发车前,司机要打开软隔断同司控台盖板;下行列车停靠唯亭站后,司机好关脱司控台,拿司机室重新开放,列车信号升级以Goa4标准继续运行,司机好勒拉草鞋山站下车。

第二阶段[编辑]

2024年4月27号开始,第二阶段贯通运营开始。

因为3号线新车交付进度,而且列车调试个辰光发现各种问题,故咾第二阶段呒没办法全线贯通。11号线向西扩展到横山站,共线范围扩大。共线段最小行车间隔维持约莫3分30秒,3号线、11号线其它区段约莫7分钟。大站快车开行计划保持弗变。[10]

3号线新车勒拉4月27号正式投入11号线花桥至横山交路运营。所有列车勒拉3号线区段里向侪有人值守。每天早高峰前夜高峰後,有部分列车因调度需求跑3-11号线全线贯通交路。早间列车从浒墅关车辆段出库,进苏州新区火车站载客去花桥;夜到列车从花桥赶到苏州新区火车站,清客以後退出运营返回浒墅关车辆段。只弗过苏州轨道交通官方微信、微博并没透露箇隻交路。

第三阶段[编辑]

预计2024年底,11号线好直接开进3号线里向直接到苏州新区火车站,3号线个列车也将好直接开去昆山,也就是双向贯通运营[11]

参见[编辑]

注释[编辑]

  1. 挺下来10列60辆列车去4号线搭伊个支线运行。

参考资料[编辑]

  1. 1.0 1.1 中国工程报 (2023-12-18). "苏州3号线、11号线贯通改造施工正式开始!公交免费接驳". 
  2. 城苏州新闻中心 (2023-12-09). "从东方之门到东方明珠 地铁11号线、3号线年底单向贯通运营". 
  3. 寒山寒 (2023-07-06). 苏州地铁11号线客流飙升 冷清的唯亭站爆满 大量昆山客流涌进苏州.
  4. 任俊锰 (2022-08-26). 苏州嫌自己不够大. 上观新闻.
  5. 苏州轨道交通9月4日起 3号线周一至周四提前结束运营 (2023-08-30).
  6. 3号线开往唯亭方向的列车将有延误. 苏州轨道交通szrailtransit (2023-11-14).
  7. 武超超; 董立冬. 苏州轨道交通S1线唯亭站衔接方案研究. 工程建设与设计. 2022, (20). 
  8. 8.0 8.1 苏州轨道交通官方微信视频号 (2023-12-18). 3-11贯通运营改造全纪实.
  9. "从东方之门到东方明珠 地铁11号线、3号线年底单向贯通运营". 引力播移动端. 2023-12-09. Retrieved 2023-12-09. 
  10. 苏州轨道交通 (2024-04-25). "4月27日起,3/11号线贯通到横山站啦!". Retrieved 2024-04-25. 
  11. 姑苏晚报 (2023-12-09). "苏州地铁11号线3号线年底单向贯通运营".