盐汽水

超市里向卖个正广和（左）、延中（右）盐汽水

盐汽水是一种有食盐个碳酸饮料，起源自苏联，1950年代引进中华人民共和国並改成功加仔二氧化碳个汽水，是高温作业工人个降温消暑饮品，现在主要流行勒上海市搭仔周边地区，勒辣武汉咾长日有得老钢铁厂个地方也蛮行个。

历史

1952年，天津钢厂为咾解决高温环境底下工人流交交关关汗，缺少盐分个问题，学习苏联经验，做出片剂，配方是食盐2.5克、小苏打（碳酸氢钠）0.78克、酒石酸0.72克、糖精0.02克，吃个辰光加水冲出饮料。登文推广仔么大家纷纷跟进，因为有个地方缺少部分原料，拿配方改良，去脱碳酸氢钠，酒石酸改成0.6克柠檬酸，另外加微量个橘子油做香料，没汽个，叫“含盐清凉饮料”。具体配比浪向，吴襄、顾学箕等学者试验过后认为，苏联版本个0.5%含盐量弗适合中国人，拿含盐量降到0.2%左右。1956年，上海市汽水厂头一趟生产带二氧化碳个正广和盐汽水，当年夏天卖出26万打（一打12瓶）；1957年夏天还没到就已经有得76万打订货量。各地方纷纷跟进生产盐汽水，而且供不应求，变成劳防用品，只向一线高温作业个工人发放；一些大型工厂也自家造仔盐汽水车间，自家生产盐汽水发畀工人。1959年，经过时任上海市副市长曹荻秋批准、40多家单位一道攻关，上海汽水厂造出两条盐汽水生产流水线，1962年达到每分钟120瓶个设计产能，改革开放以后产线进一步增加到6条。产能扩大，完全满足一线供应仔么，盐汽水弗再是特定岗位工人专享个劳防用品哉，开始推到市场浪向。

1988年，可口可乐公司帮上海申美公司合资成立饮料品牌雪菲力，盐汽水是伊一隻主要产品；1997年，上海另外隻本土品牌延中开始生产盐汽水，经过多年发展有得45%个市场占有率。到现在，盐汽水领域主要是延中、正广和、雪菲力三分天下。根据天猫超市统计，2018年夏天里向，半隻号头卖出去500万瓶盐汽水，销量超过可口可乐，毛8成卖到上海。

配料表

正广和盐汽水现在个配料表是：水、白砂糖、精盐、柠檬酸、苯甲酸钠、香精、二氧化碳。其他公司个也差大弗多。。 　　

储存方法

常温、弗好摆勒太阳底下暴晒，禁止加热或者零下环境冷冻。

流行文化

• 勒拉电视剧《爱情公寓》当中，有句经典台词“我一口盐汽水喷死你”。