節氣

節氣是中國老法頭拿一歲（差弗多現在公曆個一年）等分成功廿四點個日腳，幫助辦別季節時令，幫農夫耕田。因為中國紀日看個是亮月，弗是太陽，所以節氣勒農曆個日腳弗固定，相反，公曆搭太陽同步，所以年年節氣日腳差弗多。節氣定法分兩種，一種是平氣，就是一歲平均分廿四分。另一種時定氣，拿黃道平分廿四分，用太陽經過節氣角度個日腳來算。因為一歲裏向，太陽勒黃道浪個速度弗一樣，所以節氣當中交差個日腳有多有少。平氣搭定氣算出來個交差一眼眼。

節氣分法

節氣分節搭氣，節是拿黃道十二分，氣就是節搭節當中個位置，也有十二個。

古人交關重視節氣，冬至是一歲裏向頂頂日短，畀人定歲首。夏至剛巧反轉來，一年裏向頂頂日長。兩個擺勒一淘叫二至。冬至到夏至當中場化是春分，夏至到冬至當中場化是秋分，該兩日天個日裏夜裏一樣長，叫二分，還有冬至到春分當中叫立春、春分到夏至當中叫立夏，夏至到秋分當中叫立秋，秋分到冬至當中叫立冬。統稱四立。二至二分四立，擺勒一淘叫八節。