苏哈托

苏哈托

苏哈托（Suharto，民间常用“Soeharto”，1921年6月8号－2008年1月27号），印度尼西亚独裁者。印尼自独立以来个第二任总统，执政超过32年。必过，苏哈托贪污，肃清左派人士，大规模排华，还硬劲喫脱东帝汶，杀脱超过10万东帝汶人。根据透明国际个报告，苏哈托是20世纪顶贪腐个国家元首之一。

伊个上台过程就邪气血腥。1965年9月30号，印尼发生“九三零事件”，一帮左翼军官被讲是搭共产党一道想夺权，畀当时个总统苏加诺镇压脱仔么，苏哈托领导陆军战略指挥部趁机独揽大权，倒打一把，讲政变是苏加诺亲信发动个，就搿能趁机推翻仔亲共个苏加诺政权，拿实权捞勒自家手里。除脱清理左翼人士，伊还勒全国范围内搞起大规模排华浪潮，杀脱交关华人。1967年，伊畀任命为代总统，过仔一年就变成正式总统。

勒伊统治期间，印尼老百姓个日子并弗好过。1970年代到1980年代是伊权力顶顶大个辰光，到了1990年代，伊个独裁统治搭越来越厉害个贪污，让老百姓越来越光火。1997年碰着亚洲金融风暴，后来引发个“黑色五月暴动”终于让苏哈托勒1998年5月份灰溜溜下台。

下台之后，伊勒任期内个贪污指控搭对华人个种族屠杀事件让伊吃仔官司。不过，因为伊身体越来越推扳，再加浪印尼国内舆论个变化，到底还是朆真正追究伊个责任。伊勒2008年死脱。